Монголын барилгын салбарт байр сууриа баттай эзэлсэн “ИЭК Монгол” компани үүсгэн байгуулагдсаны 15 жилийн ой тохиож байна. 

Цахилгаан тоноглол, хэрэгсэл борлуулах Монголын анхны сүлжээ; www.emontaj.mn онлайн дэлгүүр; хэрэглэгч, харилцагчдад зориулсан мэргэжлийн зөвлөгөө, үйлчилгээ; мэргэшүүлэх сургалт, семинар; авьяаслаг оюутнуудад зориулсан тэтгэлэг; нэрэмжит олимпиад... гээд энэ бүтээлч хамт олны Монголын зах зээлд санаачлан нэвтрүүлсэн зүйл олон бий. 

Ганцхан жишээ хэлэхэд арваадхан жилийн өмнө хаа сайгүй байсан ЗХУ-д үйлдвэрлэсэн овор ихтэй автомат таслуурыг халж, нэг хуруу буюу 18 мм-ийн өргөнтэй модулийн автоматаар сольсноор “IEK” брэнд Монголын барилгын цахилгаан хангамжийн салбарт шинэчлэлийг нэвтрүүлсэн билээ. Өдгөө өрх бүр, орц болгонд байгаа автомат таслуурыг эднийх л нийлүүлдэг.

“ИЭК Монгол”-ынхон 2006 оноос хойш “Голомт” хотхон, “Москва хороолол”, “Макс өргөө”, “Орчлон Хороолол”, “Ривер Гарден”, “Шинэ яармаг”... гээд хэрэгжиж буй  бүтээн байгуулалтын томоохон төслүүдэд тасралтгүй оролцож байна. Түүний зэрэгцээ барьж байгаа барилга, хийж байгаа засвар бүхэнд эдний бүтээгдэхүүнийг хэрэглэж байна. Тиймээс “Монголд шинээр босож байгаа барилга бүрд IEK-ийн тоноглол, хамгийн багадаа нэг байдаг” гэдэг яриа хүртэл гарчээ.  

Чанар, стандартыг эрхэмлэсэн бүтээгдэхүүн, үйлчилгээ, хэрэглэгчээ дээдэлсэн маркетинг, хэн хэндээ ашигтай түншлэх бодлогоороо салбартаа танигдсан Монгол- Оросын хамтарсан “ИЭК МОНГОЛ” компанийн захирал Б.Отгондоржтой ярилцлаа. 

Юуны өмнө танай хамт олонд 15 жилийн ойн баярын мэнд хүргэе. “ИЭК Монгол”-ыг байгуулахаар шийдсэн үеийг эргэн дурсахгүй юу?

Баярлалаа. 2000-аад он гараад барилгажилт зах зээлийн зарчмаараа эрчтэй хөгжиж байсан ч барилгын цахилгаан тоноглолын чиглэлээр мэргэжиж, тогтвортой үйл ажиллагаа эрхэлдэг хангамжийн компани, хувь хүн төдийлөн олон байгаагүй. Өргөн хэрэглээний бараа, бүтээгдэхүүн импортолдог хувь наймаачид, худалдааны компаниуд цемент, замаска, хаалга ч юм уу авчрахаас барилгын нарийн мэргэжлийн тоноглол, хэрэгсэл оруулж ирдэггүй байсан. Түүнээс үүдэж, Монголоос цахилгааны сайн тоноглол хэрэгсэл олоход хүндрэлтэй байсныг салбарынхан маань сайн санаж байгаа байх аа. Зах зээлийн энэ л эрэлтээр манайх байгуулагдсан юм. 

Барилгын салбар хөгжиж л байгаа бол тэрийг дагаад аюулгүй байдал, чанар, стандартыг бүрэн хангасан цахилгаан хангамжийн тоноглол байх л ёстой. 

ОХУ-ын “ИЭК” группийг сонгон түншлэхэд юу нөлөөлсөн бэ?

