Салбарын нэр хүндтэй нөлөө бүхий эрхмүүдийг бид энэхүү ярилцлагын буландаа урьдаг билээ. Тэгвэл энэ удаад “Тэргүүний барилгачин”, “Алтан гадас” одонт, “Аж үйлдвэрийн гавьяат ажилтан”, “Монгол улсын гавьяат барилгачин” цол тэмдэгт Хөтөлийн “Цемент Шохой” ХК-ийн Гүйцэтгэх захирал А.Шоовдорыг урин ярилцсанаа хүргэж байна. 

Таныг багагүй хугацаанд “Цемент Шохой” ХК-иар овоглон ажиллаж байгааг тань, тэр дундаа салбарынхан сайн мэднэ. Хэдэн жил энэ салбар болон компанидаа ажиллаж байна?

1960-1980 онд ЗХУ болон БНМАУ-ын Засгийн газрын шийдвэрээр байгуулагдсан Геологи хайгуулын экспедицийн эрэл хайгуулын үр дүнд Дархан, Сэлэнгийн районд шохойн чулууны орд газрыг нээсэн бөгөөд энэхүү ордыг түшиглэн жилдээ 500,000 тонн портланд цемент, 65,000 тонн шохой үйлдвэрлэх хүчин чадалтай Цемент-Шохойн үйлдвэр, 10000 хүн амтай орчин үеийн хот суурьшлын бүс байгуулах, Хөтөлийн Цемент-Шохойн цогцолборын бүтээн байгуулалтыг 1982 оноос эхлэхэд эх орны өнцөг бүрээс залуучууд илгээлт, томилолтоор ирж ЗХУ-ын мэргэжилтнүүдтэй хамтран бүтээн байгуулалтад оролцож ажил амьдралынхаа гарааг эхлүүлж байлаа. 

Уг цогцолборыг 1982-1988 онд барьж байгуулж дууссан бөгөөд барилгын салбарыг цементээр, Эрдэнэтийн Уулын баяжуулах үйлдвэрийг технологийн шохойгоор тасралтгүй хангаж, Хөтөл хотынхоо ард иргэд, төр төсвийн байгууллагуудын дулаан хангамжийн асуудлыг найдвартай хангаж байна. Одоо Хөтөл хот төр төсвийн байгууллага, сургууль цэцэрлэг, шүүх цагдаа, эмнэлэг, аж ахуйн нэгжүүдтэй, 10,000 хүн амтай орчин цагийн хот болон хөгжсөөр байна.

Миний хувьд Уул уурхайн ашиглалтын инженер гэх үндсэн мэргэжилтэй. 1985 онд тухайн үеийн ББМҮЯ-ны томилолтоор ирж, Шохойн чулууны ил уурхайн өрөмдлөг тэсэлгээний инженерээр ажлын гараагаа анх эхэлж байлаа. Үүнээс хойш 36 жил энэ үйлдвэртээ ажиллаж  байгаагаас сүүлийн 17 жилд Гүйцэтгэх захирлаар ажиллаж байна.

“Алтан гадас” одонт “Цемент Шохой” ХК-ийн түүхийн хуудсыг сөхөн асуумаар байна. Танай компани анх улсын өмчит байсан, одоо хувийн өмчит компани болсноор ямар өөрчлөлт гарав?

Тийм ээ. Үйлдвэр маань 1990 оноос хойш барилгын материалын үйлдвэрүүдээс хувьчлагдаагүй үлдсэн ТӨУҮГ байлаа. Хувьчлагдаагүй байсан шалтгаан нь хотын Дулааны станцын асуудлыг шийдвэрлэж чадаагүй мөн хүчин чадал бага, зардал өндөртэй цементийн нойтон аргын үйлдвэрт хөрөнгө оруулалт татаж, технологийн шинэчлэлт хийж, зах зээлд өрсөлдөх чадвартай болгох асуудлууд байсан. УИХ, Засгийн газар, Барилга хот байгуулалтын яамны тогтоол шийдвэрүүд гарч, дээр дурдсан асуудлаа шийдвэрлэсэн бөгөөд хөрөнгө оруулалт хийж 1,0 сая тонн цемент хуурай аргаар үйлдвэрлэх, Дулааны станцын үйл ажиллагааг компани хариуцаж ажиллах нөхцөлтэй 2015 оноос хувьчлагдан ажиллаж байна. 2023 онд үйлдвэрийн маань үүсгэн байгуулагдсаны 40 жилийн ой тохионо.

