Монгол Улсын Ерөнхий сайд Л.Оюун-Эрдэнэ, Барилга хот байгуулалтын сайд Б.Мөнхбаатар болон бусад албаныхан өнөөдөр Төв аймагт ажиллаж байна. Төв аймгийн “Төрийн үйлчилгээний нэгдсэн төв”-ийн үйл ажиллагаатай танилцаж, аймгийн иргэдтэй уулзалт хийлээ. Өнөөдөр барилгын ажлын нээлтээ хийсэн Богдхан төмөр зам Төв аймгийн Алтанбулаг, Сэргэлэн, Баянбулаг сумын нутаг дэвсгэрийг дайран өнгөрөх юм. Тиймээс ийнхүү Төв аймгийн иргэдтэй уулзалт хийж, хэрэгжиж буй томоохон төслийн талаар танилцуулга хийсэн юм. Төв аймгийн Сэргэлэн суманд байрлах Хөшигийн хөндийд “Чингис хаан” олон улсын нисэх онгоцны буудал баригдсан. Мөн “Шинэ Зуунмод” хот, түүний хажууд, “Майдар” хот барих төлөвлөгөө батлагдсан.

Шинэ Зуунмод хотыг дайраад "Богд хаан" төмөр зам буюу Ази Европыг холбосон хурдны зам тавигдана. Ингэснээр тээвэр ложистикийн томоохон төв бий болж, 150 мянга орчим хүн амтай дагуул хот болох төлөвлөгөө гарсан. Цаашдаа Төв аймаг олон улсын зэрэглэлд нийцсэн, эдийн засгийн тусгай бүс болж, эдийн засгийн өрсөлдөх чадвартай хот болно гэдгийг Ерөнхий сайд үгэндээ онцоллоо.