Зах зээлийн дээрх эрэлтийг хангахаар манай “МонХорус Интернэшнл” компани чанарын шаардлага хангасан цахилгааны тоног төхөөрөмжийг хаанаас авч болохыг судалсан юм. Үндсэн хоёр шалгуурыг тавьсан. Нэгдүгээрт, тухайн брэнд техникийн хувьд чанар, аюулгүй байдал, стандартыг бүрэн хангасан байх ёстой. Хоёрдугаарт үнийн хувьд Монголын зах зээлд тохирсон байх ёстой. 

Үнэ, чанарын зохистой харьцаагаараа Оросын “IEK” брэнд бидний шалгуурыг бүх талаараа хамгийн сайн хангаж байлаа. Цаана нь өөр давуу талууд ч байв. Тухайлбал цаг уур, газарзүйн нөхцлийн хувьд манайх Оростой их ойрхон. Үйлдвэрлэлийн технологийн хувьд “IEK”-ийн бүтээгдэхүүн ABB, Schneider гээд дэлхийн тэргүүлэгч брэндүүдээс дутахгүй. 

Манайд барилгажилт эрчтэй тэлэхийн хэрээр чанар стандартын шаардлага хангасан цахилгаан тоноглолын эрэлт улам өссөөр 2006 онд ОХУ-ын “ИЭК” компанитай хамтран “ИЭК-Монгол” ХХК-ийг үүсгэн байгуулсан, түүнээс хойш манай компани жилээс жилд цар хүрээгээ тэлж, өссөөр байна.  

Тухайн үед “IEK” бүтээгдэхүүнээ ОХУ болон ТУХН-ийн зах зээлд нийлүүлж байсан бол одоо олон улсын корпорац болж өргөжөөд байна. “IEK” брэндийн үйлдвэр ОХУ, БНХАУ, Турк-д байдаг. Түүнчлэн зарим бүтээгдэхүүнээ Японы үйлдвэрүүдэд ч захиалгаар хийлгэдэг. 

“IEK” корпорацын үйлдвэрлэлийн хэмжээ нь жилээс жилд 2 оронтой хувь хэмжээгээр өссөөр, өнөөдөр Герман, Испани, Румын, Малайз, Индонез, Вьетнам зэрэг оронд бүтээгдэхүүнээ нийлүүлж байна. Чанар, стандарт нь Европын зах зээл дээр бүрэн хүлээн зөвшөөрөгдсөн Оросын тэргүүлэх брэндүүдийн нэг болжээ. 

Ижил төрлийн үйл ажиллагаа явуулдаг компаниудаас “ИЭК Монгол” юугаараа ялгарах вэ?

Манайх нэг талаас инженерингийн, нөгөө талаас худалдааны компани. Энэ онцлогоос үүдээд бид борлуулалт, ашиг орлогоо огцом нэмэгдүүлэхийг зорихоос илүүтэй зах зээлээ хөгжүүлэх, энэ чиглэлээр олон улсад ашиглагдаж байгаа шинэ, дэвшилтэт технологи, мэдлэг, хандлагыг нэвтрүүлэх, салбарын хөгжилд шаардлагатай байгаа стандартуудыг тогтоох, хэрэглэгчийн болон мэргэжлийн боловсрол... гээд олон талбарт анхаарлаа хандуулж ажилладаг. 

Тийм ч учраас бид 

- Хамгийн сайн чаддаг зүйл дээрээ  төвлөрч алхам алхмаар урагшлах, 

- Богино хугацааны ашгаас бизнесийн тогтвортой хөгжил чухал гэсэн зарчмуудыг өдөр тутмынхаа үйл ажиллагаанд баримталдаг юм.

Энэ бол бид өнөөдөр ч, ирээдүйд ч мэргэжлийнхээ чиглэл буюу нам хүчдэл, барилгын цахилгаан хангамж дээрээ л төвлөрч, үүнтэй холбоотой боловсрол, сургалт, шинэ технологи, баталгаажуулалтад анхаарч ажиллана гэсэн үг. 

