XVII жарны цагаан морин жил Улаанбаатар хотын II төрх эмнэлэгт мэндэлсэн тэр эрхэм бол Занашир овогтой Чимэд-Осор юм. Тэрээр 1982 онд Увс аймгийн  хоёрдугаар 10 жилийн сургуулийн наймдугаар анги, 1987 онд хуучнаар ЗХУ-ын Доны Ростов хотод Автозамын техникумийг “Замын машин механизм, тоног төхөөрөмж”-ийн техник механик мэргэжлээр “Онцсайн” дүнтэй, 2003 онд ШУТИС-ийн МИС-д “Өргөн тээвэрлэх, барилга замын төхөөрөмж”-ийн механик инженер, 2013 онд Удирдлагын Академийг ”Бизнесийн удирдлагын менежер” мэргэжлээр  тус тус дүүргэжээ. 

Барилга, замын машин тоног төхөөрөмжийн ашиглалтын хүрээнд Монгол Улсын Зөвлөх инженерийн зэрэг хамгаалсан, Монгол Улсын “Шилдэг зохион бүтээгч” цол тэмдэгт “Улаанбаатар БҮК” ХК-н инженерээр ажиллаж буй түүний дэггүй бага нас, барилгын салбартай холбогдсон түүх, үзэл бодол, үлгэрлэн харуулж яваа амжилтынх нь талаар энэхүү ярилцлагаараа хүргэж байна. 

Урилгыг минь хүлээн авсан танд баярлалаа. Би таны талаарх хэд, хэдэн хөрөг өгүүллийг уншихад багадаа нэлээд дэггүй хүү байсан юм билээ. Тэгэхээр юун түрүүнд таны хүүхэд насны талаар асуумаар санагдлаа?

Баярлалаа. Хүний гэнэн томоогүй хүүхэд насны хөгжөөнт он жилүүд холдох тусам сэтгэл зүрхэнд хэзээд уяатай байнга дагалдаж явдаг юм байна. Нас ахих тусам үүнийг гүнзгий мэдэрч явна. Сахилгагүйтсэн, ширээ сандал эвдэлсэн, хүүхэд шоглосон гэх мэт болж бүтэхгүй л юм гарвал би заавал түүнд оролцчихсон явдаг нөхөр байлаа. Би аав, ээжийгээ мөн ч олон удаа сургууль дээрээ  дуудуулан сэтгэлийг нь чилээж байсан даа. Ёстой л уйлж, дуулж, ноцолдож, зодолдож, магтуулж, манаргаж өссөн балчир нас минь буйдхан Увсын хонхорт үлдэж дээ. Багын найз нөхдөө сэтгэлдээ одоо ч санан дурсаж явна.

Аав, ээж хоёр минь дээд газрын шийдвэрээр ЗХУ-ын  Красноярск мужид томилогдон ажиллах болж, би эгчийн хамт эмээ дээрээ үлдсэн. Энэ нь тухайн үед миний хувьд “эрх чөлөөгөө” бүрэн утгаар нь эдлэх сайхан боломж байлаа. Нэг ёсондоо ”ямар ч захиргаагүй дураараа байна” гэсэн үг л дээ. Угийн сахилгагүй занд минь санаа зовдог аав маань “хүний газар бага ч гэсэн бие дааж сураг, юм үзэг” хэмээснээр намайг 9-р ангид суулгалгүй шууд ЗХУ-д суралцуулах шийдвэр гаргасан. Аавынхаа холч ухааны ачаар одоо би өдий зэрэгтэй явна даа. Гэр бүлийн хувьд хүний их эмч гэргийтэй, охин Австрали улсад IT чиглэлээр дээд боловсрол эзэмшиж мэргэжлээрээ ажилладаг, харин хүү одоо оюутан юм.

Таны эцэг, эхээсээ өвлөн авсан эрхэм зан чанар нь юу вэ?

