“Монголын барилгын үндэсний ассоциаци” ТББ-ын Гүйцэтгэх захирал  Л. Хулан

Юуны түрүүнд шинэ үеийн барилгын салбар үүсэж хөгжсөний 95 жилийн ойн баярын мэндийг хүргэе.

Баярлалаа. Улс орны бүтээн байгуулалтын тэргүүлэх салбар болох “Барилгын салбар” үүсгэн байгуулагдсаны түүхт 95 жилийн ойг тохиолдуулан нийт барилгын салбарын үе үеийн ахмадууд, салбарын алдар гавьяатнууд, өнөөдрийн бодлогыг боловсруулж буй төр засгийн удирдлагууд, хөгжлийг тодорхойлж буй аж ахуйн нэгж, бүтээн байгуулагчид Та бүхэндээ “Монголын барилгын үндэсний ассоциаци ТББ”-ын Ерөнхийлөгчид, Удирдах зөвлөлийн гишүүд, нийт гишүүд, хамт олон болон өөрийн нэрийн өмнөөс ойн баярын мэндийг уншигч Та бүхэндээ хүргэж байгааг хүлээн авна уу.

МБҮА ТББ нь үүсэн байгуулагдсанаас хойш үйл ажиллагааныхаа цар хүрээг хэрхэн тэлж, мөн баталсан стратеги төлөвлөгөөгөө хэрхэн хэрэгжүүлж буй талаар танилцуулахгүй юу?

Манай МБҮА ТББ нь “Гишүүн байгууллагуудынхаа ашиг сонирхлыг хуулийн хүрээнд хамгаалж төлөөлсөн, үндэсний болон олон улсын хэмжээнд хүлээн зөвшөөрөгдсөн, барилгын салбарт үйл ажиллагаагаа явуулж буй ТББ-уудын манлайлагч, мэргэжлийн  байгууллага байна” гэсэн АЛСЫН ХАРАА-тай, “Барилгын салбарт сайн засаглалыг бий болгоход төр-хувийн хэвшлийн хамтын ажиллагаа ба уялдааг сайжруулснаар хууль эрх зүйн орчинд шинэчлэлийг хийхэд нөлөөлөх, олон улсын барилгын гэрээний зарчим, тэргүүний техник, технологийг нэвтрүүлэх, үл хөдлөх хөрөнгийн зах зээлийг хөгжүүлэх, ижил төстэй гадаад, дотоодын төрийн бус байгууллагуудтай хамтран ажиллах үйл ажиллагааг эрхлэн явуулах, гишүүдийн чадавхыг сайжруулж барилгын зах зээлийн тогтвортой өсөлтийг хангахад хувь нэмрээ оруулна” гэсэн ЭРХЭМ ЗОРИЛГО-тойгоор анх 2009 онд үүсгэн байгуулагдаж, эгнээндээ барилга, бүтээн байгуулалтын салбарт идэвхтэй үйл ажиллагаагаа явуулж буй барилгын салбарыг тэргүүлэгч томоохон хөрөнгө оруулагч, үл хөдлөх хөрөнгийн хөгжүүлэгч, реалтор, барилга угсралт, архитектур, зураг төсөл, барилгын материалын үйлдвэрлэгч, ханган нийлүүлэгч чиглэлийн компаниудын үндэсний бүтээн байгуулагчдыг сайн дурын үндсэн дээр нэгтгэж, гишүүддээ, нийгэмдээ үйлчлэхээс гадна төрийн зарим чиг үүргийг гүйцэтгэдэг салбарын мэргэжлийн, манлайлагч, олон улсын хэмжээнд хүлээн зөвшөөрөгдсөн хамгийн том нэгдэл болох төрийн бус байгууллага болсон байна. Үүсгэн байгуулагдсанаасаа хойших 13 жилийн хугацаанд МБҮА ТББ нь хоёр удаагийн Стратеги төлөвлөгөөгөө амжилттай хэрэгжүүлэн ажиллаж, дараагийн “МБҮА ТББ-ын СТРАТЕГИ ТӨЛӨВЛӨГӨӨ 2020-2024”-г өнгөрсөн 2019 онд хуралдсан Бүх гишүүдийн чуулганаар хэлэлцэн амжилттай шинэчлэн боловсруулж, шат дараатайгаар 9 Хороодын зохион байгуулалттайгаар хэрэгжүүлж эхлээд байна. 

