Зар сурталчилгаа гэдэг ойлголт нь барилгын материал гэдэг нэр томьёоны хувьд хаа сайгүй байдаг өргөн хэрэглээний саван, автомашин, унадаг дугуй гэх бараа бүтээгдэхүүнтэй ижил утгатай бөгөөд эдгээр нь барилгын материал борлуулдаг компаниудтай нягт холбоотой ойлголт юм. Нэг үгээр хэлбэл маркетинг гэдэг нь бүх төрлийн бараа үйлчилгээний Брэндийг бий болгохын тулд хийж буй үйлдэл, хүчин чармайлт гэж ойлгож болно. 

"Барилгын материал" гэсэн нэр томьёо нь цемент, блок, шал, хавтан, тоосго, мод, будаг, барилгын хуурай хольц, сан, цахилгааны хэрэгсэл зэрэг олон төрлийн бүтээгдэхүүнийг багтаасан өргөн ойлголт. Эдгээр бүтээгдэхүүний ашиглалт, хэрэглээний ялгаатай байдал, цаг хугацаа гээд хоорондоо адил бус, нэгнээсээ үл хамаарах ангилалд хувааж авч үзэх шаардлагатай болно. 

Брэнд бий болгохын тулд маркетинг хийдэг гэж дээр дурдсан. Тэгвэл Брэнд гэж юу вэ, ямар зорилгод үйлчилдэг талаар авч үзье. 

Суурь түвшинд брэнд гэдэг нь нэг худалдагчийн бараа, үйлчилгээ бусад худалдагчаас ялгарах, чанар, гарал үүсэл, гүйцэтгэлийн баталгааг товчоор илэрхийлсэн ойлголт юм. Энэхүү ерөнхий тодорхойлолт нь бүх төрлийн бараа үйлчилгээний ангилалд төгс тохирдог бөгөөд аль нэг төрлийн бараа, үйлчилгээний ангиллаар хязгаарлагддаггүй. 

Барилгын материал дээр брэндийн тухай ярихад цемент эсвэл блок худалдаж авах гэж байгаа хэрэглэгч үүнийг хэрхэн яаж хийх вэ? Цементийн найрлага, чанар эсвэл блокны бат бөхийн талаар ойлголттой, мэдлэгтэй хэдэн хэрэглэгч байгаа вэ? Мэдлэг мэдээлэлгүй тохиолдолд лабораторид шинжилгээ өгөөд явах цаг зав, тэвчээр хэр вэ? Бүтээгдэхүүн үйлчилгээний чанарыг үнэлж чадахгүй, шалгах боломжгүй нөхцөл байдалд хэрэглэгч брэндээс хамаарсан сонголтыг хийдэг буюу брэндэд итгэж худалдан авалт шууд хийдэг. Өөрөөр хэлбэл чанарыг таних олон шат дамжлагыг алгасдаг гэсэн үг юм. 

Мөн хамгийн алдартай брэндүүдийн ихэнх төлөөлөл B2B (Business to Business) чиглэлтэй буюу бүтээгдэхүүн, үйлчилгээгээ бусад компаниудад борлуулах энэхүү бизнес загварыг ашигладаг гэдгийг энд онцлон тэмдэглэмээр байна. Жишээлбэл, Google, Microsoft-оос эхлээд цааш ярих шаардлагагүй биз ээ.

Одоо барилгын материалын брэндийг бий болгохоос эхлээд брэндийн нэр хүндээ өсгөх зарим зүйлсийн талаар авч үзье.

1. Брэнд нь хэрэглэгчдэд чанарын баталгааг бий болгодог тул брэнд бүтээх зайлшгүй шаардлагатай болно.

Хэрэглэгчид бүтээгдэхүүний чанарыг хэрхэн үнэлэхийг мэдэхгүй байх тохиолдолд танай бий болгосон брэнд борлуулалтад тань маш том тус хүргэх юм. Тиймээс барилгын материал гэх мэт ангиллын барааны тухайд B2B талбар дээр хамгийн чанартай эсвэл аюулгүй гэх мэт тодотголтой брэндийг бий болгох явдал юм. 