Миний арвич хямгач, шинийг эрэлхийлдэг зан чанар эцэг, эхээсээ өвлөж авсан чанар болов уу. Ээжийн маань юмхнаар юм хийдэг нарийн торгон мэдрэмж, харин аавын минь өөртөө болон бусдад тавьдаг өндөр шаардлага “Долоо хэмжиж нэг огтолдог” хянуур, нямбай зан нь надад нөлөөлсөн гэж бодож явдаг. Юуны түрүүнд миний бага насны гэр бүлийн орчин, хүмүүжил, юмны учир зүйг олох, аливааг өөд татах зан чанар минь шинийг санаачлан сэдэхэд түлхэц болж өгсөн. Удам судрыг маань сөхвөл аав минь насаараа Увс аймгийн автотээврийн байгууллага, аймгийн АДХГЗахиргаа, гаалийн байгууллагын удирдах ажилд 40-өөд жил тасралтгүй ажиллаад одоо гавьяаныхаа амралтад гарсан ч чөлөөт цагаараа уран бүтээл хийж ганзага хоосонгүй яваа нэгэн. Монголын анхны авто инженерүүдийн нэг бөгөөд Гавьяат тээвэрчин цол хүртсэн байдаг. Харин ээж минь Увс аймгийн музей, кино театр, соёлын хэлтэс, тээврийн байгууллага, усны аж ахуйн удирдах газарт 30-аад жил гүйцэтгэх болон удирдах ажил хийж явсан сэхээтэн хүн. 

Аав, ээж хоёр минь биднийг хүний дайтай явахад юугаа ч хайрлаагүй хүмүүс. Тэд маань тэнгэрийн долоон бурхан од шиг долоон хүүхдүүдээ гадаад, дотоодын нэгээс доошгүй их, дээд сургууль төгсгөж, инженер, хуульч, багш, хүний их эмч, эдийн засагч, мэргэжил эзэмшүүлсэн түмэн олондоо үлгэр дуурайлал ихтэй, төрөл садандаа хүндтэй буянтай буурлууд байдаг даа.

Аавыгаа хараад би эр хүн өрх гэрийн тэргүүн учраас үр хүүхдүүдээ мөр бүтэн, эрдэм боловсролтой хүн болгохын төлөө зүтгэж ажиллах ёстойг ойлгодог. Аливаад ноён нуруу зааж, тууштай, өөрийн үзэл бодолдоо үнэнч байж, ядарсан хүнд тусалж явах нь эр хүний жудаг гэж боддог. 

Оюутан ахуй цагаас сэтгэлд үлдсэн мартагддаггүй дурсамжууд хүн бүрд л байдаг шүү дээ. Харин таны хувьд?

Би ЗХУ-ын алдарт зохиолч М.Шолоховын “Дөлгөөн Дон”-ыг зориход 16-хан настай байлаа. Автозамын техникумд дөрвөн жил суралцах хугацаандаа нэг ч удаа эх орондоо ирээгүй. Харин зуныхаа амралтаар хамт суралцаж байсан оюутан найз нарынхаа хамт амь зуух хэдэн төгрөг олох гэж янз бүрийн л ажил хийдэг байлаа. Хажуугаар нь өөрийн эзэмших гэж буй мэргэжлийн дагуу Өмнөд Америкийн оюутан Эрнейстэй хамт зэргэлдээх Волгодонкс хотод очиж машин механизмын заводод боломжийн цалинтай туслах ажилтан хийдэг болов. Энэ нь надад ажил мэргэжлийн хувьд маш их дадлага, туршлага болсон. 

Ингээд Ази, Америк, Африк, Европ тивийн 26 орны олон үндэстэн ястны охид хөвгүүдтэй хамт суралцан нөхөрлөж бие биенээ хурцалж дөрвөн жилийг ардаа үдэж улмаар “Улсын диплом өвөртлөн нутаг буцахад  сайхан мөч байсансан. 

Дараа нь ШУТИС-д суралцаж  мэргэжлээ дээшлүүлэн, бие даан “Зам барилгын машин механизмын бүтээмж дээшлүүлэх, зохион бүтээх” чиглэлээр судалгаа хийж байсан бөгөөд түүндээ тулгуурлан оюутны эрдэм шинжилгээний хуралд байнга илтгэл тавин оролцож байсан. 

