Архитектур сонирхогчид, уншигчдадаа зориулан түүхийн мэдлэг олгох зорилгоор архитектурын түүхийн талаарх нийтлэлийг цувралаар хүргэсээр хамгийн сүүлийн буюу 11 дэх нийтлэл болох Байгаль орчинд ээлтэй архитектурын талаар танилцуулж байгаадаа таатай байна. 

1950 онд 2,5 тэрбум байсан дэлхийн хүн ам өнөөдрийн байдлаар 7,8 тэрбумд хүрсэн бол 2050 онд 9,7 тэрбумд хүрэх тооцоо байна. Мөн техник технологи, үйлдвэрлэл хөгжихийн хэрээр хувьсгалын түвшинд хүрч аж үйлдвэрийн II хувьсгалын /1850-иад он/ үед төмөрлөгийн болон бусад хүнд үйлдвэр ихэд хөгжсөнөөр байгаль орчны бохирдол эрс нэмэгдсэн байна. Улмаар дэлхийн хүн амын өсөлт, хэт нягтарсан хотжилт, хүнд үйлдвэрийн сөрөг үр дүнд эко хот, байгаль орчинд ээлтэй архитектур гэсэн хэв маяг, ойлголт зайлшгүй бий болсон. Энэ агуулга 16-18-р зууны үеэс гарч байсан бөгөөд 1898 оны Эбэнэзэр Ховардын цэцэрлэгт хот /garden city/ нь ногоон хотын алдартай загвар, концепц юм. 

Мөн дэлхийн II дайны дараагаас олон улс дамнасан сэргээн босголтын нүсэр үйлдвэржилтээс шалтгаалсан байгаль орчны сөрөг нөлөө, эрчим хүчний зохисгүй хэрэглээ болон авто машины хэт их хэрэглээнээс үүссэн агаарын бохирдлыг бууруулах зорилгоор шинэ хотжилт /new urbanism/ гэсэн үзэл баримтлал АНУ-д гарч эхэлсэн байна. Энэ нь нийтийн орон зайг нэмэгдүүлэх зөв төлөвлөх, ногоон буюу тогтвортой барилгыг төлөвлөх, уялдуулах, авто машиныг багасгаж нийтийн эрүүл мэндэд анхаарах агуулга юм. 

Тогтвортой /sustainable/ буюу байгаль орчинд ээлтэй архитектур нь эко ногоон хот, тогтвортой /sustainable/ буюу ногоон барилга /green building/ гэсэн ойлголтыг багтаана. Ногоон барилгын нарийн боловсронгуй зэрэглэл тогтоох үнэлгээний систем нь 1990 оны үеэс Европ болон Америк тивд бий болж улмаар 2000 оноос Азийн орнуудад эрчимтэй хэрэгжиж байна. 

Эко, ногоон хот нь нийгмийн, эдийн засгийн, хүрээлэн буй орчны таатай нөхцөлийг бүрдүүлэх цогц агуулга юм. 

Тогтвортой архитектур нь барилгын эрчим хүчний үр ашгийг нэмэгдүүлэх, барилгын салбараас үүсэх байгаль орчинд нөлөөлөх сөрөг нөлөөллийг бууруулах агуулга юм. 

Ногоон барилга нь дараах гол онцлогуудтай байна.

• Сэргээгдэх эрчим хүчийг ашиглах /нар болон салхины эрчим хүч, газрын гүний дулаан/
• Архитектур төлөвлөлт /газрын байршлыг зөв сонгох, салхи болон дуу чимээг барилгын байршил, ландшафт төлөвлөлттэй уялдуулах, барилгад нарны гэрэлтүүлгийг зөв оновчтой тусгах, шийдэх, барилгын эзлэхүүн, хэлбэр-орон зайн оновчтой төлөвлөлт/
• Инженерийн шугам сүлжээний оновчтой шийдэл
• Барилгын материал ба материалын дахин ашиглалт, дулаан техник
• Барилгын ашиглалтын үеийн болон буулгах үеийн эдийн засгийн хэмнэлт
• Барилгын дэвшилтэт технологи  

Дэлхийн ногоон барилгын зөвлөлийн /world green building council/ тодорхойлсноор ногоон барилга нь:

• Эрчим хүчний болон усны хэрэглээний үр ашигтай байдал
• Сэргээгдэх эрчим хүчний ашиглалт, тухайлбал нарны эрчим хүч
• Бохирдол болон хог хаягдлыг бууруулах, дахин ашиглах
• Дотор агаарын чанар
• Барилгын материал ямар нэг сөрөг нөлөөгүй байх
• Загвар дизайн, барилга байгууламж болон түүнтэй холбогдох үйл ажиллагаанд хүрээлэн буй орчныг тусган үзэх
•  Загвар дизайн, барилга байгууламж болон түүнтэй холбогдох үйл ажиллагаанд оршин суугчдын амьдралын чанарыг тусган үзэх
• Аливаа загвар дизайн, зураг төсөл хүрээлэн буй орчны өөрчлөлттэй дасан зохицох чадамжтай байх

Ebenezer Howard-Цэцэрлэгт хот 1898

Ногоон хотын жишээ

Мадрид, Испани

Ванковер, Канад

Амстердам, Голланд

Сингапур хот улс

Ногоон барилгын жишээ

Эмпайр стэйт бюлдин, Нью Иорк

Ванковер конвеншин центр, Канад 

Фэйсбүүк оффис, АНУ

Паркрояал зочид буудал, Сингапур

Бахрейн дэлхийн худалдааны төв /салхины эрчим хүчээр нийт эрчим хүчний хэрэглээний 15хувийг шийдсэн / 

Сингапур үндэсний цэнгэлдэх хүрээлэн. /88000 ширхэг нарны хавтангаар эрчим хүчний хэрэглээгээ бүрэн шийдсэн/

Фукуока мужийн  олон улсын хурлын танхим, Япон