1934 онд анх байгуулагдсан АРД кино театрыг буулгаж, оронд нь олон улсын жишигт нийцсэн кино театртай, бизнесийн төв бүхий IBC /international business center/ tower - ыг барихаар төлөвлөжээ. Гэвч олон архитектор, барилгын салбарын мэргэжилтнүүд үүнд шүүмжлэлтэй хандаж байна. 

Тус барилгыг 7 дугаар сарын 15 -нд нурааж эхэлсэн ч  Нийслэлийн Мэргэжлийн Хяналтын Газраас "Тухайн барилгыг буулгах албан ёсны зөвшөөрөл гараагүй. НМХГ-аас барилгын ашиглалт, эрүүл ахуйн дүгнэлтийг гаргасан. Энэ нь барилгыг буулгах зөвшөөрөл биш.Барилгын тухай хуулийг зөрчиж байна. Иймээс барилгыг буулгах ажлыг ямар нэгэн шийдвэр гартал зогсоож, нурааж эхэлсэн барилга руу хүн орж гэмтэх эрсдэлтэй тул хашаа барина. Хяналт шалгалтын ажил үргэлжилж байна" гэсэн мэдээллийг өгсөн байна. 

Түүхээс сөхвөл АРД кино театрын зураг төслийг тэр үеийн Барилгын зураг төслийн институтад ажиллаж байсан Болгарын төрийн шагналт архитектор Хадживанев гэдэг хүн зурж, ерөнхий гүйцэтгэлийг хотын барилга трест, болгар, ЗХУ-ын мэргэжилтнүүд ажиллажээ. Тус кино театр 400 хүний суудалтай, үзвэрийн улаан, ногоон гэсэн хоёр танхимтайгаар 1966 оны 11 сард үйл ажиллагаагаа эхлүүлж байсан аж. 

Барилгын зураг төслийг тэр үеийн Социалист реалист шийдлээр хийж вакумжсан шилийг Унгар, ЗХУ-д захиалгаар хийлгэж, цагаан гантиг чулууг импортолж, Урчуудын эвлэлийн хорооныхон уламжлалт хээгээр АРД гэж бичээд гэрлээр чимэглэсэн гээд Ахмад үе маань бүгдээрээ ур ухаанаа шингээжээ. Дараа нь хотын 2 дахь том усан оргилуурыг 1972 онд урд нь байгуулсан түүхтэй.