Жил ирэх тусам иргэдийн хандлага агаарын бохирдол , цар тахлаас үүдэж эрүүл агаарт эдлэн газартаа тав тухтай орчин бүрдүүлж эрүүл амьдралын хэв маягийг илүүд үздэг болсон. Энэ ч үүднээс амины орон сууцад амьдрах сонирхолтой иргэдийн эрэлт нэмэгдсээр байна.

Амины орон сууцтай болохоор төлөвлөж буй иргэдийн хандлага нь эдийн засгийн хэмнэлттэй, ашиглалтын зардал бага, эрүүл мэнд байгаль экологид ээлтэй, ногоон барилгын стандартад нийцсэн гэх мэтчилэн олон хүчин зүйлд анхаарч сонголтоо хийдэг болсон. Ногоон барилгын стандартыг мэдэж байх хэрэгтэй. Гадна, дотроосоо сайхан байшин байлаа ч хүний эрүүл мэндэд сөрөг нөлөөтэй өөрөөр хэлбэл, гаднаа гяланцаг дотроо паланцаг байшин босвол асуудал араасаа дагуулж, үргүй зардал гарсаар байх болно. Эрүүл мэнд, байгаль орчинд ээлтэй, ашиглалтын зардал багатай байх, нөөцийг үр ашигтай ашигласан байх, барилгын ажлын төлөвлөлт, архитектурын шийдэл хийхээс эхлээд барилгыг барих үйл явц, ашиглаж буй барилгын материал, барилгын дотоод, гадаад орчин зэргийг бүхэлд нь цогцоор нь авч үзнэ. Ногоон барилгыг хэрхэн төлөвлөснөөс хамаарч зардал харилцан адилгүй. Ердийн барилгыг бодвол шаардлагад нийцэх барилгын материал, үнэ, чанар, мэргэшсэн ажиллах хүч, ухаалаг систем гэх мэт анхны хөрөнгө оруулалтын хэмжээ өндөр байдаг. Гэсэн ч ашиглалтын явцад урсгал засварын зардал багатай, эрчим хүчний хэмнэлт гэх зэргээр хөрөнгө оруулалтаа нөхөх бүрэн боломжтой. Нэг ёсондоо чанартайг сонгож эцэст нь бага төлнө гэсэн үг. Барилгын материалын чиг хандлага ч үүнийг дагаад үйлдвэрлэгчид, дэлхийн брэндүүд чанар гэхээсээ илүүтэйгээр хүний эрүүл мэндэд ээлтэй байх талаас нь бодолцож, эрүүл эко бүтээгдэхүүн үйлдвэрлэх тал дээр анхаарах хандлагатай болсон. 

Иргэдийн сонирхол 80 м2-100 м2 амины орон сууцыг сонгож байна. 

Иргэдийн хандлага жилийн дөрвөн улиралд амьдрах боломжтой хэт нүсэр том байшин гэхээсээ илүүтэйгээр өөрийн хэрэгцээ шаардлага, санхүүгийн боломж, ашиглалтын зардал зэргээ нарийн тооцоолж, 80м2-100м2 хүртэлх нэг давхар амины орон сууцыг түлхүү сонирхож байна. Архитектурын хувьд уламжлалт загвараас татгалзаж, орчин үеийн модерн хэв маягийг илтгэсэн, үнэ цэнэтэй харагдахуйц шийдлийг сонгож байна. Энэ жилийн иргэдийн хүсэл сонирхолд нийцсэн онцлох зураг төслийн ажлуудаас танилцуулж байна. 

Энэхүү амины орон сууцны зураг төсөл нь 98,2 м2 талбайтай

Өрөөний зохион байгуулалт нь: Зочны өрөө, гал тогоо, техникийн өрөө, ариун цэврийн өрөө, унтлагын өрөө-3, гонх зэргийг төлөвлөж өгсөн. Архитектур дизайны хувьд шалнаасаа тааз хүрсэн саруул том цонх, Япон хэв маягийг илтгэх экстерьер, интерьерийг тусгаж өгсөнөөрөө олон давуу талтай. Өдрийн турш байгалийн гэрэл нэвт тусаж, нарны дулааныг шингээдэг бөгөөд эрчим хүчний хэмнэлттэй.

