Тансаг байшин гэдэг нь үнэтэй, сүүлийн үеийн засал чимэглэлтэй, олон өрөө тасалгаатай байх төдийгүй, цонхноос харагдах гадна орчин нь үгээр хэлэхийн аргагүй үзэмжтэй байдаг. Үнэхээрийн тансаг байшин нь дахин давтагдашгүй загвартай, хаанаас нь ч харсан төгс байх нь эргэлзээгүйн дээр, эзнийхээ нэр төрийн баталгаа болдог ажээ.

The World хөлөг онгоц дээрх сууц
The World нь далайн хөлөг онгоц бөгөөд аяллын сонирхолтой маршрутаараа төдийгүй, тансаг байдлаараа дэлхий даяар алдартай юм. Аварга том хөлөг онгоцны 12 давцан дээр 165 тохь тухтай өрөө болон хувийн сууцтай, тэдгээрт 12 хүртэл тооны хүн байрлах боломжтой ажээ. Сууцны талбай нь үдэшлэг зохион байгуулахад хангалттай хүрэлцэх ба хамгийн сүүлийн үеийн ахуйн техникээр тоноглогдсон галт тогоо, 14 амметр талбай бүхий сэрүүн давцантай байхаар төлөвлөгджээ. Хувийн сууц нь 13,5 сая долларын үнэтэй.

Palazzo харш
Мальтад байдаг энэ тансаг харш 500 гаруй ам метр талбайтай. Нарийн сэргээн засал хийсэн, Дундад зууны үеийн харш гадаад, дотоод засал нь үнэхээр хүний хараа булаахын сацуу амьдрахад дээд зэргийн тохь тухтай ажээ. Нэлээд хэдэн өрөөтэйн дээр зочдын сүрлэг том салон, унтлагын таван өрөө, усан сантай байна.

Middle эдлэн
Америкийн домогт кино найруулагч, «Парамаунт» кино компанийг үүсгэн байгуулагч Сесил де Миллийнх байсан Middle эдлэн Калифорнид байрладаг бөгөөд теннисийн талбайтай, наран шаралгын талбай бүхий усантай тансаг сууц төдийгүй, мал бэлчээх газар, малын пинтэй ажээ. Энэ үл хөдлөх хөрөнгө 28 сая долларын үнэтэй.

Columbus Circle дахь цогцолбор
Нью-Йоркийн Манхэттены төвд орших, Columbus Circle дахь орон сууцны нэртэй цогцолбор нь юуны түрүүнд, дээд амжилт тогтоохоор өндөр үнэтэйгээрээ алдартай. Төв цэцэрлэг рүү харсан, 743 амметр талбай бүхий барилгад угаалгын 12, унтлагын найман өрөө байдаг. Дэлхийн хамгийн үнэтэй барилгуудын нэг болох энэ цогцолбор 57,5 сая долларын үнэтэй.

Montana харш
Калифорнийн тансаг энэ үл хөдлөх хөрөнгө урьд нь домогт хөл бөмбөгчин Жо Монтанагийнх байжээ. 200 гаруй га байгалийн үзэсгэлэнт газарт байрлах Montana харш нь тийм ч том биш хэрнээ тухтай байшин, усан сан болон спа, зочдод зориулсан тусдаа жижиг байшин, сагсан бөмбөгийн талбайтай. Энэ харшийн нутаг дэвсгэрт чидун жимсний тосны ажиллагаатай үйлдвэр байдаг.

Mabrouka харш
Мароккогийн боомт Танжер хотод байдаг анхаарал хамгийн их татсан Mabrouka харш нь домогт загвар зохион бүтээгч Ив Сен Лораных байжээ. Хотоос холгүй орших, далай харагдаж байхаар барьсан энэ байшин дэлхийд нэрээ цуурайтуулсан алдартнуудад зориулагдсан аж.

Каса-де-Кампогийн харш
Испанийн барилгын A-cero компанийн барьсан Wave House харш Доминиканы Бүгд Найрамдах Улсын аялал жуулчлалын томоохон цогцолбор газар болох Каса-де-Кампод байрладаг. Далайн хажууханд байрладаг харшаас наран шаралгын газар хүртэл 300 хүрэхгүй метр зайтай. 1672 ам метр талбай эзлэн орших харш усан сан, унтлагын зургаа, угаалгын зургаан өрөөтэй. Энэ үл хөдлөх хөрөнгө 15 сая долларын үнэтэй.

Яст мэлхий уулан дээрх байшин
Tsukiji Rantei House буюу Яст мэлхий уулан дээрх байшин нь Японы Канагава мужид баригдсан тансаг харш юм. Тохь тухтай, саруул, модоор бүрэн доторлосон энэ харш үзэсгэлэнтэй цэцэрлэгээр хүрээлэгдсэн бөгөөд Японы уламжлалт уран барилгыг орчин үетэй хослуулсан хосгүй барилга ажээ. Энэ үл хөдлөх хөрөнгийн үнэ нэг тэрбум гаруй иен буюу 11,7 сая доллар гэнэ.

Porcupine Creek эдлэн
Гольф тоглох хорхойтой эрхэмд тохирох Porcupine Creek эдлэн нь Калифорнийн гольфын шилдэг талбайн жагсаалтын 13 дугаарт бичигддэг, 19 нүх бүхий гольфын өөрийн гэсэн талбайтай. Гольфын талбай нь тус эдлэн газрын цорын ганц давуу тал биш ажээ. 100 гаруй га газар, спа-салон, биеийн тамирын заал, асар том усан сантай энэ эдлэн 55 сая доллароор үнэлэгддэг байна.

Pickfair харш
Беверли-Хиллзэд байрладаг Pickfair харш Холливудын домог болсон Мэри Пикфорд, Дуглас Фэрбенкс нар оршин сууж байсан, АНУ-ын хамгийн алдартай барилгуудын нэг байжээ. Өнөөдөр ч энэ харш Америкийн хамгийн үнэтэй үл хөдлөх хөрөнгийн нэг хэвээр байна. Pickfair харш 60 сая долларын үнэтэй ажээ.