Ер нь манай компанийн хамгийн гол онцлог бол сургалт юм. Бид энэ зах зээл дээр ажиллаж эхэлсэн цагаасаа  л сургалт, семинар хийсэн. Одоо ч хийж байна. 

Жил бүр Москвагийн төв офиссоос мэргэжилтэн урьж, Монголын зураг төсөл, хангамжийн компаниудын мэргэжилтнүүд, инженер техникийн ажилтнуудад семинар хийдэг, манай зах зээлийн өнөөдрийн хэрэгцээ шаардлага, шинээр үйлдвэрлэж байгаа бараа бүтээгдэхүүний талаар мэргэжлийн төвшинд ярилцдаг байсан. Өнөөдөр “IEK” шинэ бүтээгдэхүүн гаргалаа гэхэд дагалдах сургалт, зөвлөгөө нь тэр дороо ирдэг. Харин сүүлийн үед цаг үеийн нөхцөл байдалтайгаа холбоотойгоор сургалтуудаа онлайн хэлбэрээр явуулж байна.

Манайх салбартаа стандартыг мөрдүүлж, тогтоохын тулд Улсын Мэргэжлийн хяналтын газар, Стандарт, хэмжил зүйн газартай мэдээлэл, санал солилцож ажилладаг. Мөн хүний нөөцийг бэлтгэх, чадавхжуулах чиглэлээр боловсролын байгууллагуудын багш, суралцагчдад сургалт семинар хийсээр ирсэн. 

Олон жилийн турш олон төрлийн сургалтыг тасралтгүй хийж, техникийн болон хэрэглээний давуу талуудаа таниулж, ойлгуулсны үр дүнд бид хэрэглэгчээ бэлдсэн. Энэ бол бидний бусдаас  ялгарах онцлог, манай компанийн маркетинг юм.

Улс даяар түгсэн борлуулалтын нэгдсэн сүлжээнийхээ талаар танилцуулахгүй юу...

Бид Барилгын цахилгаан хангамжийн салбарт стандарт тогтоон, мөрдүүлж хэвшүүлэх эрхэм зорилготойгоор үйл ажиллагаагаа эхэлсэн. Энэ зорилгынхоо хүрээнд Монголд анх удаа цахилгаан тоноглолын бөөний худалдаа, хангамж, түгээлтийн сүлжээг байгуулсан юм. 

Борлуулалтын ийм хэлбэр манай энэ чиглэлдээ анхных нь. Ийм сүлжээг байгуулахын тулд бид борлуулагчдаа бүх талаар дэмжих бодлого барьж, тэднийг чадавхжуулах олон ажил хийж ирлээ. 

Гэрээт борлуулагчидтайгаа харилцан ашигтайгаар хамтран ажиллаж, салбарынхаа хөгжилд хувь нэмрээ оруулж байгаадаа манай хамт олон баяртай байдаг.    

Бид өнгөрсөн хугацаанд барилгын салбарын үзэсгэлэн, яармагт тогтмол оролцож, шинэ шийдэл, бүтээгдэхүүнээ танилцуулж, зах зээлд шинээр нэвтэрч байгаа дэвшилтэт технологийн давуу талуудыг сурталчилж ирлээ. Үүний үр дүнд манай улсын шилдэг барилгын компаниуд манай гэрээт борлуулагчдын болон манай брэндийн байнгын түнш- хэрэглэгчид болсон.  

Танайх нийгмийн хариуцлагатай компаниудын нэг. Энэ талаар ямар бодлого баримталдаг вэ? 

Компани бол ажилтнууд, хүмүүс дээр тогтдог. Тэр хүмүүс сэтгэл хангалуун ажиллаж, амьдарч байж, компани маань өсөж дэвжинэ. Тийм болохоор бид ажилтнуудынхаа нийгмийн асуудал, хувь хүний хөгжил, мэргэжлийн болон бизнесийн боловсролд их анхаардаг. 