Төрийн өмчит хэлбэрээр ажиллах 30 жилд 4430,8 мянган тонн цемент үйлдвэрлэн зах зээлд нийлүүлж байсан бол хувьчлагдсанаас хойш 6 жилд 2831,2 мянган тонн цемент үйлдвэрлэн борлуулж, хүчин чадлынхаа 40 орчим хувиар ажиллаж байна. 

Хүчин чадлынхаа 40 орчим хувиар ажиллаж байна гэлээ. Тэгэхээр барилгын салбарын цементийн жилийн хэрэгцээ хэдэн тонн байна? 

Барилгын салбарын цементийн  жилийн хэрэгцээ 1,7 сая тонн. Гэвч өнөөдөр тус бүр 1,0 сая тонн цемент үйлдвэрлэх хүчин чадалтай 4 үйлдвэр ажиллаж байгаа хэдий ч бүгд зах зээлээс шалтгаалж хүчин чадлаараа ажиллаж чадахгүй байгаагаас хөрөнгө оруулалтад зориулан авсан банкны зээлээ төлөх чадамжгүй ажиллаж байна.

Манай хамт олон барилгын салбарын талх гэж ярьдаг цементийг 7262,0 мянган тонн үйлдвэрлэн бүтээн байгуулалтад нийлүүлсэн ба 1546,2 мянган тонн шохой үйлдвэрлэснээс Эрдэнэт үйлдвэрийн технологийн шохой 1356,4 мянган тонн, барилгын шохой 189,8 мянган тонн үйлдвэрлэж борлуулаад байна. Мөн 2895,5 мянган Гкал дулааны эрчим хүч үйлдвэрлэн Хөтөлийн ард иргэд, төр төсвийн байгууллагуудыг Дулааны эрчим хүчээр хангах ажлаа нэр төртэй биелүүлж 38 дахь жилтэйгээ золгож байна.

Цаашид цемент үйлдвэрлэх боломжтой тоо хэмжээ хэд байх тооцоолол байна? 

Төслийн хүчин чадлаар ажиллавал жилдээ 1 сая тонн цемент үйлдвэрлэх боломжтой. Гэвч барилгын байгууллагуудын үйл ажиллагаа улирлын чанартай явагддаг, зах зээлийн багтаамжийг тооцоололгүйгээр олон цементийн үйлдвэрүүд байгуулагдсанаас зах зээл хязгаарлагддаг нь хүчин чадлын ашиглалтад нөлөөлж байна. Бид дан цемент, шохой үйлдвэрлээд зогсохгүйгээр барилгын жижиг бүтээц эдлэл хийх зорилгоор бетон зуурмагийн узель ашиглалтад оруулаад тусгай зөвшөөрлөө аваад байна. Энэ ажлыг хийснээр цементээр эцсийн бүтээгдэхүүн үйлдвэрлэх, нэмүү өртөг бий болгох, ажлын байр нэмэгдүүлэх, өвлийн улиралд үйлдвэрлэл явуулах гээд олон чухал ач холбогдолтой. Одоо зуурмагийн туршилт хийхийн зэрэгцээ хүмүүсээ сургаж дадлагажуулах ажлыг өөрийн сургалтын төв дээр хийж байна.

Хятад мэргэжилтнүүдийг өндөр үнээр оруулж ирж, хятад барилгын материалаар барилга барьдаг нэг үе байлаа

Үйлдвэржилт бол хөгжлийн хамгийн том гарц гэдэг. Тэгэхээр барилгын салбар дахь материал үйлдвэржилтийг хөгжүүлэх арга замыг та юу гэж харж байна?

