Архитектур сонирхогчид, уншигчдадаа зориулан түүхийн мэдлэг олгох зорилгоор архитектурын түүхийн талаарх нийтлэлийг цувралаар хүргэдэг. Энэ удаад Готик архитектурын талаар буюу 8 дахь цувралаа танилцуулж байна. 

Готик архитектур нь Европт 12-16-р зуунд өндөр хөгжсөн хэв маяг бөгөөд 17-18-р зуун хүртэл зарим газар үргэлжилсээр байв. Францад өндөр хөгжсөн бөгөөд Роман /хагас дугуй хэлбэрийг байгуулалт болон бүтээц, архитектурын элементүүдэд голчилсон хэв маяг/ болон сэргэн мандалтын архитектурыг /эртний Грек, Ромын сонгодог архитектурын хэв шинжийг хослуулж тэгш хэм, зохистой харьцаа, геометрийн зөв хэлбэрийг чухалчилсан 14-16-р зууны хэв маяг/ үргэлжлүүлэн сонгодог архитектурын хэв шинжтэй хослуулан өөрийн онцлог дараах гол шинжүүдийг цогцлоосон байна.

1. Нуман хэлбэр-Pointed arch  /хаалга, цонх, гэх мэт олон элементүүдэд/

2. Нуман хавиргат дам нуруу бүхий орон зайн хучилт-Rib vault

3. Хажуугийн тулгуур-Flying buttress 

4. Өнгөт шил-Stained glass /трашери, сарнай цонх гэх мэт элементүүдэд/

5. Тэнгэрт тэмүүлсэн шовх орой-Spire

Тэнгэрт тэмүүлсэн шовх орой нь шашны бэлгэдэлтэй ч бусад хэв маягаас ялгарах гол онцлог нь болно. Барилгыг илүү сүр жавхлантай, өндөр болгож тэнгэрт уусгана. 

Барилгын нүүрэн талыг хүнээр төлөөлүүлэн илэрхийлэх бөгөөд байгуулалтыг нүүрэн талын хэмжээ, харьцаатай нягт уялдуулах нь хүн архитектур хоёр нягт холбоотой байдаг гэсэн агуулга юм. 

Дэлхийн хамгийн өндөр сүм, дуганы барилга нь готик хэв маягийн Юлм Минстр /Ulm Minster, Germany/ дуган бөгөөд 161,5м юм.

Готик архитектур нь шашны барилгаас гадна цайз бэхлэлт, орд харш, хотын захиргаа, нийгэмлэгийн барилга, их сургуулийн зориулалтаар баригдаж байв.

Шартрессын дуган (Chartress cathedral)

Байршил: Франц, Шартресс

Он цаг: 1145 онд эхлэл нь тавигдсан ба 1194 – 1250 онд гол ажлууд эрчимтэй явагджээ. 

Өндөр: Нарны цамхаг-113м, Сарны цамхаг-105м

Суурийн хэмжээ: 140*80 

Готик урсгалын сонгодог жишээ болсон дуган бөгөөд Франц болон бусад улсад байх готик уран барилгын хэв шинжээс нэлээд өвөрмөц бөгөөд харилцан адилгүй өндөртэй, тэнгэр өөд тэмүүлсэн хоёр цамхгаараа ялгарна. Хоёр цамхаг нь өндөр нам байгаа нь зохиомжийг илүү сонирхолтой болгосон бөгөөд тухайн үеийн олон урчууд олон үе шаттайгаар оролцон барьжээ.

Бусад жишээ

Лондон хотын нийгэмлэгийн барилга /захиргааны барилга байсан/ 1788 он.

 Сеговиагийн бэхлэлт цайз, Испани, 12-13-р зуун

Брюсселийн хотын захиргааны барилга 15-р зуун 

Кембрижийн их сургуулийн эзэн хааны коллежийн дуган 1508-1515