Блиц анкет
Овог:   Цогт
Нэр:  Эрдэнэбат
Төгссөн сургууль: Москвагийн Их  Сургууль
Мэргэжил: Төрийн Удирдлага
Хобби: Түүх, загас барих, ном унших, спортоор хичээллэх.

         Ганьт ХХК-ны гүйцэтгэх захирал Ц.Эрдэнэбат: Жижиг дунд бизнесийг дэмжсэнээр барилгын үнэ буурах боломжтой

-    Танд энэ өдрийн мэнд хүргэе. Яридцлагаа танай компанийн түүхээр эхлэе гэж бодлоо. Анх яаж энэ салбарт хөл тавьж байв?
-    Баярлалаа. Би анх 1998 онд итгэлтэй хэдэн найз нартайгаа нийлж хоршоо байгуулан  ажиллаж эхэлсэн бөгөөд энэ хугацаанд нэлээд туршлага хуримтлуулж өөрөө бие даан шинэ салбарт хүчээ сорих нь зөв юм байна гэдгийг ойлгож, зоригтойгоор энэ салбар руу эргэлт буцалтгүй орсон.  Анх энэ компаниа дүү нартайгаа хамтарч 2001 онд 14 ажилтантайгаар байгуулж, үйл ажиллагаагаа эхэлж байсан бол өнөөдөр нарийн мэргэжлийн боловсон хүчнээр бүрэн хангагдаж, барилга угсралтын болон цахилгаан сантехникийн 300-аад ажилтантай үйл ажиллагаагаа явуулж байна. Энэ хугацаанд Монгол улсынхаа хөгжил цэцэглэлт, бүтээн байгуулалтад идэвхи зүтгэлтэй, санаачлагатай гар бие оролцож ирлээ. Бидний хийж бүтээсэн ажлыг төр засгаас өндрөөр үнэлж  манай хамт олны дундаас “Гавъяат барилгачин” төрж гарсан нь цаашид урам зоригтой ажиллах эрч хүчийг өгсөн, мөн үүрэг хариуцлага нэмэгдэж байгааг ухамсарлаж ажиллах болгосон.

-     Нийслэлийнхээ бүтээн байгуулалтанд ямар хувь нэмэр оруулав?
-    Бид Монгол улсын нийслэл Улаанбаатар хотынхоо их бүтээн байгуулалтын ажилд 2002 оноос эхлэн оролцож эхэлсэн. Манай компани 2002-2010 онд 750 айлын доороо гараж бүхий орон сууц, үйлчилгээний болон өрхийн эмнэлгийн барилгуудыг өөрийн хөрөнгөөр барьж иж бүрэн ашиглалтанд хүлээлгэж өгсөн.  Монгол Улсын Засгийн Газрын “40.000 айлын орон сууцны хөтөлбөрийг хэрэгжүүлэх, уг салбарыг хөгжүүлэхэд  оруулсан хувь нэмрээрээ их бүтээн байгуулалтын жил болох 2004, 2005 онуудад “Оны шилдэг ТОП-10 барилгын байгууллага”-аар шалгарч байсан.

-    Байрны үнэ буурах боломж хэр байна? Иргэдээ хэрхэн хямд, боломжийн байртай болох тал дээр танд санаж бодож явдаг зүйл байгаа байх?
-    Байрны үнэ бууруулах, иргэд, худалдан авагчдыг  хямд үнэтэй, чанартай  байраар яаж хангах вэ гэдэг асуудал аль ч барилгын компанийн хувьд эн тэргүүнд тавигддаг асуудал. Манай компани энэ тал дээр байнга анхаарч ирсэн. Банкны зээлийн талаар баримтлах төрийн мөнгөний бодлого учир дутагдалтай байна. 1-рт: Барилга угсралтын үйл ажиллагаанд зориулсан төрийн мөнгөний бодлого алга байна. Ер нь орон сууцны барилга үйлдвэрлэл бол өөрөө их онцлог салбар байдаг. Барилга угсралтын компанийн хувьд бараа бүтээгдэхүүн үйлдвэрлэл байдаг бол худалдан авагчийн хувьд үндсэн хөрөнгө болдог. Барилгын компаниуд эргэлтийн хөрөнгийн чанартай, хүү өндөр /сарын 2.0-2.4%/, хугацаа богинотой банкны зээлийн хөрөнгөөр барилга үйлдвэрлэл явуулж байгаа нь үнэ өсөх нэг гол шалтгаан болж байна. Жишээ нь: Талхны үйлдвэр дээр хүүтэй зээл авахад сардаа хэд хэдэн удаа эргэлтэнд оруулах боломжтой байдаг бол яг ижил нөхцөлөөр зээл авсан барилгын компанийн эргэлт сараар биш 1-3 жил байна. Тодруулбал эргэлтийн хөрөнгийн зээлээр үндсэн хөрөнгийн үйлдвэрлэлийг явуулж байгаа хэрэг. 2-рт: Иргэдэд хүү багатай, урт хугацаатай орон сууцны зээлийг гаргах хэрэгтэй. Жишээ нь: Жилийн 6-9%-ийн хүүтэй, 15-20 жилийн хугацаатай байх нь илүү тохиромжтой байх болов уу. Одоогоор төрийн албан хаагчдад ийм зээл олгож байгаа нь цаашид нийт иргэдэд ийм нөхцөлтэй зээл олгох боломжтойг харуулж байгаа юм. Иргэд одоо сард 1.3-1.8 %-ийн хүүтэй орон сууцны зээл авч байгаа нь жилд банкинд 15.6-21.6 %-ийн хүү төлөхөд хүргэж байна. Энэ нь иргэд, худалдан авагчдын эдийн засагт хүндээр тусч байгаа.

