2004 онос сураг нь дуудлсан, нийслэлчүүд хүсэн хүлээсэн IV амаржих газар буюу Улаанбаатар хотын эх, нялхсын төвийн шав тавих ёслол Яармагт боллоо. Ёслолд Ерөнхий сайд С.Батболд, Эрүүл мэндийн сайд С.Ламбаа, Нийслэлийн Засаг даргын орлогч Ц.Цогзолмаа болон бусад төлөөлөгчид оролцов.

Ерөнхий сайд С.Батболд “Төр засаг эрүүл мэндийн салбарт ялангуяа эмэгтэйчүүд, хүүхдийнхээ эрүүл мэндэд онцгой анхаарч ажиллаж байна. 10 аймагт тус бүр 50 ортой төрөх эмнэлэг барихаар төлөвлөж, заримынх нь барилгын ажил эхэлсэн. Өнгөрсөн жил 1 амаржих газраа шинэчилсэн. Одоо дэргэд нь өргөтгөл барин томсгож байгаа. Харин III амаржих газрыг энэ онд шинэчилж барихаар холбогдох хүмүүст үүрэг өгөөд байна.

Сүүлийн 20 гаруй жил эрүүл мэндийн салбарт ийм том хөрөнгө оруулалт бүхий цогцолбор ашиглалтад ороогүй. Монгол Улсын хүн ам сүүлийн жилүүдэд эрс өсөж байна” гэв. Тэрбээр IV амаржихыг чанартай барьж, цаг хугацаанд нь ашиглалтад өгөхийг барилгын ажил гүйцэтгэх “Нийслэл өргөө”, “Пума констракшн” компанийн удирдлагуудад анхааруулав. Ирэх оны дөрөвдүгээр улиралд ашиглалтад оруулах ёстой уг эмнэлэг нь ургийн гажиг болон хавсарсан эмгэгтэй, эх нярайг эмчлэх, сувилах 50 ор бүхий тасагтай байхаараа одоогийн бусад амаржих газраас давуутайг нийслэлийн Эрүүл мэндийн газрын эмч, мэргэжилтнүүд дурдаж байна. Тус эмнэлэг найман давхар, 300 ортой байх бөгөөд 200 ор нь хүүхэд, эхчүүдийнх. Үлдсэн нь төрөх эмэгтэйчүүдийг хэвтрүүлэх тасаг. Тус эмнэлгийг бариахад улсын төсвөөс 19 тэрбум төгрөг гаргаж буй аж.