Миний аавын багш, Монголын мянга, мянган инженерүүдийн багш, гавьяат багш С.Ишбалжир, Зам барилгын зангарагтай доктор профессор Д.Дэлэг, Д.Лханаг  нарын олон багш нар эрдэм мэдлэгээсээ хомсгүй өвлүүлсэн билээ. 

“Инженерийн боловсрол дэмжих  сан”-аас санаачилж санхүүжүүлсэн зөвхөн техник технологи, байгалийн Шинжлэх ухааны салбарт суралцагч 200 гаруй оюутныг хамруулсан “Шинэ бүтээлийн уралдаан”-д гутгаар байр эзэлж “Ньютоны нэрэмжит шагнал”-ыг Монгол Улсын анхны ерөнхийлөгч П.Очирбатаас гардаж байсан торгон мөч сэтгэлийн хойморт тодхон байна. Сурах, мэдэх эрдмээ үүгээр дуусгаагүй 2013 онд “Удирдлагын Академ”-ыг  “Бизнесийн удирдлагын менежер” мэргэжлээр  төгсөж гурав дахь  удаагаа мэргэжлийн диплом гардсан нь хүн үхтлээ суралцах ёстой гэсэн мэргэдийн мэргэн сургаалийг бодогдуулсан даа. Ингээд бодохоор хүн бүрийн оюутны амьдрал хамгийн сайхан үе нь байдаг байх даа.

Тэр дэггүй шар хөвгүүний ажлын замнал нь хэрхэн эхэлж байв даа? 

Би ажил, амьдралынхаа гарааг 1987 оноос Увс аймгийн зам барилгын трестээс эхэлсэн бөгөөд одоог хүртэл энэ салбартаа хүчин зүтгэж, улс орныхоо дэд бүтцийн хөгжилд өөрийн хувь нэмрээ оруулж яваадаа сэтгэл хангалуун явдаг. Бүтээн байгуулалт явагдаж байгаа улс орон хөгждөг гэгчлэн миний ажиллаж буй энэ салбар хийсэн бүтээсэн нь гарт баригдаж, нүдэнд ил харагдаж байдаг талбар болохоор бахархахгүй байхын аргагүй.

ОХУ-ын баруун Сибирь, Монголын баруун бүс нутаг, БНХАУ-ын Уйгарын өөртөө засах улсыг холбосон олон улсын чанартай баруун бүсийн босоо тэнхлэгийн хатуу хучилттай зам барихад зориулж эртнээс хүчин чадал сайтай машин, механизм, тоног төхөөрөмж, асбальтобетон завод барьсан нь учиртай аж. Тухайн үед трестийн замын машин механизм, тоног төхөөрөмжийн засвар үйлчилгээг хариуцаж гагаа хээр, гэр, чингэлэгт хонож, амарч, хооллон ундалж, хүнд хүчир ажлын гүнд орж ажил амьдралын зах зухаас амсаж, техникийн хүчин чадлыг яаж бүрэн дүүрэн ашиглах, хүнд хүчир ажлыг бага боловч хөнгөвчлөх юмсан гэх бодол тээж улмаар 200 литрийн төмөр бочиконд байгаа шингэн тосыг асгаж цутгаж хорогдол гаргахгүй, байгаль орчин, байр саваа бохирдуулахгүй юүлэх хөдөлгөөнт төхөөрөмж санаачлан хийж үйлдвэрлэлд нэвтрүүлж зохиогчийн гэрчилгээ гардан авч байлаа. 

Трестийн орон тооны бус Монголын Хувьсгалт Залуучуудын эвлэлийн нарийн бичгийн дарга, аймгийн ХЗЭ-ийн хорооны товчооны гишүүний сонгуульт ажлыг дажгүй амжуулж, хажуугаар нь шинийг санаачлагч залуучуудын “Бүтээлч хэсэг” санаачлан, зохион байгуулан удирдаж юм, юм хийчих юмсан гэж зүтгэж, түүнийгээ амжуулж, түүнээсээ таашаал авч урамшиж явлаа. 

