"Хөгжлийн бэрхшээл ба тэгш байдал" сэдэвт сургалт болов
Хөгжлийн бэрхшээлийг хүний эрхийн загвараар харж тодорхойлох, саадгүй хүртээмжтэй орчин нөхцөл бүрдүүлэх, бүх хүний амьдарч болох нийгмийг хэрхэн бий болгох тухай мэдлэг ойлголтыг өгөх зорилготой “Хөгжлийн бэрхшээл ба тэгш байдал” сэдэвт сургалтад Барилга, хот байгуулалтын яамны албан хаагчид /2022.4.05/ хамрагджээ. Сургалтыг Барилга, хот байгуулалтын яам, Хөдөлмөр, нийгмийн хамгааллын яамтай хамтран 2022.04.05-ны өдөр зохион байгуулав. Сургалтаар Хөдөлмөр нийгмийн хамгааллын яамны Хөгжлийн бэрхшээлтэй иргэний хөгжлийн хэлтсийн дарга Б.Нарангарав, тус яамны хөгжлийн бэрхшээлтэй иргэдийн хууль тогтоомж, нийгмийн оролцооны асуудал хариуцсан мэргэжилтэн Б.Болороо нар “Хөгжлийн Бэрхшээл гэж юу вэ?”, “Хөгжлийн бэрхшээлийг ялгаатай бус хэрхэн тэгш байдал болгох вэ?” “Хөгжлийн бэрхшээлтэй иргэдийн өмнө тулгамдаж байгаа саад тотгоруудыг шийдвэрлэсэн сайн туршлагууд” “Манай улсын өнөөгийн нөхцөл байдал”, “Шийдвэрлэх санаанууд” зэрэг сэдвийн хүрээнд илтгэл тавьж, мэдээлэл өглөө.
ХНХЯ-ны хөгжлийн бэрхшээлтэй иргэдийн хууль тогтоомж, нийгмийн оролцооны асуудал хариуцсан мэргэжилтэн Б.Болороо “Хөгжлийн бэрхшээл” гэдэг нь өөрчлөгдөн хувьсаж байдаг ойлголт бөгөөд нийгмийн амьдралд бусдын нэгэн адил бүрэн дүүрэн чөлөөтэй оролцоход саад тотгор учруулахуйц нийгмийн хандлагын болон орчны хязгаарлалтаас үүдэн бий болж байгааг улс орнууд хүлээн зөвшөөрөх болсныг онцлов. Мөн тэрээр сургалтын үеэр “тусгай хэрэгцээ” гэдэг нэр томьёог бодлогын баримт бичиг болон бусад хэрэгцээнд ашиглахгүй байхыг хүслээ. Түүнчлэн хөгжлийн бэрхшээлтэй иргэдийн өмнө "Биет саад", "Хандлагын саад", "Нийгмийн саад", "Мэдээллийн саад" гэсэн 4 төрлийн саад тулгарч байгааг жишээ баримтаар үзүүлж, хүртээмжтэй орчин, нөхцлийг бүрдүүлж чадвал хөгжлийн бэрхшээл гэдэг ойлголтоос ангид байх боломжтойг тэмдэглэв.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.