Жишээ нь хэрэглэгч амины орон сууц барихаар болж, цемент сонгож авах хэрэгтэй болсон гэж үзъе. Гэтэл цементийн шинж чанар, мөн аль нь сайн аль нь мууг нүдээр хараад таних боломжгүй, лаборатори хайгаад явах төвөгтэй тул Хөтөлийн цементийг сонгосон нь илүү аюулгүй, найдвартай гэж шууд сонголт хийсэн гэж үзъе. Яагаад гэвэл Хөтөлийн Портланд цемент олон жилийн турш танигдсан, бүтээгдэхүүнээ тасралтгүй нийлүүлдэг, нэр хүндтэй брэнд юм. 

2. Нөлөөлөгч нь барилгын материалын брэндийн сонголтод чухал үүрэг гүйцэтгэдэг.

Нөлөөлөгч гэхээр уншигчдад олны танил хүн эсвэл сошиал идэвхтэн санаанд бууж байгаа байх. Гэхдээ Барилгын салбарын хувьд нөлөөлөгчид гэж Барилгын инженер, архитектор дизайнерууд, гэрээт борлуулагч гэх мэт хүмүүс гэж ойлгож болно. Товчхондоо дээрх ангиллын хүмүүс барилгын материалын борлуулалт буюу хэрэглэгчийн брэнд сонголтод идэвхжүүлэгч эсвэл идэвхгүйжүүлэгч болдог гол тоглогчид юм. Хэрэглэгчид ихэвчлэн тухайн мэргэжлээр ажилладаг нөлөөлөгчдөөс чиглүүлэг, туслалцаа авч сонголтоо хийдэг. Харин хэн нэгэн одын эсвэл сошиал идэвхтний сурталчилсан барилгын материалыг хэрэглэгч сонгох нь юу л бол…

Байшингаа та өөрөө өргөтгөх эсвэл сантехникийн  хоолойгоо бие дааж хийж байгаагаар төсөөлөөд үзэхэд мэргэжлийн салбарын нөлөөлөгч хүмүүс яагаад ийм чухал үүрэг гүйцэтгэдгийг   ойлгох болно. Тиймээс туршлагатай   маркетерууд нийт хэрэглэгчдэд сурталчлахаасаа өмнө тухайн брэндийг мэргэжлийн нөлөөлөгчид буюу салбарын мэргэжлийн ажилтнуудад эхлээд таниулж сурталчилдаг. 

3. Хэрэглэгчийн амнаас гарах үг бүр брэндийн сонголтод чухал хүчин зүйл болдог.

Барилгын материалын талаар найз нөхөд, хамаатан садантайгаа зөвлөлдөх нь илүү түгээмэл байдаг бөгөөд энэ нь хэрэглэгчийн сонголтод нөлөөлөх маш хүчтэй хүчин зүйл болно. Өргөн хэрэглээний барааны брэндүүдийн хувьд ч ам дамжин яригдаж болох боловч энэ ангилалд худалдан авалт хийгээд туршаад үзэхэд өртөг үнэ, эрсдэл багатай тул худалдан авах шийдвэр гаргахад нэг их хүчин чармайлт  шаардлагагүй юм. Харин ам дамжсан яриа нь удаан эдэлгээтэй, үнэ өртөг өндөртэй барилгын материалын хувьд илүү их нөлөөлдөг. Тиймээс тухайн брэндэд ам дамжсан таатай яриа бий болгохын тулд хэрэглэгчтэйгээ эерэг харилцаа үүсгэх, эргэх холбоо тогтоох гэх мэт зохих хэрэгсэл, арга техникийг ашиглах шаардлагатай. Ам дамжсан яриаг хянах боломжгүй тул сөрөг мэдээлэл тарахаас үргэлж болгоомжилж байх хэрэгтэй. 

