Марина Бэй Сэндс бол Сингапурын Марина эрэг дээр  байрлах цогцолбор амралтын газар юм. 2010 онд нээлтээ хийхдээ газрын үнийг оруулаад 6.88 тэрбум ам.доллар бүхий дэлхийн хамгийн үнэтэй бие даасан казиногийн үл хөдлөх хөрөнгө хэмээн нэрлэгдсэн байна.  Амралтын газар нь 2,561 өрөөтэй зочид буудал, 120,000 м2 хурлын болон үзэсгэлэнгийн танхимтай ба Марина бэе сэндс их дэлгүүр нь 74,000 м2 худалдаа үйлчилгээний талбайг эзэлдэг байна. Мөн "алдарт тогооч" нэртэй зоогийн газар, хоёр хөвөгч болор байшин, урлаг-шинжлэх ухааны үзмэрүүд, 500 ширээ, 1600 тоглоомын машинтай дэлхийн хамгийн доош цүлхийсэн хүнхэр дээвэртэй казино зэргийг агуулдаг байна. 

Энэхүү цогцолборт дэлхийн хамгийн том буюу 150метрийн урттай тавцан дээр байрладаг нийтийн усан бассейнтай 3902 хүний багтаамжтай 340 метрийн урттай орой хэсгээрээ холбогдсон гурван цамхган тэнгэрийн цэцэрлэг (SkyPark) байдаг байна. Домогт архитектор Moshe Safdie хойд талын  цамхаг буюу 66.5 м 20га талбай бүхий амралтын газрын дизайныг зохион бүтээжээ. Марина Бэй Сэндс нь анх 2009 онд ашиглалтад орох байсан ч дэлхийн санхүүгийн хямралаас үүдэн барилгын ажил удааширсан бөгөөд төслийн эздүүдийн хувьд  цогцолбор амралтын газрыг дуусгахын тулд өөр газар дахь төслүүдээ хойшлуулах шаардлага тулгарч байсан байна. 

Эзэмшигч нь цогцолбор амралтын газрыг үе шаттайгаар дарааллан нээхээр шийдвэрлэсэн ба  2010 оны 4-р сарын 27-нд казино нээгдсэний дараа  амралтын газар болон SkyPark нь мөн оны 6-р сарын 23, 24-нд   албан ёсоор нээгдэв. Харин театрийн барилгын ажил нь товлогдсон хугацаандаа буюу 11-р сарын 30-нд "Riverdance"-ийн анхны тоглолтоо хийх үед барилга бүрэн ашиглалтад орсон байв. Хиймэл мөс ашигласан дотор тэшүүрийн талбай 12-р сарын 18-нд Мишель Кваны тоглолтоор нээлтээ хийв. Урлаг шинжлэх ухааны музей нь олон нийтэд  2011 оны 2-р сарын 19-нд "гайхамшиг " нэртэй 13 минутын гэрэл, лазер, усны шоу хийж нээгдсэн ба үүгээр амралтын газрыг бүрэн ашиглалтад оруулсан байна. Марина Бэй Сэндсийн нээлт 2011 оны 2-р сарын 17-нд болсон ба сүүлчийн хэсэг болох хөвөгч павильонуудыг 2011 оны 9-р сарын 18, 22-нд тус тус нээжээ. Марина Бэй Сэндс ойрын ирээдүйд дөрөв дэх цамхагтай болох гэж ажиллаж байна.

Зураг төсөл, барилгын ажил

Энэхүү амралтын газрын дизайн загварыг Моше Сафди (Еврей гаралтай Израиль, Канад, Америкийн иргэншилтэй архитектор, хот төлөвлөгч, сурган хүмүүжүүлэгч, онолч, зохиолч. Сафди 50 гаруй жилийн карьертай бөгөөд тухайн газрын соёл газарзүйн байдал болон гүн ухааныг архитектуртаа шингээж ажилладагаараа алдартай нэгэн.  Тэрээр технологийн шинэчлэлийг байнга эрэлхийлдэг 20-р зууны хоёрдугаар хагас, 21-р зууны эхэн үед том байр суурьтай архитектор юм. Дизайны санаагаа анх хөзрөн байшингаас авчээ. Дизайны онцлог нь 2500 энгийн болон люкс өрөө бүхий 3 ширхэг зочид буудлын цамхаг бөгөөд хүлээлгийн танхим нь нэвт үргэлжлэн 3 цамхагийг сууриар нь холбосон байдалтайгаар загварчлагдсан байдаг. Казиногийн барилга нь төв хэсгээрээ задгай дээвэртэй дөрвөн давхар барилга байх бөгөөд нэг газарт  дөрвөн түвшний бооцоот тоглоомнуудаас гадна хөгжөөнт тоглоомны хэсэг ч бас цогцлоосон байдаг. Уг цогцолборт зочид буудал, казиногаас гадна бусад барилгууд буюу 45,000 хүртэлх хүний багтаамжтай 19,000 м2 Урлагийн, шинжлэх ухааны музей, 110,000 м2 талбай бүхий хурал уулзалтын төвүүд байдаг. 