Барилгын хийцлэлийн хувьд Мак-ын евро стандартын 3,75-тай блок, Герман стандартын 3-н давхар вакум цонх гэх мэт дулаан алдагдал багатай хийцлэлийг сонгосон. 

Интерьер дизайн: Стандарт амины орон сууц 

Орчин үед овор хэмжээ ихтэй, том тавилга, эд хогшилоос татгалзах болсон. Интерьер дизайны хувьд элдэв хэв маяг гэхээсээ илүүтэйгээр минималист хэв маягийг түлхүү сонгодог болсон. Минималист хэв маягийн давуу тал нь өөрийн сонирхдог дуртай бүтээлээр гэрээ чимэх, түүнээсээ таашаал авч, амьдралын хэв маяг бүтээмжид нөлөөлнө. Хэт эрээлжилсэн тохижилт нь гэрийн орон зайг эмх замбараагүй, жижиг харагдуулахаас гадна интерьер дизайны зохилдолгооны утгыг алдагдуулдаг. Иймд сүүлийн үеийн амины орон сууцнууд дотоод тохижилтондоо өрөөг эмх цэгцтэй, саруул том харагдуулах, байгалийн хэв шинжийг агуулсан материалын хийцлэлийг түлхүү сонгодог болсон. 

Сүүлийн үеийн заслын барилгын материалд байгалийн хэв маягийг илтгэсэн гоёлын чулуун хавтан, модон материал, цулгуй обой, эко будагнууд давамгайлах болсон. Жижиг м2-тай амины орон сууцны шал, хананы өнгө гэгээлэг цайвар байх тусмаа орон зайг саруул харагдуулдаг.  

Мөн орчин үед хананы хийцлэлийг шилэн хаалтаар хийх трэнд дэлгэрсэн. Энэхүү шийдэл нь таны үнэ цэнэтэй үл хөдлөх хөрөнгийн үнэ цэнийг улам ч илүү тодотгох болно.

Амины орон сууцны барилга архитектурын чухал нэг элемент бол гадна тохижилт, террас юм. Байшинтайгаа залгаа террас төлөвлөх нь таны байшингийн талбайн хэмжээ том үзэмжтэй харагдах төдийгүй, тав тухыг мэдрүүлнэ. 

Хэдхэн жилийн өмнө иргэдийн хандлага барилга байшингын гадна үзэмжийг л чухалчилдаг байсан бол одоо үед мэргэжлийн талаас нь хийцлэл болоод материалын чанар стандарт, төлөвлөлт, хүүхэд болон өндөр настан, хөгжлийн бэрхшээлтэй иргэдэд ээлтэй талаас нь буюу ухаалаг сонголт хийдэг болсон. 

80м2-100 м2-тай амины орон сууцны төлөвлөлтөд 2 унтлагын өрөө, зочны өрөө, гал тогооны хэсэг, ариун цэврийн өрөө, гараашийг ихэвчлэн төлөвлөж өгдөг. Өрөөний зохион байгуулалт, төлөвлөлт хийхэд тохиромжтой. 

150 м2 Модерн хаус  

Тансаг зэрэглэлийн амины орон сууц, хаус  бариулхаар сонирхож буй иргэдийн хувьд 120м2-200м2 хүртэлх хэмжээгээр зураг төсөл төлөвлөлтөө хийлгэж байна. Үүнээс харахад амины орон сууцтай болохоор төлөвлөж буй иргэдийн хандлага хэт нүсэр том төлөвлөлтөөс татгалзаж ашигтай төлөвлөлтийг чухалчилдаг болжээ. Мөн гадна тохижилт ландшафтандаа ихээхэн анхаардаг болсон. Өөрийн газрын онцлогоосоо шалтгаалж гадна тохижилтоо зардал бага өнгө үзэмжтэйгээр хийдэг болсон. Байгалийн өвөрмөц тогтоцтой, уулархаг өндөржилттэй газартай бол байгалийн хэв маягаа илүү тодотгож өгсөн байгалийн чулуу, мод бут, сөөг гэх мэт натурал харагдахуйц тохижилтыг төлөвлөж байна. Иймд хамгийн чухал нь өөрийн газарын онцлог, хэрэгцээ шаардлага, санхүүгийн боломж, ашиглалтын зардалаа сайтар тооцоолж, мэргэжлийн байгууллагаас зөвлөгөө авч шийдвэрээ гаргаарай. 