Мөн гадаад хамтын ажиллагаагаа өргөжүүлэх ажлын хүрээнд ямар ажлууд хийгдэж байна? 

МБҮА ТББ нь олон улсад хүлээн зөвшөөрөгдсөн байгууллагын хувьд гадаад хамтын ажиллагаагаа улам өргөжүүлэн тэлж амжилттай ажиллаж байна. Энэ асуудлын хүрээнд бид IFAWPCA буюу Ази, номхон далайн Гэрээлэгчдийн олон улсын нийгэмлэгт 2015 онд элсэн орж байсан бол 2018 онд тус нийгэмлэгийн Удирдах зөвлөлийн гишүүнээр сонгогдон ажиллаж байна. Энэ байгууллагын гишүүн болсноор бусад гишүүн орнуудын барилгын холбоонуудтай хамтран ажиллах, туршлага судлах, улмаар Монгол Улсдаа барилгын салбарын дэвшилтэт технологи, ногоон барилгын концепцийг нутагшуулах болон ФИДИК-т гишүүнээр элсэж, түүний гэрээг нэвтрүүлэн хэрэгжүүлэх асуудал дээр ажиллаж байна. Түүнчлэн, бид өөрсдийн нийгмийн хариуцлагын хүрээнд Улаанбаатар хотод тулгараад буй агаар, хөрсний бохирдлыг бууруулахын төлөө Улаанбаатар хотын агаарын бохирдлыг бууруулах зорилготой Европын Холбооны санхүүжилттэй “ДУЛААН ШИЙДЭЛ” төслийг Монгол Улс дахь Франц Улсын Жэрэс Монгол ОУ-ын ТББ болон салбарын бусад түншлэгч байгууллагуудтай 2018 оноос эхлэн хэрэгжүүлж байна. 

“Дулаан шийдэл” төслийн хүрээнд гэр хорооллын амины орон сууцны дулааны алдагдлыг бууруулах технологийг боловсруулж, үүний дагуу барилгын салбарт үйл ажиллагаагаа явуулж буй хувь хүн, бичил, жижиг, дунд бизнес эрхлэгчид (бригад)-ийг чадваржуулснаар мэргэжлийн чадварлаг ажиллах хүчнийг хөдөлмөрийн зах зээлд бэлтгэн нийлүүлэх боломжийг бүрдүүлж, КОВИД-19 цар тахлын хүнд хэцүү үед ч бригадуудаа ажлын байраар ханган ажилласаар байна. Төслийн баг нь “Дулаан шийдэл” төслийн зорилтот бүлгийг зөв тодорхойлж үйл ажиллагаагаа хөрсөн дээр буулган хэрэгжүүлсэн нь бодит үр дүнгээ өгч, бригадууд болон хэрэглэгчдийн эрэлт, хэрэгцээг шийдэж чадсан төсөл болсон бөгөөд “Ази дахь Шилдэг төсөл”-өөр шалгарсан болно. Цаашид төслийг дараагийн 2 дахь шатанд хэрэгжүүлэх хүсэл эрмэлзэлтэйгээр түншлэгч нартайгаа хамтран төслийн саналыг боловсруулан Европын Холбоо руу саяхан илгээгээд байна.

Барилгын салбарын ажлын байрны цахим системийг хөгжүүлэх зорилготой төслийн хэрэгжилт нь ямар шатандаа хэрхэн хэрэгжиж байна?

МБҮА ТББ нь барилгын салбарын хөдөлмөрийн зах зээл дэх үр ашиг, өрсөлдөх чадварыг дээшлүүлэх, ажлын байрыг нэмэгдүүлэх, Ковид-19-ийн цар тахлын улмаас барилгын салбарын үйл ажиллагааны уналтыг багасгахын тулд барилгын салбарын бичил, жижиг, дунд бизнес эрхлэгчид (БЖДБЭ), бригадууд, хувь хүмүүс болон барилгын тусгай зөвшөөрөлтэй компаниудыг хамруулсан ажлын байрны цахим системийг бий болгох зорилгын хүрээнд Германы олон улсын хамтын ажиллагааны нийгэмлэг (GIZ)-ийн “Ур чадварыг дээшлүүлэх нь” төсөлтэй хамтран “АЖЛЫН БАЙРНЫ ЦАХИМ СИСТЕМИЙГ ХӨГЖҮҮЛЭХ” богино хугацааны төслийг 2021 оны 2-р улиралд эхлүүлэн ажиллаж, уг системийг тун удахгүй бүрэн ажиллагаанд оруулах гэж байна.