Шинэ санааг дэмждэг чадварлаг зохион байгуулагч тус трестийн дарга М.Цэвээнжав, ажлаа 10 хуруу шигээ мэддэг бас хийдэг Д.Болд, механизмчин Г.Дарьсүрэн, О.Батжаргал нарын олон хүмүүс надад их зүйлийг зааж сургасан. Аливаа саад бэрхшээлийн өмнө тэсвэр, тэвчээр зааж ажилладаг, цагаан цайлган сэтгэлтэй, илэн далангүй ил тод, эвсэг гар нийлсэн 500-аад өнөр өтгөн хамт олны дунд ажлын гараагаа эхэлж байсан.

Мөн тухайн үед мөр зэрэгцэн ажиллаж байсан Зөвлөлтийн мэргэжилтэн Ерелин.В.В, Быков.Л.А, Герасимов.Г.Ф зэрэг нөхөд маань ажилаа сайн хийдэг, арвин их туршлагатай, Монгол залуусд мэддэг   бүхнээ зааж сургаж байсныг эргээд дурсахад сайхан байна.

Өнөөдөр эргээд харахад Хандгайт, Улаангомын цардмал замаар баруун аймгуудад хэрэглэгдэж байгаа шатахуун, тослох материал, бараа таваарын дийлэнх нь экспортлогдож байна. Би үнэхээр тэр их замын тоосонд дарагдаж явсны хүчинд өдий зэрэгтэй яваа хүн юм.

Энэ салбар танд, таны амьдралд ямар өөрчлөлтүүдийг бий болгосон бэ?

Би чинь Увс аймгийн аваргаас хэтрэхгүй мөртлөө бөх, бөмбөг гэж хийсээд болохгүй хүүхэд байсан. Аав, ээж хоёр бусад дүү нарын хамтаар ЗХУ-н Крансноярскийн хязгаарт гурван жил ажиллаж, Улаангомд байгаа миний сурлага, хүмүүжилд хяналт тавих боломж хомс байсан учраас намайг наймдугаар ангиас нь ЗХУ-руу сургуульд явуулсан түүхтэй. 

“Гэр ахуйн цахилгаан тоног төхөөрөмжийн механикч” гэсэн “цэвэрхэн” хувиараа хотод очоод “Зам барилгын машин механизмын механикч” гэсэн “тостой” тоостой хуваариар хулхитуулсан нь эцэстээ “Сохорсон биш завшсан нь” гэгч болсон. Энэ нь миний амьдралын замыг орвонгоор нь эргүүлсэн юм. 

Айлуудын эхүүн үнэртэй тостой хөргөгч, хөлдөөгч, тоостой угаагч, тоос сорогч гэх мэтийг ухаж айл хэсч явахын оронд цэвэр агаарт техниктэй оролдож зам, барилга байгуулахад оролцож хожим хойно эргээд харсан ч “Миний тавилцсан зам, миний босголцсон барилга” гээд харж сэтгэлээ баясгаж явах, томоор бодвол эх орныхоо бүтээн байгуулалтад гар бие оролцсон шиг оролцож явахаас өөр сайхан юм хаана байх билээ. Ингэж миний амьдралын өгсөж дэвжих зам эхэлсэн юм болов уу.

Туулж өнгөрүүлсэн цаг хугацаагаа эргэн надад хийж бүтээснээ дурсан санах, бахархан баярлах бас сургамж авч засч, залруулах зүйл ч байгаа нь ойлгомжтой.

Таны салбартаа санаачлан хийсэн бүтээсэн ажлууд болон хувь нэмэр тань юу вэ?