Цар тахлын улмаас хүмүүс хотын төвлөрлөөс хол, байгальд ойр байрлалыг сонгох болсон. Үүнийгээ дагаад амины орон сууцны эрэлт амины орон сууцны архитектурын шийдэл, интерьерийн чиг хандлага хэрэглэгчдийн хүсэл шаардлагад нийцэхүйц өрөөний төлөвлөлтүүд хувийн орон зай буюу ажлын өрөө, амралтын хэсэг, ландшафт гадна тохижилт цэцэрлэгжүүлэлт, зэрэг нэгдсэн цогц бүтээн байгуулалтыг сонирхож байна. 

Сүүлийн жилүүдэд амины орон сууцны экстерьер буюу гадна фасадны шийдэлд ихээхэн өөрчлөлт гарсаар байна. Гадна фасад гэдэг бол тухайн үл хөдлөх хөрөнгийн үнэ цэнийг шууд илтгэнэ. Барилгын үндсэн деталь, хэлбэр хэмжээ, цонхны хуваалт, дээвэр зэрэг олон хүчин зүйлийн зохилдолгоог үндэслэж гадна экстерьерийхээ өнгө дизайныг төлөвлөх хэрэгтэй. Энэхүү 150 м-2 хаусны хувьд орчин үед трэнд болж буй дуплекс маягийн өндөр цонх, 2 давхартаа мөн л трэнд болж буй булангийн үргэлж цонх төлөвлөж өгсөн нь тухайн барилгын модерн хэв маягийг тодотгон өгч байгаагаараа онцлогтой. Энэхүү хаусны үнэ цэнийг илтгэж буй чухал хэсэг бол нүүрэн талын гоёлын чулуу юм. Барилга байшингийн үнэ цэнийг нэмдэг материал бол яалт ч үгүй байгалийн чулуу юм.  

Өрөөний төлөвлөлтүүд

Сүүлийн үеийн төлөвлөлтүүд дээр ихээхэн ахиц дэвшил, өөрчлөлтүүд гарч байна. Хүний хэрэгцээ шаардлага, хүсэл сонирхол цаг үетэйгээ нийлүүлэн өөрчлөгдөн хувьсаж байна. Гадны өндөр хөгжилтэй төсөл хэрэгжүүлэгч компаниуд байшингаа барихаасаа өмнө захиалагчийн хүсэл сонирхол, амьдралын хэв маяг, хобби, гадаад дотоод орчны тохижилт гэх мэт бүх төлөвлөлтийг хүний аз жаргалтай, амьдралаас таашаал авах мэдрэмж тал дээр тооцоо судалгаан дээр үндэслэж барилгын төлөвлөлтийг хийдэг. Манай ихэнх төсөл хэрэгжүүлэгч компаниуд өнөөх л уламжлалт маягаараа төлөвлөлт хийдэг. Заавал том м2-тай өрөөнд гоё сайхан төлөвлөлт хийдэг гэсэн ойлголтоосоо салах хэрэгтэй. Япончуудын жишээ байна. Жижиг м2 тай өрөөнд ч оновчтой төлөвлөлт хийдэг. Тавилга хэт нүсэр том байх албагүй.

Орчин үед ашигтай талбайгаа зөв зохион байгуулалттайгаар ангилан төлөвлөж байна. Жишээ нь: Хувцасны өрөө, зоорь агуулахын өрөө, чөлөөт цаг өнгөрөөх тоглоомын өрөө, ажлын өрөө, фитнесс дасгалын өрөө, саун жакузи алжаал тайлах өрөө гэх мэт хэрэгцээ шаардлага хүсэл сонирхолдоо нийцүүлэн төлөвлөж байна.

Том хаус барьчихаад хэрэгцээгүй олон өрөө төлөвлөөд яах учраа олохгүй байгаа бол өөрийн болон гэр бүлийнхээ хүсэл сонирхол хоббитойгоо уялдуулан шинэлэг төлөвлөлт хийж, хашаандаа “Хаан шиг ч амьдрах” боломжтой.