Харагдах байдал дээр ажиллаж дууссаны дараа дотор тал буюу интерьер дизайн гээд тусдаа шинжлэх ухаан болон хөгжсөн зүйлийг бүхэлд нь ашиглахгүй ч гэсэн өөрсдийн амьдралд хэрэг болохуйц тавилга мөн дотор заслийн шийдлийг гаргуулж болно.

Нэг давхар амины орон сууцны төлөвлөсөн энэ арга мөн үргэлжлэх процесоос та бүхэн өөрсдийн төсөөллөө бодит болгох эскиз зураг буюу анхны загвар зургийн үе шатыг бага ч болов ойлгож авсан гэж найдаж байна. Тухайн төлөвлөлт нь анх төсөөлөхдөө гурван унтлагын өрөөтэй хувийн сууц 100м2-аас бага төлөвлөгдөхгүй гэсэн ойлголтийг бүрэн өөрчилж 72м2-д багтаан төлөвлөсөн байгааг та дахин нэг нягтлаад үзээрэй. 

Одоогийн байдлаар зах зээл дээр эрчим хүчний хэмнэлттэй амины орон сууцны 1м2 үнийг дундаж үнэ 2,8 сая төгрөг байна. Өмнө нь иргэд 100м2-аас доош 3-н унтлагын өрөө багтдаг гэж үздэг байсан хандлагатай 72м2-ыг харьцуулбал 28м2 шаардлагагүй орон зайг хэмнэсэн байна. Үүнийг одоогийн дундаж өртөгөөр бодож үзэхээр 78,400,000 төгрөг бодитоор хэмнэсэн байна. Ийм аргаар төлөвлөлтөө улам илүү оновчтой болгож чадсанаар гурван унтлагын өрөөтэй амины орон сууцыг 65м2-д багтаасан байна.

Нэг давхар барилгын давуу тал бол зардал хэмнэх боломжууд байгаагаас угсрах өрөх хаших хийцийг хялбарчлах байдлаар нэг маягийн зураг төслийн дагуу хэв хашмал захиалан үйлдвэрлүүлж захиалагчийн газар дээр нь байшин үйлдвэрлэх боломжтой болгон боловсруулж болдог байна.

Хоёр давхар сууцны төлөвлөлтийн жишээ 

Хоёр давхар барилга төлөвлөж байгаа тохиолдолд шатны орон зай, давхар дундын хучилт гээд нэмэлтээр зайлшгүй төлөвлөгддөг орон зай байдгийг дурдах нь зүйтэй юм. 

Амьдрахад шаардлагатай орон зайгаа төлөвлөхдөө дөрвөлжин дэвтэрийн 2 нүдийг 1м гэж тооцож зурахаас илүүтэй 1000 масштабтай шугам ашиглах эсвэл хамгийн сонирхолтой байдлаар төлөвлөх арга нь шугамын 1см-ыг 1м гэж тооцоод жишээ нь 4м-тэй 6м-тэй зочны өрөөгөө хатуу кардон цаасан дээр буулгаад түүнийг хайчлан дүрс болгон авна. Ийм байдлаар дараагийн өрөөнүүдийн хэмжээгээ тодорхойлоод дөрвөлжин дүрс болгоод хүссэн байрлалдаа зөөж байрлуулан бодит амьдрал дээр хэрхэн тохирч байгааг одоо амьдарч байгаа өрөөнийхөө хэмжээтэй харьцуулан тооцох нь маш үр дүнтэй байдаг. Энэ аргаа илүү бодитоор төсөөлж гэр бүлээрээ эвлүүлдэг тоглоом тоглож байгаа юм шиг, маш сонирхолтой аргаар өөрийн төсөөллөө бодит болгох ажлыг эхлүүлээрэй. 

Нэгдүгээр давхар

Зочны өрөө: Гэр бүлийн бүх гишүүд оролцож зочны өрөөнд юу юу байж болох талаар ярилцаарай.

Гал тогоо: Гал тогоонд гэр бүлийн гишүүдээс ихэнх цагийг хоол унд хийхээр өнгөрүүлдэг хүнтэйгээ маш сайн ярилцах байдлаар орон зайг нь төлөвлөж өгөх нь оновчтой юм.

Ариун цэврийн өрөө: Нэг давхарт ариун цэврийн өрөө төлөвлөхдөө шатны зайд хамааруулан байрлуулах илүү оновчтой. Учир жижиг өрөө төлөвлөх шаардлага гарах учраас босоо душ, угаалтуур, суултуур зэргийг төлөвлөх нь оновчтой. 

Шатны хэсэг: Хоёр давхар барилга төлөвлөж байгаа тохиолдолд шатны орон зайлшгүй төлөвлөгддөг гэдгийг дээр дурьсан. Харин шатны хөндий орон зайд техникийн өрөөг төлөвлөж өгөх оновчтой юм. Үүн дээр нэмээд автомат угаалгын машин, мөн шатны хэсэгт сэтгүүлийн ширээ, номын тавиуртай ном унших хэсэг, кофе уух жижиг сандал ширээ байрлуулж болно. Шатны хэсгийг хаана байрлуулж байгаагаас хамаараад янз бүрийн хэлбэрээр төлөвлөж болно.