Монголын эрин цагийн их бүтээн байгуулалт болох барилга дэд бүтцийн салбарт 30 гаруй жил үр бүтээлтэй ажиллаж байна. Энэ хугацаанд хөдөлмөр хөнгөвчлөх, гар ажиллагааг механикжуулах, автоматжуулах, машин механизм тоног төхөөрөмжийн ашиглалтыг сайжруулах, эдэлгээний хугацааг уртасгах, боловсронгуй болгох, бүтээмж дээшлүүлэх, зохион бүтээх чиглэлээр “Т-130 тракторын дүүжинт түрэгч төхөөрөмж”, “ДУ-48Б индүүний цардмал зам зүсэх төхөөрөмж”, “Цардмал зам нягтруулах цэвэрлэх төхөөрөмж”, “Экскаваторыг чирэх төхөөрөмж”, “Барилгын тагт суурилуулах төхөөрөмж” зэрэг 30 гаруй ШБОС (Шинэ Бүтээл Оновчтой Санал) санаачлан үйлдвэрлэлд нэвтрүүлж зохиогчийн эрхийн хамгаалалт хийлгэсэн байна. 

Зам барилгын машин механизм тоног төхөөрөмжийн бүтээмж дээшлүүлэх боловсронгуй болгож ажиллагааг сайжруулснаар одоогийн ханшаар 2,5 тэрбум гаруй төгрөгийн ашигтай ажиллах боломж бүрдсэн.

Миний хийж бүтээсэн ажлын үр дүнг мэргэжлийн байгууллагууд өндрөөр үнэлсэн ба тэрээр ШБОС-88, ШБОС-90, ШБАЗ-2006 улсын хэмжээний үзэсгэлэн арга хэмжээнд удаа дараа амжилттай оролцож алт, хүрэл медаль, диплом мөнгөн шагналаар шагнагдаж байсан. Миний хувьд санааг нь гаргаж, зураг эскизийг нь зурж, хийх аргачлал зөвлөмжийг нь хэлнэ. Мэдээж гагнах угсрах, тохируулах ажлыг мэргэжлийн ажилчид хийнэ шүү дээ. Хийх явцад дэргэд нь байж санаа оноогоо хэлнэ. Ажилчид бол аливаа бүтээн байгуулалтын ноён нуруу нь юм шүү дээ.

Бетон хоолойн Вольтамикс үйлдвэр 2009 он 

Мөн эрдэм шинжилгээний илтгэл найм, зөвлөмж зургаа , мэргэжлийн гарын авлага ном 12, технологийн ашиглалтын заавар дөрвийг бие даан боловсруулсан. Түүнчлэн санаачилсан бүтээлүүдийн талаар МҮОНТ-ын “Авьяас XXI зуун ” нэвтрүүлгээр сурталчлагдаж олны хүртээл болж байсан ба 2009 онд “Хүмүүний амьдрал” сэтгүүлд “Шинийг эрэлхийлэгч” нэртэй хөрөг нийтлэл, МУ-ын Оюуны өмчийн газраас эмхтгэл гаргасан “МУ-ын шилдэг зохион бүтээгчид” номд бүтээлүүд маань орсон байдаг.

Миний хийж бүтээсэн томоохон ажлын тоймтойгоос нь гэвэл 2008-2010 онд “Улаанбаатар БҮК” ХК-нд Орос, Испани, БНХАУ-ын орчин үеийн дэвшилтэд технологийн шугамын ерөнхий инженерийн хувьд удирдан зохион байгуулж угсарч ашиглалтад оруулсан ба тэдгээрийн ашиглалттай холбоотой технологийн заавар, ажлын байрны дүгнэлт, тусгай зөвшөөрлийн бичиг баримтыг гардан боловсруулж батлуулсан. Эдгээр ажлын үр дүнд Монгол Улсад анх удаа 120 метрийн урттай урьдчилан хүчитгэсэн хучилтын нүхтэй хавтан үйлдвэрлэх Тенсиланд үйлдвэр, Ф500-ф1500км голчтой бетон хоолой хийх Вольтмикс үйлдвэр, 1 цагт 120м3 зуурмаг бэлтгэх зуурмагийн үйлдвэр, үйлдвэрийн цехэд төмөр бетон эдлэлийг үйлдвэрлэх зуурмагийн үйлдвэр гэсэн дөрвөн үйлдвэр, мөн 4.0 мянган тн багтаамжтай цементийн силосны тоног төхөөрөмжийн шинэчлэлийн угсралтын ажил хийж гүйцэтгэсэн. Тухайлбал, хуучин тоног төхөөрөмжийг задалж зайлуулахад гарсан хог хаягдал гэхэд л хэдэн арван тонныг зайлуулж талбайг чөлөөлсөн байх жишээтэй. 