Барилгын салбар маань энэ хугацаанд хүндхэн замыг туулж ирсэн. 1990 оноос хойш хувьчлагдаж, барилгын материалын сайхан үйлдвэрүүд үүд хаалга барьж, ажилчид ажлын байргүй болж, барилгын байгууллагууд нь Эрээнээс материалаа авдаг болсноор үндсэндээ дампуурч, амьдралын шаардлагаар мэргэжилтэй ажилтнууд маань өөр ажлын байр луу шилжиж, багш, эмч, улс төрч нар л барилга барих болсон. Хятад мэргэжилтнүүдийг өндөр үнээр оруулж ирж, хятад барилгын материалаар барилга барьдаг нэг үе байлаа. Энэ хүнд үед бид зах зээлээс шахагдахгүй тэсэж гарах гэж бүхий л боломжоороо ажилласан. Орон тоогоо хадгалах, хүмүүсээ цалинтай орлоготой байлгах, мөн Эрдэнэт үйлдвэрийг шохойгоор тасалдуулахгүй, Хөтөлийн ард иргэд, төр төсвийн байгууллагуудыг хөлдөөчихгүй байх гээд бүх боломжоо дайчлан алдагдалтай ч гэсэн ажиллаж, үүд хаалгаа хаачилгүй хүнд цаг үеийг туулсан. 

Ингээд 2005 оноос эхлэн Эрээнээс орж ирэх хятад цементтэй өрсөлдөж, бүтээгдэхүүнийхээ тоо хэмжээг өсгөснөөр ашигтай ажиллаж эхэлсэн бөгөөд ажилтнуудынхаа цалин хөлсийг цаг тухайд нь олгодог болж, нийгмийн асуудлыг шийдвэрлэх, цалин нэмэх зэрэг арга хэмжээг авч, үйлдвэрийн үйл ажиллагаа сэргэсэн хэдий ч биднийг хамгийн их түгшүүлж байсан зүйл үйлдвэрийн технологийн хоцрогдол, сэлбэг материалын түлш түүхий эдийн хомстол байлаа. 

2010-2016 онд Шинэ-Бүтээн байгуулалт зорилтот хөтөлбөрийг Засгийн газраас баталж Төрөөс Барилгын материалын үйлдвэрүүдийг дэмжиж, том төсөл хөтөлбөрүүдийг санхүүжүүлэхээр Хөгжлийн банкыг хүртэл байгуулж өгсөн нь бидэнд их эрч хүч өгсөн гэж боддог. Энэ үед компанийн зах зээлд тэсэж үлдэх цорын ганц алхам нь гадаад, дотоодын хөрөнгө оруулалтыг татаж, нойтон аргаар клинкер үйлдвэрлэх технологийг сольж, дэвшилтэт хуурай аргаар клинкер үйлдвэрлэж хүчин чадлаа нэмэгдүүлэх, асуудал байсан юм. Бид жилдээ 1 сая тонн цемент үйлдвэрлэх төсөл хөтөлбөр боловсруулж, холбогдох яам, Засгийн газарт оруулж дэмжлэг авч маш богино хугацаанд хэрэгжүүлж ажилласан нь өнөөдөр энэ үйлдвэр бодитой оршин тогтнох чухал шийдвэр гэж боддог. 

Засгийн газраас гаргасан тухайн үеийн шийдвэр, дэмжлэгийн үр дүнд үндсэндээ материалын үйлдвэрүүд сэргэж, олон жижиг дунд үйлдвэрүүд Хөгжлийн банкны санхүүжилтээр боссон боловч зарим нэг хүндрэлийг тооцож чадаагүйгээс долларын ханшийн өсөлтөд бүгд өртөж зээлээ төлж чадахгүй янз бүрээр дуудуулан аргаа барьж үйлдвэрээ ч ажиллуулж чадахааргүй, төр засаг арга хэмжээ авч өгөх болов уу гээд л сууж байна. Мөн мэдээж коронавирусийн цар тахал нөхцөл байдлыг улам л хүндрүүлж байна.

