-Сайн байна уу? Юуны өмнө танд Монгол улсад барилгын салбар үүсч хөгжсөний 85 жилийн ойн мэнд хүргэе. “Улаанбаатар хотыг 2020 он хүртэл хөгжүүлэх ерөнхий төлөвлөгөө”-ний талаар яриагаа эхэлье гэж бодлоо.

 - Баярлалаа, Та бүхэнд болон Монголын барилгачдад, барилгын салбарынханд баярын мэнд хүргэе.  Нийслэл Улаанбаатар хотыг 2020 он хүртэл хөгжүүлэх ерөнхий төлөвлөгөө 2002 онд батлагдсан байдаг. Энэ ерөнхий төлөвлөгөөний хүрээнд Улаанбаатар хотод 33 байршил дээр хэсэгчилсэн ерөнхий төлөвлөгөө боловсруулж байна. Улаанбаатарын ерөнхий төлөвлөгөөг бодлогын түвшинд  хэрэгжүүлэх гурван  арга хэмжээ авч ажиллаж байгаа юм. 1-рт Хотын төвийн хэсгийн инженерийн шугам сүлжээтэй газрыг дахин барилгажуулж байгууллага, үйлчилгээ, орон сууцжуулан цогцоор хөгжүүлэх, 2-рт Инженерийн шугам сүлжээнд холбогдох боломжтой гэр хорооллыг орон сууцны хороолол, соёл ахуй үйлчилгээний төв болгохоор хэрэгжүүлж байна. Үүнд 7-р хороолол, МҮОНРТ, Буянт ухаа, Баянголын ам 14-р хороолол гэх мэт.  3-рт Баянзүрхийн товчоо, хотын шинэ төв, 19-р хорооллын орчим гэх мэт Улаанбаатар хотын хэмжээнд тэлэх боломжтой, захын дүүргийн сул чөлөөтэй газарт орон сууцны хороолол барих ажил ерөнхий төлөвлөгөөнд багтсан байгаа. Дээрх ерөнхий төлөвлөгөөг хэрэгжүүлэх явцад нийгэм маань өөрчлөгдөн, хүн ам өсж эрэлт хэрэгцээ нэмэгдсэнээр Улаанбаатар хотыг 2020 оны ерөнхий төлөвлөгөөнд тодотгол хийх, 2030 он хүртэл хөгжлийн чиг хандлагыг тодорхойлох ажлыг яг одоо эхлүүлээд байна. Хэдхэн хоногийн өмнө Улаанбаатар хотыг 2020 он хүртэл хөгжүүлэх ерөнхий төлөвлөгөөнд тодотгол хийх зургийн даалгавар батлагдсан. Ажлын хэсгүүд ажилдаа орсон. 2011 онд УИХ-аар батлуулан хэрэгжиж эхлэх юм.

-Энэ онд ямар ямар ажлыг хийхээр төлөвлөж байгаа вэ? Биелэгдсэн ажлуудаасаа танилцуулна уу?
- Гэр хорооллыг барилгажуулах, утаа тоосыг арилгах, иргэдийг орон сууцжуулах гээд их ажил байдаг. Улаанбаатар хотын Засаг даргын санаачилгаар 7-р хороололд Түр суурьшуулах 300 айлын орон сууцыг барих ажил эхэлж байна. Энэ юу гэсэн үг вэ гэхээр иргэд газраа чөлөөлж энэ байранд ороод, чөлөөлөгдсөн газарт барилгын компани орон сууцны барилга бариад айлууд нь буцаад газар дээрээ барьсан байрандаа орох юм. Энэ онд энэ ажил эхэлсэн. Цаашид 6 дүүрэгт энэ ажил хийгдэх юм. Мөн дэд бүтцийн асуудлуудыг урьдчилан шийдэж, магистраль шугамуудыг барьж байгуулж байна.

-Одоогоор ямар төсөл хөтөлбөр дээр ажиллаж байна вэ?
-“Шинэ бүтээн байгуулалт” дунд хугацааны зорилтот хөтөлбөр дээр ажиллаж байна. Засгийн газрын 2008-2012 оны үйл ажиллагааны хөтөлбөрт тусгагдсан орон сууцны хангамжийг нэмэгдүүлэх чиглэлийн “100 мянган айлын орон сууц” хөтөлбөрийн хүрээнд Улаанбаатарт 75 мянган айлын орон сууц барих боломжтой гэсэн тооцоо судалгааны хөтөлбөр боловсруулж байна. Эдгээр орон сууцыг гол төлөв хорооллоор нь сургууль цэцэрлэг, үйлчилгээний төв зэрэг байгууламжтай, дэд бүтцийн хамт иж бүрнээр барих юм.

