Сар бүр тогтмол хэвлэгддэг Барилга МН сэтгүүлийн №138 хэвлэгдэн гарч захиалагч нарт хүргэгдэн очиход бэлэн болсон бөгөөд сэтгүүлийн нүүр хуудсанд "ИЭК МОНГОЛ" ХХК хамтран ажиллаа.  

Сэтгүүлийн дугаар бүрт салбарын нэр хүнд бүхий эрхмүүдийг урин ярилцдаг “VIP ярилцлага”, төрөл бүрийн судалгаа, салбарын тулгамдаж буй асуудлын хүрээн дэх нийтлэл, мэргэжилтнүүдийн төрөл бүрийн зөвлөгөө, иргэдэд зориулсан амины орон сууцны төрөл бүрийн мэдээлэл, шинэ орон сууц, барилгын гол нэрийн 12 материалын үнэ ханш зэрэг бусад мэдээллүүд багтдаг. Харин энэ сарын дугаарт гарсан онцлох булангуудын талаарх товч мэдээллийг доор хүргэж байна. 

Сэтгүүлийн онцлох булангуудтай танилцана уу

VIP ярилцлага: Сайхан хоолойтой дуучинг сонсоод дуулахын төлөө дуулим хорвоод төржээ гэлцдэг. Түүн лугаа эх орныхоо үнэт өвийг хамгаалахын төлөө төрсөн мэт  нэгэн гайхалтай хөдөлмөрч эмэгтэйг VIP ярилцлагынхаа зочин хойморт онцлон  урилаа. Тэрээр Монголд бэлтгэгдэж төгссөн анхны 17 архитекторын нэг, сэргээн завсарлах чиглэлээр зөвшөөрөгдсөн Монголдоо цор ганц зөвлөх архитектор юм. 

Салбартаа 40 гаруй жил ажиллаж байгаа бөгөөд “Түүх, соёлын дурсгалт зүйлийг сэргээн засварлах газар”-т 14 жил,  Соёлын яам, Боловсрол, соёл, шинжлэх ухааны яаманд Түүх, соёлын дурсгал, музей хариуцсан мэргэжилтнээр 22 жил ажиллаж, Соёлын өвийг хамгаалах хууль, журам дүрэм боловсруулах, архитектурын дурсгалыг хамгаалах, сэргээн засварлах хөтөлбөр, төсөл боловсруулан хэрэгжүүлэх ажлыг зохион байгуулсан. Мөн Дурсгалт барилгын сэргээн засварлалтын сэдвээр их сургуульд хичээл зааж, залгамж халаагаа бэлдэхийн сацуу хамтын болон бие даасан нийт 16 номыг хэвлэн нийтлээд байна. Энэ хүн бол МУ- ын зөвлөх архитектор, доктор З.Оюунбилэг юм. 

Барилгачны алдар: XVII жарны цагаан морин жил Улаанбаатар хотын II төрх эмнэлэгт мэндэлсэн тэр эрхэм бол Занашир овогтой Чимэд-Осор юм. Тэрээр 1982 онд Увс аймгийн  хоёрдугаар 10 жилийн сургуулийн наймдугаар анги, 1987 онд хуучнаар ЗХУ-ын Доны Ростов хотод Автозамын техникумийг “Замын машин механизм, тоног төхөөрөмж”-ийн техник механик мэргэжлээр “Онцсайн” дүнтэй, 2003 онд ШУТИС-ийн МИС-д “Өргөн тээвэрлэх, барилга замын төхөөрөмж”-ийн механик инженер, 2013 онд Удирдлагын Академийг ”Бизнесийн удирдлагын менежер” мэргэжлээр  тус тус дүүргэжээ.

Барилга, замын машин тоног төхөөрөмжийн ашиглалтын хүрээнд Монгол Улсын Зөвлөх инженерийн зэрэг хамгаалсан, Монгол Улсын  “Шилдэг зохион бүтээгч” цол тэмдэгт “Улаанбаатар БҮК” ХК-н инженерээр ажиллаж буй түүний дэггүй бага нас, барилгын салбартай холбогдсон түүх, үзэл бодол, үлгэрлэн харуулж яваа амжилтынх нь талаар энэхүү ярилцлагаараа хүргэж байна.

Судалгаа: Уг судалгаагаар Улаанбаатар хотод шинээр хэрэгжиж байгаа шинэ орон сууц, амины орон сууцны нийлүүлэлт, үнэ ханш, байршлуудын талаарх нэгдсэн дата мэдээллийн санг шинэчлэх, цаашид ипотекийн зээлээр борлуулагдах төслүүдийн хэрэгжилтийн явцын судалгааг гаргаж, орон сууцны эрэлт, нийлүүлэлтийн тэнцвэрийг барих бодлогыг хэрэгжүүлэхээр төлөвлөж байна.

Амины орон сууц: Энэ ажилд ундны ус, халаалтын усны хангамжийн ажил орох ба үүнийг дагалдаад бохир усны шугам, дээврийн усны зайлуулах шугамууд хийгддэг. Энэ удаад Европын орнуудад өргөнөөр ашиглагддаг амины орон сууцны барилгуудын жишээн дээр авч үзнэ.

Европод ундны усыг хүнсний бараанд оруулан тооцдог учир материалыг сонгох, шугам хоолойг хийхдээ DIN EN 806, ундны усны холболтын дүрэм, хүнсний бараа хэрэглээний хууль зэргийг дагаж мөрддөг байна. Ундны усны хоолойг цайрдсан  ган хоолой, зэвэрдэггүй ган хоолой, зэс хоолой, хуванцар хоолой, нийлмэл материалтай металл хоолой гэж ангилдаг ба эдгээр нь тус бүрдээ хэрэглээний нийцсэн холболтын техниктэй байдаг. 

Нийтлэл: Манай салбарын хөдөлмөрийн бүтээмж (нэг ажиллагчид ногдох бодит ДНБ-ийн хэмжээгээр бодоход) улсын дунджаас бараг 40 гаруй хувиар доогуур байдаг ба энэ нь барилгын үйлдвэрлэлд Олон улсын жишгийн удирдлага, зохион байгуулалтыг бүх шатанд хэрэгжүүлэх, ажиллах хүчнийг мэргэшүүлэх, чадваржуулах хэрэгтэйг харуулж байна. 

Архитектур дизайн: Бароко хэв маяг нь сүр хүчит хэлбэртэй, өндөр төвшний цогц чимэглэлийг агуулсан, театрын өнгө төрхтэй, 17-р зуунд Италид бий болж Герман болон Европт хүчтэй тархсан архитектурын урсгал юм.  Оргил үедээ 1625-1675 оны үед хүрсэн бөгөөд Португали, Испанийн колоничлолын үед өмнөд Америкт хүртэл тархсан байна. Чимэглэлийг нь улам нарийн болгосон хэлбэрийг нь Рококо гэх бөгөөд төв Европт түлхүү хөгжив. 

Архитектурын гол онцлог нь сэргэн мандалтын үеийн архитектураас өвлөн үргэлжлүүлсэн  бөмбөрцөг орой, колонад/баганан цуваа/ бөгөөд түүнийг улам өндөрт,нарийн хийцтэй, сүр жавхлант, давтагдашгүй уран чимэглэлтэй, сонгодог театрын хэлбэртэй болгосонд оршино.

Сар тутмын Барилга МН сэтгүүлээ захиалаад үнэгүй хүргүүлэн аваарай. 

Та сэтгүүл захиалах бол ЭНД дарна уу.

Онлайнаар унших бол ЭНД дарна уу. 

Утас: 9100-0233, 7711-3333-2