Эдийн засгийн нөхцөл байдал хүнд байгаа энэ цаг үед шинэ, залуу компаниуд хэрхэн алданги багатайгаар бизнесээ явуулах тал дээр зөвлөвөл?

Ковидоос шалтгаалсан эдийн засгийн таагүй нөхцөлтэй том жижиггүй бүгд л нүүр тулан, сөрж гарах, тэсэж үлдэх амаргүй нөхцөлд байдалд байна. Гэвч хамгийн гол нь мэргэжилтэй боловсон хүчнээ алдаж болохгүй. Учир нь тэр хүмүүсийг амархан бэлтгэдэг юм биш. Мэргэжилтэй, мэргэжсэн хүнтэй болоход дор хаяж 10-аас дээш жилийн хөдөлмөр зүтгэл, туршлага шаардагддаг. Харин эдгээр хүмүүс байхад ямар ч хямрал, хүндрэлийг даван гарч алдсан боломжоо эргүүлэн авч болно гэж боддог.

Бидний хувьд энэ үед халдвар хамгааллын дэглэмийг барьж, ажилтнуудаа эрсдэлд оруулахгүйгээр бүхий л боломжтой арга хэмжээг аван, үйлдвэрлэлийн жигд үйл ажиллагааг ханган ажиллаж байгаа боловч биднээс хамаарахгүйгээр зах зээл хумигдаж, салбар маань доголдоод ирэхээр үйлдвэрлэлээ хязгаарлах, зогсоох гээд амаргүй л нөхцөл байдал үүсэж байна. Энэ хүнд цагт төр засгийн ямар нэг дэмжлэг гэхээсээ илүү алдагдсан боломжоо нөхөх талаар л гарц эрэлхийлж байна.

Хэдхэн жилийн настай асфальтан замаас татгалзаж бетон суурьтай зам барьдаг болчихвол энэ хэдэн үйлдвэрүүд босоод л ирнэ

Дотооддоо барилгын материал үйлдвэрлэж байгаа ААН-үүдэд ямар асуудал тулгардаг вэ? Төрөөс ямар дэмжлэг, бодлого шаардлагатай байдаг бол?

Бид уул уурхай шиг экспортод бүтээгдэхүүнээ гаргадаггүй, дотоодынхоо түлш түүхий эдийг боловсруулалт хийж, дотоодын хангалтыг хийдэг учраас бүх төрлийн татвар хураамж төлөх, 800 гаруй ажлын байраа хадгалж үлдэх гээд зовлон яривал их байна. Манай салбарын яам барилга барьдаг голдуу гадаадын хөрөнгө оруулалттай хэдхэн компаниа анхаараад барилгын материалын үйлдвэрүүдээ үндсэндээ орхигдуулаад байна. Барилгын салбараа дэмжье гэвэл материалын үйлдвэрүүдээ дэмждэг яам болох ёстой. Материал нь байвал Монгол улс барилга бүтээн байгуулалтыг хийх чадвартай компаниуд болон  мэргэжилтэнтэй болсон цаг гэж ойлгодог. 

Хуурай аргаар цемент үйлдвэрлэх тус бүр 1 сая тонн цемент үйлдвэрлэх хүчин чадалтай МАК ХХК, Монполимент ХХК, Хятадын хөрөнгө оруулалттай үйлдвэр болон манай үйлдвэр гээд 4 үйлдвэр байгуулагдлаа. Цаашид энэ үйлдвэрүүдийнхээ хүчин чадалд нь хүргэж ажиллуулах, зах зээлийг нээж өгөх дээр анхаарах нь чухал байна. Манай улсын цементээр хийх ажил, бүтээн байгуулалт дөнгөж 20 хувийн гүйцэтгэлтэй явж байгаа. 