Энэхүү нөр их хөдөлмөрийг тань төр мэдээж  үнэлсэн байх? 

Миний хөдөлмөр зүтгэлийг төр засгаас удаа үнэлж 1990 онд МХЗЭ-н Төв Хорооны “Тэргүүний сэхээтэн залуу” алтан медаль, 1991 онд байгууллагын “Шинийг санаачлагч аварга”, 2004 онд МУ-н “Шинийг санаачлагч” цол тэмдэг, 2006 онд Монгол Улсын “Тэргүүний замчин”, 2007 онд “Тэргүүний барилгачин” цол тэмдэг, 2008 онд “Шилдэг зохион бүтээгч” цол тэмдэг /МУ-н 77 дахь/, 2009 онд “Барилгын материал үйлдвэрлэлийн тэргүүн” цол тэмдэг, 2011 онд Алтан гадас одон, 2014 онд Хөдөлмөрийн гавьяаны улаан тугийн одонгоор тус тус шагнагдсан байна. 2010 онд ЗТАБЯ, МҮХАҮТ-аас хамтран зохион байгуулсан “Монгол барилга-2010” үзэсгэлэнгийн хүрээнд зохион байгуулсан илтгэлийн уралдаанд нэгдүгээр байр эзэлж, “Улаанбаатар БҮК” ХК “Тэргүүний технологи нэвтрүүлсэн компани”-р шалгарсан.

Таны мэргэжлийн хамгийн сайхан болон бэрхшээлтэй зүйл нь юу вэ?

Миний мэргэжил тухайн компанид ашиглагдаж буй тоног төхөөрөмж, өргөн тээвэрлэх машин механизмын   засвар, техникийн үйлчилгээ, найдвартай ажиллагаа, тэдгээрийн ашиглалт, аюулгүй ажиллагааг хариуцан бүрэн бүтэн байдлыг хангах үүрэгтэй.

Зам барилгын салбарын ажлыг хийж гүйцэтгэх явцад тохиолдох жаргал, зовлон, бэрхшээлийг гадарлах, түүнд ойр явсан хүний хувьд үйлдвэрийн арга, технологийн төвшин, үйлдвэрлэгдсэн бүтээгдэхүүний чанар нь боловсруулах технологийн машин, тоног төхөөрөмжийн хийц, хүчин чадал, ашиглалт, засвар үйлчилгээ хийх онцлогоос шууд хамаардаг. Иймд барилгын бүтээц, түүхий эд материал, хийц эдлэлийг үйлдвэрлэх технологийн машин, тоног төхөөрөмжийн талаар зохих хэмжээний мэдлэгтэй байх нь тухайн салбарт ажиллаж буй ажилтнууд санаж явахад илүүдэхгүй байх аа. Энгийнээр хэлэхэд аливаа ашиглаж буй тоног төхөөрөмж, техникт хийх ёстой үзлэг үйлчилгээг цаг тухайд нь төлөвлөгөөний дагуу хойш тавилгүй амжуулаад байвал эвдрэл гэмтэл ч гарахгүй технологийн ажлыг тасралтгүй хийж гүйцэтгээд байж болох давуу талтай.

Та хамт олныхоо сүүлийн жилүүдэд хийж бүтээгээд байгаа шинэлэг ажил үйлсээс танилцуулаач?

