Улаанбаатар хотын дулаан хангамжийг сайжруулах, шинэчлэн өргөтгөх ажлын хүрээнд 2022 онд томоохон төсөл хөтөлбөрүүд хэрэгжүүлэхээр төлөвлөсөн бөгөөд Европын сэргээн босголт, хөгжлийн банк болон дэлхийн банкны санхүүжилтээр 2021 оноос 3, 4, 5, 8 -р гол магистраль шугамуудыг үе шаттайгаар өргөтгөн шинэчлэхээр ажиллаж байна. Эдгээр шугамын насжилт хэтэрч өвлийн оргил ачааллыг даахгүй болсноос үүдэн дулаан хангамж доголдох, тасалдах асуудлууд гарч байгаа тул 2025 он хүртэл зээлийн хөрөнгөөр санхүүжүүлэн бүрэн шинэчлэх юм. Мөн 2022-2023 оны өвөлжилтийн бэлтгэлийг хангах ажлын хүрээнд засвар үйлчилгээ, нягтын шахалт, туршилтуудыг гол магистраль шугамуудад хуваарийн дагуу хийхээр төлөвлөн 05 дугаар сарын 01 нээс эхлэхээр бэлтгэл ажлаа хангасан байна. Шугам засварт зогсох хугацааг богино байхаар зохицуулсан ба шинээр солигдох, өргөтгөх шугамуудын ажлын эзлэхүүнээс хамаарч зогсох хугацаа өөр өөр байна. Айл өрхийн хэрэгцээний халуун усыг хязгаарлах хугацааг урьдчилан төлөвлөсний дагуу тухайн засвар хийгдэхээс 7 хоногийн өмнө олон нийтийн сүлжээ болон цахим хуудсаар дамжуулан мэдээлэх ба дэлгэрэнгүй мэдээллийг  шуурхай албаны 7004-7005 тоот утсаар лавлах боломжтой.

ЕСБХБанкны санхүүжилтээр “УЛААНБААТАР ХОТЫН ДУЛААНЫ ХАНГАМЖИЙН ҮР АШГИЙГ НЭМЭГДҮҮЛЭХ ТӨСӨЛ” хөтөлбөрийн хүрээн хийгдэж буй гол шугамуудыг солих, өргөтгөх ажил 2022 оны 05 дугаар сараас үргэлжлэх ба уг засварын ажлын эзлэхүүнээс хамааран харьяалалын дагуу хэрэглэгчдийн хэрэгцээний халуун усыг хязгаарлах хугацаа харилцан адилгүй байна. 2021 онд 8 дугаар магистралийн үндсэн 4 багц ажлаас 3 багц ажил нь бүрэн хийгдэж дууссан бөгөөд энэ онд 8Б магистралийн /зураг/ 0.68км хос шугамын ажлыг гүйцэтгэж дуусгах төлөвлөгөөтэй ажиллаж байна.