-“Шинэ бүтээн байгуулалт” дунд хугацааны хөтөлбөрийг саяхан УИХ-аас баталсан. Энэ хөтөлбөрийн хот байгуулалтын хэсгийн ерөнхий төлөвлөгөөг танайх гаргасан гэсэн. Энэ талаар уншигчдадаа танилцуулахгүй юу?
-УИХ-аас “Шинэ бүтээн байгуулалт” дунд хугацааны зорилтот хөтөлбөрийг баталсан. Энэ хөтөлбөр маань 2010-2016 оны хооронд хоёр үе шаттайгаар хэрэгжих учиртай. Нилээд өндөр хөрөнгө шаардлагатай байгаа. УИХ, ЗГ-ын хэрэгжүүлэх арга хэмжээг зохион байгуулж байгаа. Энэ дотор гэр хорооллыг орон сууцжуулах, дэд бүтцээр хангах, авто зам, шинэ суурьшлын бүс байгуулах гээд их ажил эхэлж байгаа.

-Гэр хорооллыг барилгажуулах тал дээр нийслэлийн хот төлөвлөлтийн газраас ямар төлөвлөгөөтэй ажиллаж байна вэ?
- Гэр хорооллыг орон сууцны хороолол болгон барилгажуулах тал дээр нийслэлийн 7-р хорооллоос 7 буудал хүртэлх гэр хорооллыг барилгажуулах хэсэгчилсэн ерөнхий төлөвлөгөө боловсруулж байна. Улаанбаатар хотын хот байгуулалт болон төлөвлөлтийг хүн амын эрүүл, аюулгүй амьдрах тааламжтай орон зайн орчныг бүрдүүлэх, экологи, нийгмийн хөгжлийн тэнцвэртэй байдлыг хангах зорилгоор “Утаагүй Улаанбаатар” хөтөлбөрийг боловсруулсан. Ер нь агаарын болон хөрсний бохирдол хэт ихэссэн учраас одоо байгаа гэр хорооллыг тохилог амины орон сууцны хороолол болгох шаардлага зайлшгүй гарч ирж байгаа юм.

 -Архитектор хүний нүдээр бус жирийн иргэний хувьд нийслэл хотын барилга байгууламжийн талаар ямар бодолтой явдаг бол?
 -Би Монголын Архитекторуудын эвлэлийн ерөнхийлөгчөөр ажилладаг. Архитекторуудын нийгэмд оролцох оролцоо маш их. Их хотыг тэд л төлөвлөж сүндэрлүүлдэг. Хотыг хөгжүүлэхэд хууль эрх зүй маш чухал. Нийслэлийн эрх зүйн тухай хууль батлагдвал хот хөгжих боломжтой. Яагаад гэвэл санхүүгийн эрх нь нээгдэх юм. Хот татвартай болно. Оршин суугчийн, хот төлөвлөлтийн татварууд хэрэгжээд эхэлбэл хөрөнгө оруулалт бүтээн байгуулалт нэмэгдэх юм. Ингэснээр хот хөгжинө.  Манай улс орон хөгжлийн зөв голдрилоороо явж байгаа гэж иргэн хүнийхээ хувьд өөдрөгөөр харж явдаг даа. Мөн нийслэл хот барилга байгууламж бодлого төлөвлөлтийнхөө дагуу хурдан амьдралд биеллээ олоосой гэсэн эрмэлзлэлтэй ажилладаг. Хот төлөвлөлтийн бодлого үйл ажиллагааны талаар хотын иргэд зөв бодит нэгдсэн ойлголттой болох нь хамгийн чухал байдаг энэ тал дээр бид хичээн ажиллаж байна. Манай байгууллагын www.cud.ub.gov.mn веб сайт  болон Хангарьд ордны 13-н давхарт байрлах  Хот байгуулалтын үзэсгэлэнг  иргэд маань үнэ төлбөргүй үзэж, мэдээлэл авах боломжтой байгаа.

- Мэдээлэл өгсөн танд баярлалаа.