Барилга МН-ээс амины орон сууцны салбарт ажиллаж буй байгууллагуудын төлөөллүүдтэй /2021.12.09/ уулзалт хийлээ. Тус уулзалт нь эрчим хүчний хэмнэлттэй амины орон сууцны салбарт ажиллаж буй хүмүүс нэг бодлоготой болох түүнд иргэдийг сургах, зөв мэдээ, мэдээллээр хангах, иргэдийг амины орон сууцны талаар илүү их мэдээлэлтэй болгох зорилготой юм.

Уулзалтад Барилга МН-ийн ерөнхий захирал Г.Батсүх, GIZ-Олон улсын хамтын ажиллагааны сангын Тэргүүн С.Түвшинхүү, "Өөрийн Байшин" Үндэсний хөтөлбөр ТББ-ын Тэргүүн Ч.Батцэнгэл, "Хашаандаа Сайхан Амьдаръя" ТББ-ын Тэргүүн Ц.Түмэнбаяр, "Хайбрид Хаус" ХХК-ийн захирал н.Бат-Эрдэнэ, "Сакура Проперти" ХХК-ийн захирал н.Ганбаа, "Буйман Харш" ХХК-ийн ерөнхий инженер М.Золбоо, "Тэнгэр Саян" ХХК-ийн захирал н.Чулуунтөмөр, "Альфа бюьлдинг" ХХК-ийн захирал н.Ганхуяг, "Баянбумбат Констракшн" ХХК-ийн захирал Д.Батсүх, Амины орон сууцны инноваци хөгжлийн төвийн удирдах зөвлөлийн гишүүн Э.Мөнгөнсүх, HOUSE.MN- Барилгын зөвлөх үйлчилгээ ХХК захирал Б.Мөнхбаатар нар оролцсон юм. 

Тус уулзалтад хүрэлцэн ирсэн зочдын ярианаас товч дурдвал:

Барилга МН ерөнхий захирал Г.Батсүх: Амины орон сууц ямар нэгэн зөвшөөрөлгүй баригддаг тул иргэд зураг төсөлгүй, мэргэжлийн бус хүмүүсээр бариулснаас үүдэн эрчим хүчний алдагдал ихтэй, дотор агаарын чанар муу, галын болон газар хөдлөлтийн эрсдэлтэй сууц баригдаж байна. Гэр хороолол, зуслангийн бүсэд баригдсан амины орон сууц, байшингуудын 99% нь ямар нэгэн зураг төсөлгүй баригдсанаас болж үнэ цэнэгүй, үл хөдлөх хөрөнгө гэж томьёолоход хэцүү сууцууд бий болж байгаа юм.

Үүн дээр төрөөс ямарваа нэг арга хэмжээ авахгүй бол цаашид эрсдэлтэй сууцууд баригдаж үл хөдлөх хөрөнгийн хоёрдогч зах зээл дээр нийлүүлэгдэхээр байна.

Үндсэн хууль, Барилгын тухай хууль, барилгын норм дүрэм стандарт зэрэг хууль эрхзүйн орчин нь байдаг ч дүрэм журмаар бага төвөгшилтэй амины орон сууцыг иргэд өөрсдийн хүслээр барь гэдэг нь учир дутагдалтай юм. Иргэдэд амины орон сууц барихад мэдлэг мэдээлэл өгөх төрийн болон хувийн хэвшлийн байгууллага байхгүй, төрөөс эрчим хүчний хэмнэлттэй амины орон сууцны нэг маягийн зураг гаргасан ч тэр нь иргэдэд ил биш байна. 

Иймд төрийн зүгээс анхаарлаа хандуулж хууль эрхзүй, бодлогоо хэрэгжүүлж ажиллах зайлшгүй шаардлагатай байна.

"Өөрийн Байшин" Үндэсний хөтөлбөр ТББ-ын Тэргүүн Ч.Батцэнгэл:  Эрчим хүчний хэмнэлттэй амины орон сууцны чиглэлээр ажиллахад барилгын мкв-н үнийн асуудал зөрчилдөөнтэй байдаг. Эрчим хүчний хэмнэлттэй амины орон сууцны талаар ямар ч ойлголтгүй хүмүүс чанаргүй барилга барьж, иргэд мөн адил мэдлэггүйн улмаас тухайн хүмүүсээр хямд өртгөөр чанаргүй сууц бариулж эд хөнгөөрөө хохирсоор байна. Гэтэл эрчим хүчний хэмнэлттэй амины орон сууц гэдэг өөрөө өртөг өндөртэй баригддаг үүнийг иргэд ойлгох шаардлагатай болоод байна. Ийм байдлаар цааш үргэлжилбэл эрчим хүчний хэмнэлттэй амины орон сууцны шийдэлд иноваци хөгжил дэвшил гарахгүй нөхцөл байдал бий болно. 