“Улаанбаатар БҮК” ХК-н ТУЗ-н дарга Монгол улсын аж үйлдвэрийн гавьяат ажилтан Д.Нямхүү тэргүүтэй удирдлагын баг зөв мэргэн алс холыг харсан бодлогын үр дүнд өнгөрсөн хугацаанд тус компанийн бүтээлч хамт олон өмнөө тавьсан зорилтоо амжилттай хэрэгжүүлж, орчин үеийн өндөр бүтээмжтэй машин техникээр тоноглогдсон, нарийн технологи бүхий үйлдвэрүүдтэй болж, удирдлага, зохион байгуулалт, мэргэжлийн боловсон хүчнээр бэхэжсэн, олон улсын зах зээлд өрсөлдөхүйц стандартын шаардлага хангасан бүтээгдэхүүн үйлдвэрлэдэг үндэсний хэмжээний томоохон үйлдвэрлэгч болон үйл ажиллагаагаа явуулж байна. Үйлдвэрлэлийн цар хүрээ өргөжин тэлж, үйл ажиллагаа нь тогтвортой явагдаж, өөрийн гэсэн өнгө төрхийг олж улмаар Монгол улсын барилгын салбар, түүний дотор барилгын төмөр бетон хийц эдлэл, төмөр замын төмөр бетон дэрний үйлдвэрлэл, металл хийцийн үйлдвэрлэлийн хөгжлийг үсрэнгүй шинэ шатанд гаргахад үлэмж хувь нэмэр оруулж байгаа нь манай хамт олны бахархал болж байна.

Сүүлийн жилүүдэд хийсэн ажлуудаас дурдвал 2017 онд Оюутолгой-Ханбогд чиглэлийн хатуу хучилттай 35,1 км автозамд төмөр бетон хоолой, нүхэн гарцыг зураг төслийн дагуу бэлтгэн нийлүүлэв. Мөн тус онд МУ-ын Засгийн Газраас хэрэгжүүлж байгаа Улаанбаатар-Мандалговь чиглэлийн цахилгаан дамжуулах агаарын шугамын төмөр бетон сууриудыг бэлтгэн нийлүүлэв. Мөн тус онд МУ-ын Засгийн Газраас хэрэгжүүлж байгаа Улаанбаатар-Мандалговь чиглэлийн цахилгаан дамжуулах агаарын шугамын төмөр бетон сууриудыг бэлтгэн нийлүүсэн. 2019 онд Улаанбаатар төмөр зам ХНН-ийн захиалгаар Дорноговь аймгийн Алтанширээ суманд баригдах Нефть боловсруулах үйлдвэр лүү тавигдсан 27 км төмөр замын төсөлд төмөр замын бетон дэр нийлүүлсэн. 2019-2020 онд Монголын төмөр зам ТӨХК-ийн захиалгаар Тавантолгой-Зүүнбаян чиглэлийн 414,6 км төмөр зам барих төсөлд одоогийн байдлаар 190 км төмөр зам тавих төмөр замын бетон дэр нийлүүлсэн гээд захаас нь дурдаад байвал хийсэн ажлууд олон байна. 

Төмөр замын бетон дэрний үйлдвэр 2013 он

Тус компанийн дээрх бүтээн байгуулалт, техник технологийн шинэчлэлийн ажилд инженер Хамохоев.Р.Б, Цыбенов.С.А, Ш.Батсуурь, Л.Хадбаатар, Б.Пүрэвсүрэн, мастер Б.Алтаншагай, механик О.Сайнбуян, кранчин Г.Чулуунцэцэг, Н.Нинжбадгар, мэргэжилтэн А.Амардэлгэр, Н.Майжаргал,  засварчин Б.Бямбажав, гагнуурчин Н.Бадамхүү, эдийн засагч Д.Сувд, нябо Н.Энх-Оргил, нярав Ч.Болд, тогооч Ц.Чингүүн нар бусдыгаа хошуучлан манлайлан ажиллаж байлаа. Мөн түүнчлэн 2018 оноос тус компанийн хүрээнд үйлдвэрийн аливаа дамжлага дээр ашиглагдаж байгаа тоног төхөөрөмжийн бүтээмжийг дээшлүүлэх, боловсронгуй болгох, зохион бүтээх, дотоод нөөц бололцоогоо ашиглах, сэргээн засварлах зорилгоор “Шинэ Санаа” клубыг байгуулсан. Тус клубын шинийг санаачлагч инженер Хамохоев.Р.Б, Абдуллаев.Г.С, Магзамов.С.К, М.Зоригт, Д.Оюунбилэг, У.Гантулга, н.Журба, засварчин Ө.Төмөрбаатар, С.Намхайжамц, Ө.Өлзийцэцэг, цахилгаанчин Б.Алтангэрэл нарын интернационалч хамт олон энэ хугацаанд тухайлбал, “Бетон зүсэгч гар ажиллагаат машин, Бетон дэрний төхөөрөмж царцахаас сэргийлэх халаагуур, Цахилгаан хөдөлгүүр шалгах стенд” гэх мэтийн олон арван шинэ санаачлага гаргаж үйлдвэрлэлд нэвтрүүлсэн байна. 