Амралтын газрын архитектур, дизайны томоохон өөрчлөлтүүдийг  Фэн Шуйгийн зөвлөхүүд болох Чонг Сван Лек, Луиза Онг-Ли нартай хэлэлцэн хийсэн байна. Aedas (Уэльс улсад төвтэй архитектурын байгууллага) фирм нь бүхий л  зөвлөхүүдийг ажиллуулах, дизайныг боловсруулах, ерөнхий зохицуулах, хэрэгжүүлэх үүргийг гүйцэтгэж ажилласан ба бүтэц инженерчлэлийн ажлыг  Arup ( Англид төвтэй олон улсад үйл  барилга, дизайн инженерчлэл, архитектур болон зөвлөгөөний чиглэлээр үйл ажиллагаа явуулдаг байгууллага),  цахилгаан болон сантехникийн ажлыг Парсонс Бринкерхофф ( 14000 ажилтан бүхий олон улсад инженерчлэл дизайны үйл ажиллагаа явуулдаг байгууллага) -ын инженерүүд, гол гүйцэтгэгчээр “Ssangyong Engineering and Construction” компани ажилласан байна.   

Гурван цамхаг нь сууриндаа илүү өргөн, дээшлэх тусам нарийсдаг. Цамхаг бүр тэгш хэмтэй бус хоёр хөлтэй бөгөөд муруй зүүн хөл нь нөгөөгөө налсан байдалтай ба үүнээс шалтгаалан барилгын ажилд ихээхэн техникийн бэрхшээл учруулж байсан. Цамхгийн хөлийг барьж байх үед тулгуурууд дэмжих зориулалттай түр зуурын томоохон байгууламжуудыг барих шаардлага гарч байв. 

Зочид буудлын онцлог болсон тэнгэрийн цэцэрлэгт хүрээлэн ( sky park) нь барилгын дээд талд байрлах усан сан, цэцэрлэгт хүрээлэн, гүйлтийн зам бүхий гурван акр талбай бүхий цэцэрлэгт хүрээлэн юм. Цэцэрлэгт хүрээлэн нь гурван цамхгийн орой дээр гүүрлэн холбосон байдалтай байдаг. SkyPark-ийн их биеийг талбайгаас гадуур 14 тусдаа ган хэсэгт урьдчилан үйлдвэрлэж, дараа нь цамхгийн орой дээр угсарсан байна. Усан сангийн их бие доор дөрвөн хөдөлгөөнт холбоос байдаг бөгөөд тэдгээр нь цамхгийн байгалийн хөдөлгөөнийг тэсвэрлэхэд туслах зорилготой бөгөөд үе бүр нь өвөрмөц хөдөлгөөнтэй байдаг ба 500 миллиметр хүртэл хөдлөх боломжтой. Салхи болон урт хугацааны ашиглалтад гарч болох газрын гадаргын суултаас урьдчилан сэргийлэх үүднээс инженерүүд 500 цэгт тохируулга бүхий тусгай хөлнүүдийг усан сангийн доор байршуулж хийжээ. Энэхүү тохируулгатай систем нь тавцангийн ирмэг дээр байрлах асар том усан сангийн хэвийн ажиллагаанд чухал ач холбогдолтойгоор хийгджээ. 

Инфинити буюу “хязгааргүй” хэмээх усан сан

Төлөвлөлт 

Марина Бэй Сэндс нь Сингапурт цогцолбор амралтын газруудыг байгуулах төсөлүүдээс сонгогдсон хоёр саналын нэг бөгөөд нөгөө нь гэр бүлийн аялалд илүү тохиромжтой Юнивэрсал студиос Сингапур (Universal Studios Singapore)-ыг багтаасан Сэнтоза Ворлд Соёл амралтын хүрээлэн (Resorts World Sentosa) юм. Энэхүү хоёр том амралтын газар нь Сингапурын ирэх арван жилийн эдийн засаг, аялал жуулчлалын зорилтуудыг биелүүлэхийн тулд бүтээгдсэн бөгөөд казиногийн 30 жилийн лицензтэй байх юм. Тендерт оролцогчдыг аялал жуулчлалын сонирхол ба аялал жуулчлалд оруулсан хувь нэмэр, архитектурын шинэлэг санаа болон дизайн, бүтээн байгуулалтад төлөвлөгдсөн хөрөнгө оруулалт, хамтран ажиллаж буй түншүүдийн нөлөөлөл гэсэн дөрвөн шалгуураар үнэлэн шалгаруулсан байна. 2012 оны гуравдугаар улиралд Марина Бэй Сэндсийн орлого өмнөх оны мөн үеэс бараг 28 хувиар буурсан байна.

2019 оны 4-р сарын 3-нд Сэндс Сингапур дахь Марина Бэй Сэндс үл хөдлөх хөрөнгөө 3.3 тэрбум доллараар өргөтгөснөө зарлав. Өргөтгөлийн хүрээнд 1000 тансаг зэрэглэлийн люкс өрөө, 15,000 хүний суудалтай цэнгээний талбай бүхий дөрөв дэх зочид буудлын цамхаг барих юм.

Сингапурчууд болон Байнгын оршин суугчид (PR) нэг удаа ороход Сингапурт 100 долларын хураамж, жилийн тасалбарт 2000 сингапур долларын хураамж төлөх ёстой байсан бол 2019 оны 4-р сарын 4-нд нэг удаагийн нэвтрэх 150 сингапур доллар, жилийн айлчлалын 3000 сингапур доллар болгон өсгөжээ.

Орчуулсан: С.Мөнхцэцэг