Дотоодын барилгын материал үйлдвэрлэгчдийг бодлогоор дэмжинэ
Хуралдаанаар Шадар сайдын өгсөн үүрэг чиглэлийн дагуу Барилга, хот байгуулалтын яам болон Зам, тээврийн хөгжлийн яамны хамтарсан ажлын хэсгийнхэн барилгын материалын жилийн хэрэгцээ, шаардлагын судалгааг гаргаж цаашид нөөц бүрдүүлэхэд авах арга хэмжээний талаар тайлагнасан юм.
2020, 2021 оны хэрэглээг харьцуулан судалахад энэ онд барилгын материалын хэрэгцээ өсөх хандлагатай байгаа аж. Тухайлбал, арматурын төмрийн хэрэглээ 10-20 хувиар өсөх төлөвтэй байгаа юм байна. Үүнийг дагаад барилгын материалын үнэ цаашид ч өсөх хандлага ажиглагдаж буйг хэллээ. Энэ жил худалдан авах, тендер зарлах, сонгон шалгаруулах ажил эрт эхэлсэнтэй холбоотойгоор барилга угсралтын ажил ч эрт эхлэнэ хэмээн тооцож буй аж. Тиймээс холбогдох албаныхан нөөц бүрдүүлэлтийн ажилд анхаарч ажиллаж буй. Хилийн боомтын чингэлэг тээвэр нэвтэрч эхэлсэнтэй холбоотойгоор арматурын төмрөөс бусад материалын нөөц хангалттай байгааг холбогдох албаныхан хэлсэн юм. Харин арматурын төмрийг чингэлэг тээвэрт ачих боломжгүй байгаа бөгөөд үүнд анхаарч ажиллах шаардлагатай байгаа гэлээ.
Хуралдаанаар Шадар сайд С.Амарсайхан дараах үүрэг, чиглэлүүдийг өгсөн юм. Барилгын материалын татан авалтыг сайжруулах, үнийн хөөрөгдлийг бууруулах, нөөц бүрдүүлэх ажлыг онцгойлон анхаарч ажиллах үүргийг БХБЯ, ЗТХЯ-ны ажлын хэсгийнхэнд анхааруулж, энэ нь хаврын бүтээн байгуулалтын ажилтай шууд холбоотой тул анхаарч ажиллахыг үүрэг болгосон юм. Мөн дотоодын барилгын материалын үйлдвэрлэлийг тууштай бодлогоор дэмжих, зарим тохиолдолд хөнгөлөлтөд хамруулах бодлого боловсруулж Засгийн газрын хуралдаанд яаралтай оруулах ажлыг үүрэг болголоо.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.