“Монголын барилгын үндэсний ассоциаци” ТББ нь 2009 онд байгуулагдсан цагаасаа хойш гишүүдийнхээ хууль ёсны эрх, ашиг сонирхлыг төлөөлж тэдний дуу хоолойг Монгол Улсын барилгын салбарын төрийн бодлогод тусгуулахаар чармайн ажиллаж ирлээ. 

“Монголын барилгын үндэсний ассоциаци”-ийн гишүүнчлэлийн хүрээ жилээс жилд өргөжиж, одоогоор эгнээндээ 160 гаруй барилга, бүтээн байгуулалтын салбарт идэвхтэй үйл ажиллагаагаа явуулж буй барилгын салбарыг тэргүүлэгч томоохон хөрөнгө оруулагч, үл хөдлөх хөрөнгийн хөгжүүлэгч, реалтор, барилга угсралт, архитектур, зураг төсөл, барилгын материалын үйлдвэрлэгч, ханган нийлүүлэгч чиглэлийн 160  гаруй бүртгэлтэй компаниудын үндэсний бүтээн байгуулагчид болон дэмжигч байгууллагуудыг сайн дурын үндсэн дээр нэгтгэж, гишүүддээ болон нийгэмд үйлчлэхээс гадна төрийн зарим чиг үүргийг буюу “Барилга байгууламжийн зураг төсөл боловсруулах, барилгын ажил гүйцэтгэх, өргөх байгууламж, түүний эд ангийн үйлдвэрлэл, угсралт, засвар, үйлчилгээ эрхлэх хуулийн этгээдэд тусгай зөвшөөрөл олгох” үйл ажиллагааг Барилга, хот байгуулалтын Сайдын тушаал, Барилга, хот байгуулалтын яамтай байгуулсан гэрээний үндсэн дээр барилгын салбарын бусад мэргэжлийн ТББ-уудын түншлэлийн хамтаар гүйцэтгэн хэрэгжүүлж байгаа салбарын мэргэжлийн, манлайлагч, олон улсын хэмжээнд хүлээн зөвшөөрөгдсөн хамгийн том нэгдэл болох ТББ болсон байна. 

Ассоциацийн 2019 онд зохиогдсон бүх гишүүдийн ээлжит 4-р чуулганаас хойших 3 жилийн хугацаанд бид МБҮА ТББ-ын “Стратеги төлөвлөгөө 2020-2024”-г баталж, үүний дагуу үйл ажиллагаагаа төлөвлөгөөний дагуу амжилттай хэрэгжүүлсээр ирлээ. 

Тус ассоциаци нь 2018 оноос БХБЯ-тай гэрээ байгуулсны үндсэн дээр Барилгын тусгай зөвшөөрөл олгох үйл ажиллагааг салбарын түншлэгч ТББ-уудтай хамтран 5 дахь жилдээ амжилттай хэрэгжүүлэн ажиллаж байна. 

Түүнчлэн, “Зөвшөөрлийн тухай”, “Худалдааны тухай”, “Төр-хувийн хэвшлийн түншлэлийн тухай”, “МҮХАҮТанхимын тухай”, “Мэргэжлийн холбооны эрх зүйн байдлын тухай”, Тендерийн тухай хуулиудын төсөл болон барилгын норм, дүрмүүдийн төсөлд гишүүдээс санал өгөх ажлыг зохион байгуулж, барилгын тусгай зөвшөөрлийн журмыг шинэчлэн батлуулж, 2021.07.01-ний өдрөөс эхлэн барилгын тусгай зөвшөөрлийн цахим системийг төрийн мэдээлэл солилцооны системүүдтэй холбон бүрэн цахимжуулж, энэ үйл ажиллагааг түргэн шуурхай, ил тод, хүний оролцоог багасган хэрэгжүүллээ. Эдгээр ажлууд нь Салбарын бодлогыг тодорхойлоход Ассоциацийн үүрэг, оролцоог улам нэмэгдүүлж байгааг илэрхийлж  байна. 

Цар тахлын хүнд үед УИХ, Засгийн газар, УОК, салбарын яам зэрэг байгууллагуудад  тулгамдсан асуудлыг шийдвэрлүүлэхээр санал хүсэлтээ албан бичгээр хүргүүлж, энэ хүрээнд байгуулагдсан “Ажлын хэсэг”-ийн бүрэлдэхүүнд төлөөллөө оруулан ажилласны зэрэгцээгээр МҮХАҮТанхим, Монголын Бизнесийн зөвлөлтэй хамтран гишүүдийнхээ дуу хоолойг төр, засагт хүргэн ажиллалаа. Мөн бид БХБЯ-аас зохион байгуулсан “Барилгын чанарын улсын зөвлөгөөн”, салбар зөвлөгөөнүүдэд оролцож өөрсдийн саналаа илэрхийлэн ажиллалаа. 