Арван жилийн ойгоороо компанийнхаа эрхэм зорилгыг баяжуулж “Ажиллагсад нь байнга урам зоригтой, компанийнхаа үйл ажиллагаанд чин сэтгэлээсээ хандах орчин бүрдүүлсэн эерэг компани байна” хэмээн тусгасан. Манайхан бол мэргэжлээрээ мэргэшсэн, гар, сэтгэл нэгтэй сайхан хамт олон. Хамт олноороо нийгэм рүү чиглэсэн сайн үйлсийн олон аянд оролцсон. 

Компанийн зүгээс ч нийгмийн хариуцлагаа ухамсарлан их дээд сургууль, МСҮТ-үүдэд лаборатори, тэнхим тохижуулж өгөх, олон улсын “Мэргэжлийн ур чадварын тэмцээн”-д оролцогчдыг ивээн тэтгэх, бэлтгэлийг нь хангах зэрэг зардлыг удаа дараа санхүүжүүлж ирлээ. 

Мөн цахилгаан хангамжийн мэргэжлээр суралцаж байгаа оюутнуудын дунд IEK-ийн нэрэмжит олимпиад жил бүр зохион байгуулах, авьяаслаг, хичээнгүй оюутнуудад зориулсан байнгын тэтгэлэгт хөтөлбөрийг зарлах гэх мэт нийгмийн шинж чанартай ажлуудыг тогтмол хийж байна. 

Бид эмнэлэг, сургууль, урлаг соёлын байгууллагууд гэх мэт хөрөнгө санхүүжилт нь шийдэгдээгүй засварын ажлуудад шаардлагатай цахилгаан тоноглолыг тусламжаар нийлүүлэх үйл ажиллагааг байнга хэрэгжүүлэн ажилладаг. Хамгийн сүүлд гэхэд “Ид шидийн орон 2”-ын бүх дотор цахилгаан, самбар, тоноглолыг үнэ төлбөргүй угсарч өгсөн. 

Та бүхэн хөгжлийн ойрын болон хэтийн төлөвөө хэрхэн тодорхойлж байна?

Мэргэжлийн боловсрол, стандарт, эрчим хүч хэмнэлтийн чиглэлийн шинэ технологийг нэвтрүүлэхэд анхаарч, хэрэглэгчийн боловсрол, хөгжлийг шинэ шатанд гаргах, ахиулахыг зорино. 

Ойрын хугацаанд  компанийн суурь дадлагын бааз дээрээ түшиглээд, цахилгаан хангамжийн стандартыг мөрдлөг болгон ажиллах чадвартай, мэргэжлийн өндөр ёс зүйтэй “барилгын цахилгаанчин” бэлтгэхээр төлөвлөж байна. 

Түүнчлэн салбартаа стандарт хэрэгжүүлж, чанартай тоноглол ашиглаж хэвшүүлэхийн тулд хэрэглэгчдийн эрчим хүчний зохистой хэрэглээ, эрчим хүч хэмнэлтэд чиглэсэн ажлуудаа улам идэвхжүүлэхийг зорьж байна. Энэ чиглэлийн хүрээнд “Эрчим хүч хэмнэлтийн тухай” хуулийн хүрээнд эрчим хүч хэрэглэгч аж ахуйн нэгж, иргэд тэр дундаа Үүрэг хүлээсэн хэрэглэгчидтэй хамтын ажиллагааны гэрээ байгуулан, эрчим хүчний системд олон улсад хүлээн зөвшөөрөгдсөн тусгай багажаар чанарын шинжилгээ хийж, хуурмаг чадлыг бууруулах технологи нэвтрүүлэн, техникийн болон эдийн засгийн үр ашгийг нэмэгдүүлэх зорилго тавин ажиллаж  байна. 