Эрчим хүчний хэмнэлттэй амины орон сууц гэдэг нь баригдах зардал өндөр ч дараа нь ашиглалтын зардал маш багатай барилга юм. Тэгэхээр энэ тал дээр салбарын бид хамтран үнийн дүнгийн талаар иргэдэд үнэн бодитой мэдээллийг өгөх хэрэгтэй. Бид канад хаус гээд сайхан технологи оруулж ирсэн үндсэн утгыг алдагдуулаад юу ч биш болгосон. Одоо энэ эрчим хүчний хэмнэлттэй амины орон сууц гэдэг ойлголтыг ийм болгомооргүй байна. 

GIZ-Олон улсын хамтын ажиллагааны сангийн Тэргүүн С.Түвшинхүү: Эрчим хүчний хэмнэлттэй амины орон сууцанд амьдрах хэрэгцээ сүүлийн үед өсөж байна. Энэ тал дээр тоочоод яривал маш олон асуудал байдаг. Хөрөнгө оруулахад зээлийн хүү маш өндөр байна. Мөн чанарын баталгааны хугацаа гэдэг зүйл дээр хөрөнгө оруулж байгаа тал болон зээл авч байгаа хүндээ бүтээгдэхүүн санал болгож байгаа ААН-ийн чанарын баталгаа зөв байх хэрэгтэй. Эрчим хүчний хэмнэлттэй барилга барихад бариулж байгаа хүндээ үр өгөөжтэй байх талаас төрөөс бодлого гаргах хэрэгтэй. 

"Альфа бюьлдинг" ХХК-ийн захирал н.Ганхуяг: Монголчууд нүүдэлчин ахуйн соёлоосоо салаагүй байна. Энэ нь амины орон сууцны жишигрүү ороход саад болж байгаа зүйлийн нэг юм. Нэгдсэн системийг дэмждэггүй тул айл айлаар нь шийдсэн нь зөв гэж харж байна. 

HOUSE.MN- Барилгын зөвлөх үйлчилгээ ХХК захирал Б.Мөнхбаатар: Энэ тал дээр иргэдийг мэдээлэлжүүлж мэдлэг олгох, суурин соёлд илүү их суралцуулах хэрэгтэй. Эрчим хүчний хэмнэлттэй амины орон сууц гэхээр иргэд дулаалганаас цааш мэдлэггүй зарим тохиолдолд дулаалга гэдэг зүйлийг ч нарийн мэдэхгүй байх тал бий. 

Энэ нь дан ганц материалын талын асуудал биш зураг төсөл, хариуцлага, санхүү гээд олон талт асуудал юм. Хамгийн эхлээд эрчим хүчний хэмнэлттэй барилга, түүний хэрэглээ гэж юу бэ гэдгийг ойлгуулах, дан ганц эрчим хүчний хэмнэлттэй барилга гэхээсээ илүү амины орон сууцны  бүхий л зүйлийн талаар мэдлэгтэй болгох хэрэгтэй. Ирдэгрүү чиглэсэн мэдээлэлээ дан ганц сошиалаар явуулах нь хүн бүрт хүрч чадахгүй байна. Тэгэхээр төрийн анхан шатны байгууллагаас иргэдэд мэдээлэл, сургалт  өгөх хэрэгтэй. 

Дээрээс нь амины сууцын талаар дөнгөж ойлголттой болж эхэлж байгаа банкуудад тулгарч байгаа асуудал нь үнэлсэн үнэлгээндээ таарсан чанартай юу, баталгаат хугацаандаа чанарын үзүүлэлт нь таарах уу, үүнийг хэнээр хянуулах вэ гээд олон асуудал гарч байна

Уулзалтын дүгнэлтэд Барилга МН сэтгүүл болон barilga.mn сайтаар дамжуулан иргэдрүү чиглэсэн амины орон сууцны талаар мэдээлэл дамжуулах, Барилгачин худалдааны төвд амины орон сууцны зөвлөгөө өгдөг нэгдсэн төвтэй болох, энэ чиглэлийн төлөөллүүд сард нэг удаа уулзалт зохион байгуулж асуудал, шийдлээ ярилцаж байх, илүү олон амины орон сууцны компаниудыг энэхүү уулзалтдаа хамруулах зэрэг дүнэлтэд хүрч дараагийн уулзалтыг тодорхой сэдвийн хүрээнд хийхээр боллоо.