-    Иргэд барилгын салбарын мэдээлэл муу байна. Чанараас илүүтэйгээр үнэ ярьдаг. Танай компанийн зүгээс энэ тал дээр ямар чиглэлтэй ажиллаж байна?
-    Иргэд барилгын салбарын мэдээлэл муу, чанараас илүүтэйгээр үнэ ярьдаг нь үнэн. Хүн бүхэн барилгын чанарт анхаарах нь чухал. Засгийн газраас хэрэгжүүлж буй “40.000 орон сууц” хөтөлбөрийн хүрээнд Засгийн газар тодорхой бодлого гаргаж, барилгын компаниудад таатай нөхцөл бүрдүүлсэнээр барилгын материалын жижиг дунд үйлдвэрлэлийг бий болгох хэрэгтэй. Ингэснээрээ барилгын чанарт сайнаар нөлөөлөл, үнэ буурах таатай нөхцөлийг бүрдүүлж өгнө. Манай компани энэ тал дээр идэвхтэй ажиллаж байна. Төрийн байгууллагууд барилгын төрийн бус байгууллагатай хамтарч ажиллан, мэдээллийн сан байгуулж, түүгээрээ иргэд нь ил тод нээлттэй, хүртээмжтэй, хэрэгцээтэй мэдээллүүдээ авч сонголтоо хийж, сэтгэл ханамжийн баталгаа авч байх нь чухал. Энэ тал дээр сүүлийн үед ЗТБХБЯам, Монголын Барилгачдын Холбоо зэрэг төрийн ба төрийн бус байгууллагууд гадаад, дотоодын үзэсгэлэн зохион байгуулах, олон улсын байгууллагаас сургалт зохион байгуулах, мөн инженер техникийн ажилтнуудад сүүлийн үеийн шинэ дэвшилтэт техниологыг танилцуулж сургалтанд хамруулах, ажилгүй болон мэргэжил эзэмшээгүй иргэдийг мэргэжлийн чиг баримжаатай болгох үүднээс сургалтанд хамруулж, тэндээс идэвхитэй сайн суралцаж байгаа хүмүүсийг давтан сургалтанд хамруулсаны дараа ажлын байраар хангаж байгаа нь барилгын салбар, барилгын үйлдвэрлэлийн салбар хөгжихөд тус дэм болж байна.

-    Барилгын материал үйлдвэрлэлийг эх орондоо хөгжүүлэхэд танай зүгээс ямар хувь нэмэр оруулж байна вэ?
-    Их бүтээн байгуулалт барилгын салбар, жижиг дунд үйлдвэрлэлийг дэмжиж, мод модон эдлэл, хаалга, хуванцар цонх, бетон зуурмагын үйлдвэр, тоосго, блокны үйлдвэр, арматур бэлдэц хийцийг өөрсдөө бэлдэж, боловсруулж эцсийн бүтээгдэхүүн бий болгодог . Ингэснээрээ эргээд манай  барилгын чанарт сайнаар нөлөөлж , бид иргэддээ чанартай, хямд өртөгтэй орон сууцаар ханган, шинээр ажлын байр бий болгож байна. энэ маань нэг талаараа барилгын бараа материал үйлдвэрлэл болоод бүтиээн байгуулалтын ажилд гар бие оролцож байгаагийн маань нэгэн хэлбэр бөгөөд үүндээ бид баяртай байдаг.

-     Цаашид танай компани юу хийхээр төлөвлөж байна?
-    Засгийн газраас хэрэгжүүлж буй “100.000 орон сууц” хөтөлбөрийг манай компани дэмжиж байгаа бөгөөд үүнтэй уялдуулж цаашид хийх ажлын стратегиа төлөвлөж байна.

-     Сүүлийн асуултыг танд үлдээе
-    “Барилга.МН” сэтгүүлхэндээ зочноороо урьж оролцуулж байгаад баярлалаа. Танай сэтгүүл нь үндэсний хэмжээний олон мянган уншигч, захиалагчтай, барилгын салбарын мэдээллийг иргэдэд түргэн шуурхай, ил тод, нээлттэй хүргэж байдаг танай хамт олонд ажлын амжилт хүсье. Мөн бидний болон барилгын салбарын үйл ажиллагааг мэргэжлийн удирдлагаар хангаж ажилладаг ЗТБХБЯам, Газрын Харилцаа, Барилга Геодези Зураг зүйн Газар, Барилга орон сууц нийтийн аж ахуйн бодлогын газар, Монголын Барилгачдын Холбооны хамт олонд ажлын амжилт хүсье.

-     Бидэнтэй ярилцсан танд баярлалаа. Таны ажилд өндөр амжилт хүсье.