Сүүлийн үед манай улс технологийн хөгжлийг дагаад ухаалаг тоолуурыг бодлогоор нэвтрүүлж байгаа. Үүнтэй уялдан бид манай зах зээлд хамгийн сайн нийцэх технологийн ухаалаг тоолуурыг нэвтрүүлж байна. Тэгэхдээ дан ганц ухаалаг тоолуур нийлүүлэх биш түүний системийг нь өөрийн орны шаардлага, хэрэгцээнд тохируулан Монголдоо хөгжүүлж байгаа юм. Түүний цаана, өөрсдийн хийж чадах зөөлөн дэд бүтэц буюу програм хангамжаа хийх нь бидний ирээдүйд хэрэгтэй гэж үзсэн бидний бодлого бий. 

Одоогоор бид  УБЦТС, ӨБЦТС болон эрчим хүчний түгээх үйлчилгээ эрхэлж буй бусад хувийн компаниудад өөрсдийн хөгжүүлсэн “Energymetrix” системээ нэвтрүүлж эхлээд байна. Цаашид ухаалаг тоолуурын системийн техникийн боломжуудыг улам нэмэгдүүлж, салбарын хөгжилд хувь нэмрээ оруулахаар зорин ажиллаж байна. 

Ярилцлагынхаа төгсгөлд манай сэтгүүлийн уншигчдад хандан зөвлөгөө өгөөч гэж хүсвэл та юуг хэлмээр байна?

Орон сууцны барилга байгууламж олноор баригдаж, энэ салбарын хангамж үйлчилгээ, өрсөлдөөн нэмэгдэж байгаагийн хэрээр орон сууцанд оршин суугчдын амьдралын хэв маягт мэдэгдэхүйц өөрчлөлтүүд гарч байна. Зөвхөн орчин үеийн нэг айлын эрчим хүчний хэрэглээ гэхэд л 5- 10 жилийн өмнөх өрхийн хэрэглээнээс даруй 2- 3 дахин өсчээ гэсэн тооцоо байдаг. Энэхүү өсөн нэмэгдэж буй цахилгаан эрчим хүчний хэрэглээг даган хэрэглэгчийн аюулгүй байдлыг хангах зориулалттай цахилгаан техникийн шинэлэг технологи, олон арван бүтээгдэхүүнийг энэ салбарын үйлдвэрлэгчид зах зээлд санал болгосоор байна. 

Хуучны барилгуудын цахилгаан сүлжээний тоноглол нь маш бага хүчин чадалтай ажиллахад зориулагдсан, хамгаалалтын систем нь орчин үеийн галын болон цахилгааны аюулгүй байдлын стандартын үзүүлэлтийг хангаж чадахгүй байгаа нь нууц биш. Түүнчлэн цахилгааны шугам, тоноглолд хөрөнгө оруулалт, шинэчлэлт хийгдээгүй барилгууд олон бий. Ийм нөхцөлд цахилгаанаас үүдэлтэй гал түймэр гарах эрсдэл өндөр. Энэхүү эрсдэлийг бууруулах арга нь барилгын цахилгаан угсралтын үндэсний стандартыг олон улсад мөрдөгдөж буй норм стандартад дүйцүүлэн боловсруулж, мөрдлөг болгох нь барилга угсралтын салбарт тулгамдсан олон асуудлуудын нэг нь юм. 

Цахилгааны аюулгүй байдлаа хангахын тулд стандартын шаардлагад нийцүүлэн төсөв, хөрөнгөө зохицуулаарай. Цахилгаан хангамж бол барилгын галын аюулгүй байдлыг хангадаг хамгийн гол зүйл. Түүн дээр төсөв, мөнгө хэмнэх нь эрсдэл дагуулна.

Зөвлөсөнд баярлалаа. Танай хамт олонд ажлын амжилт  хүсье! 

Вэб сайт:  https://iek.barilga.mn/

Холбоо барих: 7000-2828, 9905-4531