“БУЯНТ-УХАА” ОРОН СУУЦНЫ ХОРООЛЛЫН
ТОВЧ ТАНИЛЦУУЛГА

“Буянт-Ухаа” орон сууцны хороолол нь Хан-Уул дүүргийн 8, 9, 10 дугаар хорооны нутаг дэвсгэрт 170.0 га талбайд төлөвлөгдсөн.

НИТХТ-ийн 2007 оны 06 дугаар сарын 18-ны  286 дугаар тогтоолоор батлагдсан тус хорооллын  хэсэгчилсэн ерөнхий төлөвлөгөөний дагуу  төлөвлөлтийн хугацаанд 10200 айлын орон сууц баригдаж, 42.0 гаруй мянган хүн оршин сууж, 10080 сурагчтай сургууль, 2520 хүүхдийн цэцэрлэг, өдөрт 1470 хүн үзэх өрхийн эмнэлэг, 2000 ажлын байр бүхий оффисын барилга 8000 орчим хүн ажиллах соёл, ахуй үйлчилгээний барилга байгууламжууд баригдана.

Монгол Улсын Засгийн газраас хэрэгжүүлж буй “100 мянган айлын орон сууц” төслийн “Шинэ хотхон, хороолол барих” чиглэлийн хүрээнд:

“Буянт-Ухаа” орон сууцны хороололд 9200 айлын орон сууцыг барихаар төлөвлөв.

Нийгмийн дэд бүтцийн дараахь барилга байгууламжууд баригдана. Үүнд:

• • 9260 хүүхдийн сургууль,
  • 2320 хүүхдийн цэцэрлэг,
  • 695 суралцагчидтай МСҮТ,
  • өдөрт 1350 үзлэг хийх хүчин чадалтай өрхийн эмнэлэг,
  • 8880 м2 үйлчилгээний талбай бүхий, 590 ажлын байртай худалдаа, үйлчилгээний төв,
  • 1270 суудалтай соёлын төв,
  • 1930 м2 талбай бүхий спорт цогцолборыг барихаар төлөвлөж байна.

Инженерийн дэд бүтцийн дараахь барилга байгууламж, шугам сүлжээнүүд баригдана. Үүнд:
Дулаан хангамж:
Тус хороололд баригдах барилгуудыг төвлөрсөн дулаан хангамжийн системээс хангах бөгөөд ф150-700 мм-ийн голчтой 13 км урт төв шугам, дулаан дамжуулах 9 төвийг барьж дулаанаар хангана.

Ус хангамж, ариутгах татуурга:
Нийт 11250 м3/хоног цэвэр ус шаардагдах бөгөөд ф100-300 мм-ийн голчтой 10.8 км урт цэвэр усны шугам, ф350-800 мм-ийн голчтой 3.5 км ариутгах татуургын шугам барина.

Цахилгаан хангамж:
Хан-Уул дүүргийн 8 дугаар хорооны нутагт байрлах “Яармаг” 110/35/10 кВ-ын хүчдэлтэй 2х25 мВт чадалтай станцыг 2х40 мВт чадалтай болгон өргөтгөж, 38 км цахилгаан дамжуулах шугам, иж бүрэн 6 хуваарилах байгууламж, 36 дэд өртөө барьж цахилгаан эрчим хүчээр хангахаар төлөвлөв.

Авто зам:
1.1 км урт хотын чанартай авто зам, 5.3 км урт хорооллын төв авто замыг барина.
Хэрэгжилтийн байдал:
Төсөл хэрэгжүүлэгч 23 аж ахуйн нэгж, байгууллагатай хамтран ажиллах гэрээг хууль, эрх зүйн хүрээнд байгуулан ажиллаж байна. Тус хорооллын ф100-300 мм-ийн голчтой 10.8 км урт, 2.9 тэрбум төгрөгийн төсөвт өртөгтэй цэвэр усны шугам сүлжээ, ф350-800 мм-ийн голчтой 3.5 км урт, 1.7 тэрбум төгрөгийн төсөвт өртөгтэй бохир усны шугам сүлжээний ажлын зураг төслийг “Инж байгууламж” ХХК-д боловсруулан батлуулсан бөгөөд цэвэр усны шинэ эх үүсвэрийн хайгуул судалгааны ажлыг “Экос” ХХК гүйцэтгэж байна. Дулаан хангамжийн ф150-300 мм-ийн голчтой 6.2 км-ийн урт, 1.3 тэрбум төгрөгийн төсөвт өртөгтэй шугам сүлжээний угсралтын ажлыг “Набсан” ХХК гүйцэтгэсэн. Мөн ф350 мм-ийн голчтой 5.5 км урт дулаан дамжуулах шугамыг ф700 мм болгон өргөтгөх, 8.4 тэрбум төгрөгийн төсөвт өртөгтэй ажлыг “Эйс Эйн Дэй” ХХК гүйцэтгэж дуусаад байна.

Тус хорооллыг цахилгаан эрчим хүчээр хангах 110кВ-ын цахилгаан дамжуулах агаарын шугам, 110/35/10кВ-ын дэд өртөөний зураг төсвийг “Шугам” ХХК боловсруулж, батлуулахаар Эрдэс баялаг, эрчим хүчний яаманд хүлээлгэж өгсөн. Гүйцэтгэгчийг сонгон шалгаруулах тендерийг зарлахаар бэлтгэж байна.

“100 мянган айлын орон сууц” төслийн хүрээнд баригдах “Буянт-Ухаа” орон сууцны хорооллын:

Нийт хөрөнгө оруулалт: 611.2 тэрбум төгрөг.
Үүнээс:
Орон сууцанд        540.4 тэрбум төгрөг;           
Нийгмийн дэд бүтцэд 33.5 тэрбум төгрөг;
Инженерийн дэд бүтцэд 37.3 тэрбум төгрөг шаардагдах урьдчилсан тооцоо гарч байна.