Анх удаа орон сууцтай болох гэж байгаа бага, дунд орлоготой иргэдийг жилийн зургаан хувийн хүүтэй хөнгөлөлттэй орон сууцны зээлд хамруулах шийдвэрийг Засгийн газраас гаргаад удаагүй байгаа. Харин зээлийг хэрхэн олгох нь одоо болтол тодорхойгүй хэвээр байгаа.

Одоогоор моргейжийн зээлийг арилжааны банкаар дамжуулан олгоно гэсэн шийдвэр л гаргасан. Харин арилжааны банкуудаар олгох зээлийн хүү зургаан хувиас хэтэрвэл илүүг нь улсын төсвөөс төлөхөөр ярьж байгаа юм. Үлдсэн асуудлыг цэгцлэх шатандаа явааг албаны хүмүүс хэлж байна.

Тухайлбал, энэ асуудлыг зохицуулахтай холбогдон гарах журмыг Сангийн сайд С.Баярцогт, Зам тээвэр, барилга, хот, байгуулалтын сайд Х.Баттулга, Улаанбаатар хотын захирагч Г.Мөнхбаяр нар боловсруулах "Гэрийн даалгавар" авсан байна.

Мөн "Хүний хөгжил сан"-гаас олгох хишиг, хувийг орон сууцны зээлд хамруулах бололцоотой эсэхийг судлах үүргийг Сангийн сайд С.Баярцогт болон Нийгмийн хамгаалал, хөдөлмөрийн сайд Т.Ганди нарт Ерөнхий сайд даалгасан. Харин "Хүний хөгжил сан"-гийнхаа мөнгийг зээлд хамруулах хүсэлт гаргасан иргэнд төлбөрийн дансны бүртгэл хийхээр "Орон сууцны санхүүжилтийн корпораци"-ийнхан ажилдаа орсон гэнэ.

Мөн орон нутаг дахь захиалгыг тухайн аймаг дахь Газрын харилцаа, барилга, хот байгуулалтын газраар дамжуулан Орон сууцны санхүүжилтийн корпорацынхан нэгтгэх юм байна. Үүнээс гадна Монголын Ипотекийн корпорацид урт хугацаат зээлийн санхүүжилт олгохоор судалж байгаа аж.