Цемент баталгаат хугацаатай бүтээгдэхүүн
                Урин цаг ирхээр бид амины орон сууц, байрандаа засвар хийж эхэлдэг. Хэрэглэгч бидний хувьд барилгын материалын шинж чанар болоод хэрэглэх зааврын талаар мэргэжилийн хүнийг бодход мэдлэг бага байдаг. Барилгын аль ч төрлийн засварыг цементгүйгээр хийх боломжгүй. Тийм ч учраас бид энэ удаагийнхаа зөвөлгөөгөөр цементийг хадгалах горим, хугацааны талаар хүргэж байна.
            Та бидний өргөн хэрэглээний хоол хүнснээс эхлээд бүхий л төрлийн бараа бүтээгдэхүүнүүд баталгаат хугацаатай байдаг. Түүний нэгэн адил цемент ч мөн баталгаат хугацаатай бүтээгдэхүүн  юм. Тиймээс барилгын компани, хувь хүн албан байгууллагууд цементийг хэрэглээндээ зориулан авахдаа баталгаат хугацааг нь анхаарах хэрэгтэй юм.
              Цементний хадгалах хугацаа нь 30-60 хоног байна. Хугацаа хэтэрсэн тохиолдолд уг бүтээгдэхүүн нь өөрийн барьцалдах, хэвлэгдэх чанар муудах, суултанд орох, химийн холбоотой усаа алдах, эрдсийн найрлага өөрчлөгдөх, агаар чийгийн үйлчлэлд орж хатууран бэхжиж чанараа алддаг аж.
              Импортоор нийлүүлэгдэж буй болон эх орны үйлдвэрийн савласан цементийн уут нь удаан хадгалахад зориулсан экспортын уут биш байдаг. Тиймээс харанхуй сэрүүн газар модон улавчин дээр 1,8метрээс өндөргүй хураах ёстой.
             Хэдийгээр хуурай сэрүүн газар хадгалсан ч гэсэн гурван сарын дараа бат бэхийнхээ 10-20%, зургаан сарын дараа 20-30 хувийг алддаг болохыг анхаарах хэрэгтэй.
Тиймээс хэрэглэгч та цемент худалдан авахаар зэхсэн баталгаат хугацааг нь анхаарахаас гадна шинэ задгай цементийг шууд үйлдвэрээс нь эсвэл томоохон силос бүхий газруудаар дамжуулан авч байхыг зөвлөе.