Барилгын салбарт мэргэжилтэй ажиллах хүчний эрэлт өндөр байна
Хөдөлмөр, нийгмийн хамгааллын судалгааны институтээс гаргасан Хөдөлмөрийн зэх зээлийн эрэлтийн барометрийн судалгаагаар барилгын салбарт 2022 онд Барилгын салбарт 11.5 мянган ажиллах хүчний эрэлт бий болох нь нийт эрэлтийн 14.7 хувийг эзэлж байгааг харуулсан байна.
Ажиллах хүчний энэхүү эрэлтийг хангах зорилгын хүрээнд Барилга, хот байгуулалтын яам, Боловсрол, шинжлэх ухааны яам, Барилгын политехникийн коллеж, Монголын барилгын үндэсний ассоциаци, Монголын барилгын гүйцэтгэгч байгууллагуудын холбоо 2022 оны 4 дүгээр сарын 19-ны өдөр Монголын Үндэсний Олон нийтийн Телевизийн төлөөллүүдтэй уулзлаа.
Уулзалтаар талууд Монголын Үндэсний Олон нийтийн Телевизийн санаачилсан барилгын салбарын түгээмэл болон нэн эрэлттэй мэргэжлүүдээр сурч буй оюутан залуусыг дэмжих, салбарын мэргэжлүүд, хөдөлмөрийн үнэ цэнийн талаарх мэдлэг ойлголтыг түгээх, сурталчлах, ажилтан, ажил олгогч хоёрыг холбох, өсвөр үеийнхэнийг мэргэжлээ зөв сонгоход чиглүүлэх нийгмийн зорилтот төсөл, реалити шоу хийх, цаашдын хамтын ажиллагааны талаар ярилцлаа.
Хөгжлийн гол тулгуур бол “АЖИЛЛАХ ХҮЧ” бөгөөд тэрдундаа барилгын салбарын мэргэжил, инженер техникийн ажилтнуудыг олноор бэлтгэж, тогтвор суурьшилтай ажиллуулах, тасралтгүй чадавхжуулах нь Улс орны бүтээн байгуулалтад онцгой ач холбогдолтой гэдэг дээр талууд санал нэгдэж, энэ чиглэлээр хамтын ажиллагаагаа уялдуулж, ажиллахаар тогтлоо.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.