Хонконгийн Шинжлэх Ухаан, Технологийн Их Сургуулийн оюутны байрны барилгын зураг төсөл нь цаашдын 50 жилийн хугацаанд тогтвортой барилгын практик арга барилыг үйл ажиллагааны стратеги, дижитал дизайны дэвшилтэт технологитой хослуулсан инновацыг "техник технологи, инновацыг ашиглан өнөөгийн дэлхий ертөнцөд тулгамдсан чухал асуудлуудыг шийдвэрлэнэ" хэмээх эрхэм зорилгод тулгуурлан хийгдсэн байна. 

2023 онд ашиглалтад оруулахаар төлөвлөж буй тус оюутны байр нь 1500 гаруй оюутны танхимуудтай бөгөөд зураг төслийг Архитектор Zaha Hadid болон Leigh & Orange Архитектурын компани хамтарч боловсруулжээ.

Орон зайн зохицуулалт

HKUST кампус /оюутны байрыг бүхэлд нь кампус гэж нэрлэнэ/-ын зүүн өмнөд хэсэгт байрлах шинэ оюутны байр нь ойролцоогоор 25м-ийн налуугийн өндөртэй дэнж дээр баригдах аж. Барилгын дээврийг кампусын хойно байрлах сургалтын байрнууд болон өмнөд хэсгийн дотуур байрнуудыг хооронд нь холбосон явган хүний зам болгон ашиглахаар загварчилжээ. Ингэснээр багш, ажилтнууд, оюутан залуус кампусын уулархаг замаар тойрч явах шаардлагагүй гэж үзжээ. Мөн чөлөөт цагаа өнгөрөөхөд зориулсан сүүдрэвчтэй талбайг дээврийн хэсэгт багтааснаар кампус дахь олон нийтийн харилцааг бэхжүүлнэ хэмээн үзэж байгаа юм.

Дотуур байрны өрөөнүүдийг зургаан өнцөгт хэлбэрээр загварчилсан бөгөөд эгц налуу дэнж дээр дөрвөн оюутны байрыг барих юм. Бүх өрөөнүүд нь задгай талбай руу чиглэсэн төдийгүй хичээл хийх, амралт чөлөөт цагаа өнгөрүүлэх 35,500м.кв орчим нийтийн зориулалтын талбайг багтаасан байна. Дотуур байрны хашаа нь амрах, алжаал тайлахад зориулагдсан бол эргэн тойрны хөрсөнд элэгдэл үүсэхээс урьдчилан сэргийлж мод тарих, биеийн тамирын дасгал хийх, олон нийтийн үйл ажиллагаа зохион байгуулахад зориулан тохижуулахаар төлөвлөжээ.

Дотуур байрнууд нь гурван өөр хэлбэрийн зохион байгуулалттай ба нэг болон хоёр хүний хэд, хэдэн унтлагын өрөөнүүдийн голд нийтийн эзэмшлийн орон зайг хуваарилсан байна. Энэ нь нэг байранд 18-36 оюутан нийлж нэг "өрх" болох ба тэдэнд хоорондоо эвтэй байх ойлголтуудыг суулгах зорилготой юм.

'Y' хэлбэрийн дотуур байр нь хичээл хийх, амрах өрөө, гал тогоо бүхий 27 оюутны багтаамжтай бол, 'V' хэлбэрийн дотуур байр нь доод давхардаа гал тогоо - хоолны өрөө, дээд давхардаа нам гүм хичээл хийх өрөө бүхий өндөр таазтай 36 оюутны багтаамжтай хо давхар байшин юм. "Шугаман" хэлбэрийн дотуур байр нь 18 оюутны багтаамжтай бөгөөд гал тогоо, зочны өрөөг нэгтгэсэн нээлттэй талбай бүхий зохион байгуулалттай ба шаардлагатай үедээ хаалтаар тусгаарлах боломжтой аж.

Унтлагын өрөөний гол шаардлага нь хувийн эд зүйлсийг агуулах багтаамжийг тавилга угсралтын шийдэлд хийж өгснөөр орон зай ашиглалтыг дээд зэргээр бүрдүүлжээ. Дотуур байрны бүх унтлагын өрөө барилгын нэг байрлалд байрших бөгөөд нийтийн эзэмшлийн талбайгаас гарах дуу чимээг тусгаарлахын тулд нэмэлт үүдний өрөөгөөр тусгаарласан байна. 

Нарийн тооцоолол бүхий BIM болон 3D загварчлал ашигласан барилгын угсармал бүтэц

Барилгын мэдээллийн загварчлал (BIM), 3D загварчлалын технологи нь дизайны зохицуулалт, материал сонголтыг оновчтой болгодог бол зураг төслийг гүйцэтгэхдээ барилгын стратегийг хамтад нь боловсруулах нь нийлүүлэлт болон барилгын ажлын явцыг өндөр үр ашигтай байдлаар хийж гүйцэтгэх боломжийг олгодог байна. 