Манай хөгжүүлж буй энэхүү цахим систем нь Монгол Улсын барилгын салбарын ажиллах хүчний нөөцийг цахимаар бүртгэлжүүлэх хамгийн эрэлт, хэрэгцээтэй анхны систем болж байгаагаараа онцлогтой бөгөөд уг системийг бий болгосноор Ажил хайгч (БЖДБЭ) болон Ажил олгогч (Барилгын захиалагч компаниуд, БЖДБЭ) нар нь ажлын байрны нэгдсэн цахим системээр дамжуулан дундын зуучлалгүйгээр хоорондоо шууд холбогдож, хүсэж буй ажлын зар, гүйцэтгэх ажил, барилгын гэрээт ажлуудын талаарх мэдээ, мэдээллийг түргэн шуурхай олж авахаас гадна барилгын салбарын дүрэм, журам, стандарт, норм нормативын талаарх мэдээ, мэдээлэлтэй танилцах боломжийг олгох болно. 

Энэ цахим системийг бий болгохоор анх санаачилсан МБҮА ТББ-ын хувьд БАРИЛГЫН САЛБАРЫН АЖИЛЛАХ ХҮЧНИЙ НЭГДСЭН МЭДЭЭЛЛИЙН САН-г үүсгэснээр Монгол Улсын салбарын ажиллах хүчний тогтвортой байдлыг хадгалахад өөрсдийн хувь нэмрийг оруулах, улмаар төр-засгийн холбогдох байгууллагуудын мэдээ, мэдээллийг хүргүүлэх, улмаар хууль, эрх зүй, бизнесийн бодлогын бичиг баримтад холбогдох асуудлыг тусгах түвшинд дуу хоолойгоо гаргах, зөв шийдэл, шийдвэрийг гаргуулахад нөлөөлөх давуу талтай билээ.

Энэхүү системийг бий болгосноор бизнес эрхлэгчдэд болон компаниудад ямар давуу талууд гарах вэ?

Бичил, жижиг, дунд бизнес эрхлэгчид (БЖДБЭ), бригадууд, хувь хүмүүс болон Барилгын тусгай зөвшөөрөлтэй компаниудын боловсон хүчний мэргэжлийн ур чадвар, чадавх, ажлын туршлага ба хугацаа, ажлын байрны байршлууд, ажлын гүйцэтгэлийн хэмжээ, нарийвчилсан тоон үзүүлэлт, гэрээт ажлын гүйцэтгэлийн үнэлгээ зэргийг харуулах давуу талтайгаас гадна уг системийн хэрэглэгч болох байгууллага, бригадуудын хувьд системд өөрсдийн хувийн профайлтай болох бөгөөд системээр дамжуулан үнэн зөв, ил тод, нээлттэй, тодорхой, ойлгомжтой, оновчтой мэдээллийг өгөх, өөрийн байгууллагын үйл ажиллагааг бусдад таниулах, сурталчлах, нэр хүндээ өсгөх, улмаар одоогийн ажиллах хүчний тогтвортой үйл ажиллагааг нэмэгдүүлэх, хоорондын хамтын ажиллагааг сайжруулах, барилгын ажлын явцыг хурдасгах, улмаар барилгын салбарын мэргэшсэн боловсон хүчнийг бэлтгэх, чадваржуулах бодлогод чиглэсэн зэрэг олон асуудлуудыг шийдэх болно. 

Иймээс энэхүү цахим системийг БАРИЛГЫН САЛБАРЫН МЭДЭЭЛЛИЙН НЭГДСЭН САН болон E-Монгол системд холбох тул барилгын салбарт гар бие оролцож буй нийт аж ахуйн нэгж, байгууллага, бригад, ажиллагсад, инженер-техникийн ажилтан бүрийг уг системд бүртгүүлж, барилгын салбарынхаа хөгжил дэвшилд өөрсдийн хувь нэмрийг оруулахыг уриалж байна.