Тантай мэргэжил нэгтэй залуу үеийнхэнд хандаж юу гэж зөвлөх вэ?

Та бүхний хийсэн ажил, мэдлэг чадварынх нь үр дүн бусдын нүдэн дээр шууд харагдаж байдаг болохоор өөрийн эзэмшсэн мэргэжил, хийж гүйцэтгэж байгаа ажилдаа өдөр бүр дурлаж тэмүүлж байх хэрэгтэй. Юм бүхэнд өөрийгөө дайчилж, чадахгүй гэхээсээ илүүтэй чадахын төлөө бусдаас асууж, лавлаж, бусдын хийж байгаа ажлаас үлгэр дуурайлал авч өөртөө суулгаж, шаардлагагүй зүйлийг нь хаяж, дасан зохицож ажиллах нь ирээдүйн ажил амьдралд өгөөжөө өгдөг юм.

Салбарынхаа цаашдын ирээдүйг маш өөдрөгөөр төсөөлж байна. Шинжлэх ухаан техникийн дэвшлийг барилгын үйлдвэрлэлд нэвтрүүлж гар ажиллагаагаар хийж гүйцэтгэдэг технологийн ажил хөдөлмөрийг багасгаж, өндөр бүтээмжтэй машин техникээр хангаж, тэдгээрийн ашиглалтыг сайжруулахад анхаарч ирсний үр дүнд тал бүрийн зориулалттай ажлын нэмэгдэл төхөөрөмж, машин техникийг хосолж хэрэглэх, ялангуяа хий шингэн хосолмол удирдлагатай, сэлгээлт хийх чадвартай хүнд механизмаар барилгын байгууллагуудын хэрэгцээг хангаж улмаар боловсон хүчний нь сургаж бэлтгэх явдал юм.

Зам барилгын салбарт өөрийн мөрөө гаргаж явах цаг хугацаанд надтай хамт жаргал зовлонгоо хуваалцаж, эх орныхоо бүтээн байгуулалтад нэг зорилготой хамтран гар бие оролцож явсан бахархмаар бас хайрлаж хүндэлмээр энгийн мөртлөө эгэлгүй анд нөхөдтэйгөө өнгөрүүлсэн он жилүүд ер бусын гэгээн дурсамж үлдээж дээ. Та бүхэндээ эрүүл энх, хорвоогийн хамгийн сайн сайхан бүхнийг хүсье.

Түүний "ямарваа ажил хүний гарт багтаж ирэхийн үед түүнийгээ улам өөрчлөн шинэчлэж, сайжруулах шаардлага алхам тутамд тулгардаг юм байна" гэх нь ясны хөдөлмөрч, хурдан гавшгай хөдөлгөөнтэй, шулуун шударга зантай хүн юм гэдгийг илтгэж байлаа. Өөрийгөө бага ярьж, өрөөлийг талаар илүү өгүүлэх түүний өнөөдрийг бүтээсэн ажил, амьдралынх нь онцлогтой танилцаж, удтал ярилцсандаа баяртай байна. Бүтээн байгуулалтад оролцож яваа зам, мөр нь үргэлж дардан байхыг хүсье!