Үүдний өрөө: Эрчим хүчний хэмнэлттэй амины орон сууцанд гонх зайлшгүй төлөвлөх шаардлагатай учраас үүдний өрөөг төлөвлөж гонхны асуудлыг шийдэх илүү давуу талтай байдаг. Үүдний өрөөнд гадуур хувцас өлгөх шкаф, сандал, гутлын шүүгээ гэх мэт зүйлсийг төлөвлөнө. Үүдний өрөө нь гаднаас шууд зочны өрөө рүү орох хэсгийг хязгаарлаж өгдгөөрөө давуу талтай. 

Нийт 5 ширхэг дүрсээр энэ хаусын нэг давхрыг төлөвлөсөн нь шаардлагагүй орон зайг авч хаяад хамгийн бага метр квадратад багтаах зорилгоор төлөвлөж байна. Хоёр дугаар давхрын хэмжээс нь нэгдүгээр давхар дээр байрлах учраас ижил хэмжээтэй төлөвлөгддөг. Шаардлагатай тохолдолд  нэг давхрын хэмжээнээс илүү гарган пандустай давхрыг төлөвлөх боломжтой. Ийм тохиолдолд хүчитгэх зүрхэвч, даацын багана, дам нуруу зэргийг төлөвлөнө. Мэргэжлийн барилга бүтээцийн инженертэй зөвшилцөх нь танд амар байх болно.

Хоёрдугаар давхар

Унтлагын өрөө 1:   Хоёр давхарт аав ээжийн өрөө ихэвчлэн том төлөвлөгддөг. Хоёр хүний нэг том ор байх орон зайг тооцдог ураас орон зайг бусад унтлагын өрөөнөөс том төлөвлөж өгдөг. Өргөн хоёр хүний ор, ханын ширээ, шкаф гээд бусад хэрэгцээтэй тавиур, тавилга зэргийг төлөвлөнө.

Унтлагын өрөө 2:   Мэдээж хоёр давхарт төлөвлөгдөх унтлагын өрөөний нэг нь айлын ууган хүүхдийн өрөө байж таардаг. Нэг ор, ханын ширээ, шкаф гээд бусад хэрэгцээтэй тавиур, тавилга зэргийг төлөвлөнө. Нэмэлтээр хоёр охин, хоёр хүүгийн өрөө болгосон тохиолдолд давхар ор төлөвлөхдөө хоёр хүүхдийн орон зайд тохируулан, тусгайлан зориулж тавилгын дизайн гарган хийх нь оновчтой байдаг.

Унтлагын өрөө 3: Дараагийн хоёр давхарт төлөвлөгдөх унтлагын өрөөний нэг нь айлын дундах болон отгон хүүхдийн өрөө байж таардаг. Нэг ор, ханын ширээ, шкаф гээд бусад хэрэгцээтэй тавиур, тавилга зэргийг төлөвлөнө. Нэмэлтээр хоёр охин, хоёр хүүгийн өрөө болгосон тохиолдолд давхар ор төлөвлөхдөө хоёр хүүхдийн орон зайд тохируулан, тусгайлан зориулж тавилгын дизайн гарган хийх нь оновчтой байдаг.

Ариун цэврийн өрөө: Хоёр давхарт төлөвлөж байгаа ариун цэврийн өрөөг банн болон бусад зүйлс багтах орон зайг төлөвлөж өгөх учраас том төлөвлөгддөг гэхдээ оновчтой байдлаар байрлуулах хэрэгтэй.

Шатны хэсэг: Хоёр давхарт гарах шатны хэсэгт цонхыг барилга гэрэл оруулах зорилгоор цэлгэр, том төлөвлөх хэрэгтэй. Ингэснээр эрчим хүчний хэмнэлттэй байх болно. 

Нэг давхартаа нэмэлтээр террас, гарден зэргийг төлөвлөх боломжтой.

Хоёр давхрын террасны дээд хэсгийг пандус гарган хоёр давхарт төлөвлөгдөж байгаа унтлагын өрөөний ханыг догол гаргахгүйгээр шулуун болгож хийсэн байна.

Харагдах байдал

Энэ 2 давхар барилга нь 80м2 хаус юм. Мөн л иргэдийн дунд 2 давхар амины орон сууц төлөвлөж байгаа тохиолдолд 110-120 метрквадратаас бага байх боломжгүй гэдэг ойлголт байдаг. Бага дунд орлоготой иргэдийн хувьд тансаг зэрэглэлийн дизайны орон зайн төлөвлөх гэхээсээ илүүтэй барилгын өртөгийг бууруулах тал дээр илүү анхаарал хандуулж шаардлагагүй илүү орон зайг байхгүй байхаар тооцож төлөвлөх нь хамгийн чухал юм. Ингээд хэмнэсэн зай маань 30м2 гэж тооцвол, одоогийн эрчим хүчний хэмнэлттэй амины орон сууцны 1м2-ын дундаж үнээр бодож үзье. Бид зөв хэмнэлт хийж, оновчтой төлөвлөсөнөөр  84,000,000 сая төгрөг хэмнэж чадсан байгааг ойлгох болно. 

Бид энэ зарчмаар бага дунд орлоготой иргэдийг санхүүгийн дарамтгүйгээр орон байртай болгох ажлыг улам эрчимжүүлж, төрөөс дэмжих бодлогуудыг гаргаж, ногоон зээлийн санхүүжилт болон ипотекийн амины орон сууцны зээлээр иргэд өөрийн газар, хашаандаа буюу гэр хороололд утаа гаргахгүй, хөрсний бохирдол үүсгэхгүй, ядуурлаас ангижруулах санхүүгийн шийдлүүдийг бий болгох цаг нь болсон. 

 Өмнөх нийтлэлийг унших бол ЭНД ДАРНА уу