Тиймээс барилгын материалын брэндэд зориулсан маркетингийн үйл ажиллагаа зөвхөн хэрэглэгч төдийгүй мэргэжлийн нөлөөлөгч этгээдүүдэд чиглэсэн томоохон бүрэлдэхүүн хэсгүүдээс бүрдэх шаардлагатай. Нөлөөлөлд өртсөн мэргэжилтэн “Нэр хүндтэй үйлдвэрлэгч үйлдвэрлэсэн тул танд санал болгож байна, сонголтоо зөв хийснээр өндөр чанартай бүтээгдэхүүнийг, боломжийн үнээр худалдан авч байна” гэсэн мессежийг худалдан авагчид өгч чадах юм. 

Мөн орчин үед ам дамжсан яриа цахим орчинд идэвхтэй өрнөдөг болсон. Саяханы нэгэн жишээг авч үзвэл, Барилгын хөөсөн фасад шатсан тохиолдол урд жил цөөнгүй гарч, сошиалд хөөсөн фасад аюултай гэсэн яриа газар авч, хөөсөнцөр ханган нийлүүлэгчид нэлээд хүнд байдалд орж томоохон захиалгын гэрээнүүд цуцлагдаж эхэлсэн байдаг. Үүний эсрэг зарим нэг хөөсөнцөр үйлдвэрлэгч томоохон компаниуд гал дэмждэггүй, шатдаггүй хөөсөнцрийн мэдээллээ идэвхтэй түгээж, ямар хөөсөнцрийг хаана хэрхэн ашиглах тухай контент зөвлөгөө түгээх зэрэг кампанит ажил өрнүүлснээр хөөсөнцрийн борлуулалт болон эрэлт эргээд эрчимтэй өссөн байдаг. 

4. Харилцан ярианууд онлайн хэлбэрээр явагдаж байна.

Онлайн маркетинг барилгын материалын брэндтэй ямар хамааралтай болохыг авч үзье. Ам дамжсан яриа чухал ач холбогдолтой тухай дээр өгүүлсэн. Тэгвэл онлайн ярианы хувьд хамаатай ойлголт болох юм. Өөр нэг жишээг авч үзье. Цар тахлын нөхцөл байдалд танхимын яриа, хурал уулзалтыг сошиал болон олон нийтийн мэдээллийн хэрэгслийн яриа , янз бүрийн онлайн өрөөний яриа уулзалт орлож байгааг бүгд мэднэ. Өөрөөр хэлбэл, харилцан яриа онлайн хэлбэрээр явагдаж байна. Эдгээр хоёр баримт нь хэрэглэгчидтэйгээ барилгын материал, брэндийнхээ талаарх санал бодлыг онлайнаар сонсож яриа өрнүүлж болно гэсэн үг юм.

5. Онлайн платформуудыг ашигла

Тэгэхээр барилгын материалын брэндийг худалдаалагчид онлайнаар юу хийх ёстой вэ?

Эхний алхам бол хэрэглэгчид болон мэргэжлийн нөлөөлөгчдөд хамааралтай, тэдэнд тохирох онлайн медиа платформыг олж хэрэглээндээ нэвтрүүлэх явдал юм. Нэвтрүүлсэн платформ дээрээ хэрэгтэй гэж үзсэн хүмүүсээ уриад яриа өрнүүлж эхлэх нь чухал. Мөн нэг шалгарсан арга бол аль хэзээний бий болсон салбарын эсвэл мэргэжилтнүүдийн платформ дээр нэгдэн орж идэвхтэй үйл ажиллагаа явуулах юм. Бэлэн платформ дээр танд хэрэгтэй мэргэжлийн нөлөөлөгчид хэзээний байршчихсан байх болно. 

Онлайн флатформ ашиглахдаа нэг мартаж болохгүй зүйл нь зөв газраа, зөв цагтаа хэрэгтэй хүмүүстэйгээ байхыг чухалчлах хэрэгтэй. Сошиал яриа маш их цаг зарцуулдаг хэрнээ үр дүнгүй, цаг нөгцөөсөн хүмүүсийн цугларалт болох нь цөөнгүй. Тиймээс үнэ цэнэтэй цаг  зорилтот хүмүүстээ зарцуулж, цагийг үр дүнтэй өнгөрөөх нь чухал юм.