Хонконгийн Засгийн газраас гаргасан барилгын чанарыг сайжруулах, барилгын гүйцэтгэлд зарцуулах цаг хугацаа, хог хаягдлыг багасгах санаачилгын дагуу тус барилгын модульчилсон системд урьдчилан бэлдсэн угсармал фасад болон газар дээр нь угсрах боломжтой бэлэн угаалгын өрөөг багтаасан байна. 

Угсармал фасадын хэсгүүдэд 70 миллиметрийн зузаантай дулаан тусгаарлагч давхарга болон бага дулааны коэффициент бүхий вакуум цонхнуудыг урьдчилан угсарч бэлтгэсэн байна. 

Нарны гэрлийн тусгал, дулаан хуримтлалын дижитал зураглалын тооцоо нь цонх тус бүрийн дээр байрлуулах сүүдрэвчийг хэрхэн суурилуулахыг тооцоолдог. Барилгын дотоод дулааныг хангахын тулд фасад болон цонхны хэсэг нарны туяанд өртөх байдлаас хамаарч сүүдрэвчийн зузаан, урт нь харилцан адилгүй байдаг. 

Технологи болон нийтийн эзэмшлийн орон зай

Дижитал загварчлалын хэрэгслүүдийг тухайн нутаг дэвсгэрийн гадаргуу, нарны цацраг, үзэгдэх байдал, хөрсний нөхцөл зэрэг олон үзүүлэлтүүдийг нэгэн зэрэг тооцоолох боломжтой болгодог тул зураг төслийг оновчтой  гаргах мөн чиг хандлагыг тодорхойлоход ашиглажээ. 

Харин дотоод орон зайны тоон кодчиллыг ямар ч нөхцөлд тэсвэртэй, дасан зохицох чадвартай орон зайн загварчлалыг боловсруулах, мөн байгалийн гэрлийн төвшнийг нарийвчлалтайгаар тооцоолоход ашигласан байна.

Мөн дижитал зураглалын тооцооны дагуу угсрагдаж буй урьдчилан бэлтгэсэн фасадын нэгж тус бүрийн хавтгай хэсгүүдэд нарны дулааны нэмэгдлийн тооцооноос хамаарч янз бүрийн өнгийн керамик хавтангуудыг ашигладаг байна.

Давхар тус бүрийн дотоод орчны системийг сургуулийн төвлөрсөн сүлжээтэй нэгтгэсэн байна. Далайн усыг хөргөж ашигладаг төвийн хөргөлтийн станцыг хэсэгчилсэн хөргөлтийн системд нэвтрүүлснээр эрчим хүчний хэрэглээг мэдэгдэхүйц бууруулдаг байна. Энэхүү төвийн ухаалаг систем нь дотуур байрны оройн цагийн эрчим хүчний эрэлтээс хамаарч хичээлийн байрны өдрийн цагийн эрчим хүчний хэрэгцээг урьдчилан тооцоолон тэрхүү хэрэгцээг хангах боломжтой болгох юм. 

Оюутны байрнуудын дээвэр нь оюутнуудын хөдөлгөөний гол зам тул дулаан болон дуу чимээний тусгаарлагчийг хангалттай хэмжээгээр суурилуулсан. Харин дээврийн оюутан зорчдоггүй хэсэгт сэргээгдэх эрчим хүчийг хуримтлуулдаг нарны зайн хураагуурыг тус сургуулийн Clear Water Bay дахь кампусаа нүүрстөрөгчийн агууламжгүй үйл ажиллагаанд шилжүүлнэ гэсэн амлалтын дагуу суурилуулсан байна.

ТӨСЛИЙН МЭДЭЭЛЭЛ

Төслийн нэр: Хонконгийн Шинжлэх Ухаан Технологийн Их Сургуулийн оюутны дотуур байрны барилгын зураг төслийн боловсруулалт

Дизайнер: Zaha Hadid Architects компани

Тэргүүлэх архитектор: Leigh & Orange (L&O)

Барилгын үйлчилгээний инженерчлэл: WSP Asia

Бүтцийн болон Геотехникийн инженерчлэл: WSP Asiaё

Фасадын инженерчлэл: WSP Asia & Inhabit

Орчны тохижуулалт: Earthasia

Санхүүгийн зөвлөхөөр: Rider Levett Bucknall

Тогтвортой байдлын зөвлөх: WSP Asia; L&O

Тээвэрлэлт : MVA Asia

Зураг: Zaha Hadid Architects

Эх сурвалж:  https://www.constructionplusasia.com

Орчуулсан: О.Наранцэцэг