УИХ-ын гишүүн Э.Бат-Амгалангийн урилгаар Барилга, хот байгуулалтын сайд Б.Мөнхбаатараар ахлуулсан баг хамт олон Баянзүрх дүүргийн удирдлагуудтай уулзаж ирэх 2022 онд дүүрэгт хийж хэрэгжүүлэх ажлын талаар санал бодлоо солилцлоо. Уулзалтаар Дүүргийн өмнө тулгамдаж байгаа асуудлууд болон хийж хэрэгжүүлж байгаа ажлуудаа танилцууллаа.

Баянзүрх дүүрэгт нийт 62.6 тэрбум төгрөгийн ажил хийгдэж байгаа. Үүнээс БХБ-ын Сайдын багцад гудамж, замын гэрэлтүүлэг, хөрсний бохирдол бууруулах, гудамж талбайн тохижилт, үерийн далан гээд 10.2 тэрбум төгрөгийн төсөл хөтөлбөр хэрэгжүүлэхээр тусгагджээ.

Тус дүүрэг нь 105 800 өрхтэй, 30 гаруй мянган аж ахуй нэгж, 130 гаруй худалдааны төв үйл ажиллагаа явуулдаг гээд нийслэлдээ хамгийн том дүүргийн нэг. Тиймээс ч хийж хэрэгжүүлэх ажил багагүй байгааг тус дүүргийн Засаг дарга танилцууллаа.

БХБ-ын Сайд Б.Мөнхбаатар хэлэхдээ аливаа бүтээн байгуулалтын асуудалд зураг төсөл чухал байдаг. Өнгөрсөн онд 30 гаруй тэрбум төгрөгийг зураг төсөлд суулгасан байна. Зураг төсөл, төлөвлөлт сайн хийгдсэн газар бүтээн байгуулалт сайн төлөвлөлттэй хийгдэнэ гэдгийг онцоллоо. Мөн дүүргийн хувьд 18 төсөл хөтөлбөр удаашралтай байгаагаа учирласан. Тиймээс БХБЯ-ны хэдэн ажил, хаана гацаад байгааг судалж, газар дээр нь ажиллахыг харьяа байгууллагын холбогдох удирдлагуудад даалгалаа. Түүнчлэн салбар хоорондын уялдаа холбоогоо сайжруулж гар нийлж, нэг чигт харж ажиллах нь чухал гэдгийг үгэндээ онцоллоо.

Энэ үеэр УИХ-ын гишүүн Э.Бат-Амгалан “Барилга, хот байгуулалтын яамны удирдлагууд миний урилгыг хүлээн авч баг хамт олон бүрэн бүрэлдэхүүнээрээ Баянзүрх дүүрэгт ажиллаж байгаад талархаж байгаагаа илэрхийлсэн . Яамдууд анхан шатан дээрээ ирж, тулгамдсан асуудлыг мэдэрч байгаа энэ нөхцөл байдал анхных гэдгийг үгэндээ дурьдлаа.

Баянзүрх дүүргийн хувьд өнгөрсөн хугацаанд тохижилт, гэрэлтүүлэг, зам засвар, бүтээн байгуулалтын ажил хийж байгаагаас гадна шинээр 300 га талбайд Улаанбаатар хотын ундны усны нөөц, иргэдэд зугаалж амрах орчинг бүрдүүлэхээр International Garden Of Mongolia буюу Олон Улсын цэцэрлэгт хүрээлэнг байгуулахаар ажиллаж байгаа юм.