Үүний зэрэгцээгээр бид олон улсын байгууллагууд болох ЖАЙКА-гийн “Барилгын салбарын хөдөлмөрийн аюулгүй байдлын менежментийн чадавхыг бэхжүүлэх төсөл”-ийн 1-р үе шатыг амжилттай хамтран хэрэгжүүлж дуусгалаа. Мөн, Франц Улсын Жэрэс Монгол ОУ-ын ТББ болон бусад түншлэгчидтэй хамтран Европын холбооны санхүүжилттэй “Дулаан шийдэл” төслийн 1-р үе шатыг амжилттай хэрэгжүүлэн дуусгаж, 2 дахь үе шатыг 2022-2026 онуудад дахин хэрэгжүүлж эхэлсэн сайхан мэдээтэй байна. 

Мөн Германы олон улсын хамтын ажиллагааны нийгэмлэгийн “Ур чадварыг дээшлүүлэх нь” төслийн санхүүжилтээр “Барилгын салбарын ажлын байрны цахим систем”-ийг бий болгон ашиглалтад орууллаа.

Ассоциацийн нийгмийн ажлын хүрээнд “СЭТГЭЛИЙН ДЭМ” хандивын аяныг зохион байгуулж, Ассоциацийн нийт гишүүд болон хамт олны зүгээс 5 сая ₮-ийн мөнгөн хандивыг БНХАУ-аас Монгол Улсад суугаа Элчин сайдын яаманд цар тахалтай тэмцэхэд нь, 3 сая ₮-ийн мөнгөн хандивыг ОБЕГ-т галын түймэртэй тэмцэхэд нь тус тус гардуулан өгсөн.

Улмаар бид Ногоон барилгын үнэлгээний систем “EDGE”-г Монгол Улсад нэвтрүүлэхээр энэ сэдвийн хүрээнд салбарынхаа 200-аад төлөөллийг хамруулсан семинарыг амжилттай зохион байгууллаа. БХБ-ын Дэд сайдын ахалсан “Ногоон барилгын зөвлөл”-ийн “Ажлын хэсэг”-ийн бүрэлдэхүүнд манай Ассоциацийн төлөөлөл орж, тус зөвлөлийн чиг үүргийг гүйцэтгэх төрийн бус байгууллагыг байгуулах, ногоон хот байгуулалт, ногоон барилгын чиглэлээр үйл ажиллагаа, оролцоогоо нэмэгдүүлэн ажиллаж байна. 

Ассоциаци нь 19 орны барилгын ассоциациудыг эгнээндээ нэгтгэсэн Ази, баруун номхон далайн Гэрээлэгчдийн ассоциациудын Олон улсын нийгэмлэг (IFAWPCA)-т 2015 онд гишүүн орноор элсэн 2018 онд Удирдах зөвлөлийн гишүүнээр сонгогдож, тус бүс нутгийн барилгын гэрээлэгч байгууллагуудтай мэдээлэл солилцон хамтран ажиллаж байна. Энэ ажлын хүрээнд Олон улсын Зөвлөх инженерүүдийн нийгэмлэг (FIDIC)-тэй хамтран Ассоциацийн гишүүн байгууллагуудыг хамруулсан судалгааг хийснээр Монгол Улсын барилгын салбарт ФИДИК-ийн гэрээг нэвтрүүлэх, нутагшуулах ажилд манлайлан оролцохоор ажиллаж байна. 

Өнгөрсөн хугацаанд МБҮА ТББ-ын гишүүн байгууллагууд нь өөрсдөө болон хамтран ажиллагч гэрээт, туслан гүйцэтгэгч, ханган нийлүүлэгч байгууллагуудтайгаа хамтран нийт 30 гаруй мянган ажлын байрыг бий болгож, Монгол Улсад өнөөдөр хийгдэж байгаа нийт бүтээн байгуулалтын 80 орчим хувийг хийж гүйцэтгэсэн нь бидний бахархал болж байна.

Эдгээр олон ажлыг өнгөрсөн 3 жилийн хугацаанд бид амжилттай хийж гүйцэтгэж, Ассоциаци нь Монгол Улсад үйл ажиллагаагаа явуулж байгаа чадварлаг ТББ-уудын нэг нь болж, Монголын Үндэсний худалдаа, аж үйлдвэрийн танхимаас “САЙН ЗАСАГЛАЛЫГ ХЭРЭГЖҮҮЛЭГЧ ЭНТРЕПРЕНЁР”-оор шалгарч 2021 оныхоо ололт амжилтыг дүгнүүлсэн онцлох үйл явдал болон өнгөрлөө. 

Энэ удаагийн бүх гишүүдийн ээлжит 5-р чуулганы хуралдаанаар МБҮА ТББ-ын 2019-2021 оны үйл ажиллагааны тайланг танилцуулж дүгнэх, Ассоциацийн Дүрмийн нэмэлт, өөрчлөлтийг хэлэлцэн батлах, Ассоциацийн Удирдах зөвлөл, Хяналтын зөвлөлийн гишүүдийг Бүх гишүүдээсээ сонгон батламжлах, шинэчлэн сонгогдсон Удирдах зөвлөлийн гишүүдээс Ассоциацийнхаа Ерөнхийлөгч, Тэргүүн дэд ерөнхийлөгч, Дэд ерөнхийлөгч нарыг сонгох болно.