Хэдхэн жилийн настай асфальтан замаас татгалзаж бетон суурьтай зам барьдаг болчихвол энэ хэдэн үйлдвэрүүд босоод л ирнэ. Улсын төсвөөс мөнгө гарган олон засмал зам тавьж, ядуу төсвөө хумсалж л байна. Зам урт болох тутам арчилгаа хийхгүй бол улам л их зардал гардаг. Бетон суурьтай зам эхлээд барих үед өртөг өндөр мэт боловч цаашид гарах ашиглалтын зардал бага, насжилт өндөр гээд эдийн засгийн хувьд ашигтай гэдэг нь нэгэнт батлагдсан зүйл шүү. Толгойтоос Нисэх рүү манайхан тавьсан бетон зам өртөг нь 17 тэрбум бол замын цагдаагийн хажууд бариад одоо ч дуусгаагүй гүүр 40 гаран сая доллар болсон гэж сонссон. Энэ хоёрын ялгааг мэргэжлийн хүмүүс хэлэх л байх даа. 

Бетон суурьтай зам өртөг өндөр мэт боловч чанар сайн гэлээ, гэтэл яагаад энэ зарчмаар замаа хийж болохгүй байгаа талаар тайлбарлаач?

Манай орон шиг эрс тэс уур амьсгалтай оронд асфальтан зам урт насгүй гэдэг нь харагдаж байна. Бөөн зардал гаргаж, цаг хугацаа зарцуулан байж гаднынхнаар нэг зам тавиулдаг. Гэтэл хэдхэн жилийн дараа түүнийгээ мөнгө гаргаад хуулаад л эхэлдэг. Энэ бол зүгээр л мөнгөөр тоглож байна гэж харагдаж байна. Аль эсвэл бид чинь тийм их баян цатгалан, ядууралгүй улс юм уу.

Манайх шиг жижиг зах зээлтэй улсад материалын үнийн өсөлт аль аль талдаа хүндхэн тусдаг, байнга яригддаг сэдэв болж. Жишээ нь цементийг дотооддоо үйлдвэрлэж байна. Гэтэл үнэ өссөөр л байна?

Цементийн үнэ өсөхөд нөлөөлдөг олон хүчин зүйл бий. Компанийн хувьд гол нь цахилгаан эрчим хүч, тээврийн зардал, технологийн нүүрс, түлш, түүхий эдийн үнийн өсөлт цементийн өртөг өндөржихөд нөлөөлдөг. Харин үнийн өсөлтийг үүсгэж байдаг ченжүүдээс салах цаг болсон. Барилга бүтээн байгуулалтын ажил 6 сар л үргэлжилдэг. Энэ оргил ачааллын үед цементийн хомстол үүсэхэд ченжүүд үнэ нэмдэг. Цементийн том үйлдвэрүүд байгуулагдаагүй байсан жилүүдэд салбарын дарга нар Замын-Үүдэд бөөнөөрөө очоод л вагон зохицуулаад их л ажил болдог байсан. Одоо бол тийм асуудал байхгүй, барилгын материал үйлдвэрлэгчид бид дотоод хэрэгцээгээ чанарын өндөр төвшинд хангаж байна. Өнгөрсөн жил ковидоос шалтгаалж манайхаас бусад үйлдвэрүүдийн гадаад мэргэжилтнүүд хугацаандаа орж ирээгүйгээс манай үйлдвэр дээр ачаалал ирж борлуулалтаа үйлдвэрлэл нь гүйцэхгүйгээс хомстол үүсэж, үүнтэй зэрэгцэн ченжүүд үнэ нэмсэн асуудал гарсан.

Танайх цементээ ОХУ-руу экспортлохоор ажиллаж байгаа гэсэн. Ингэснээр барилгын салбарт ямар өөрчлөлт бий болох вэ? 

Бид 2008, 2009, 2010, 2015 онуудад ОХУ-д цемент экспортод гаргаж байсан. 2016 оноос эхлэн дээр хэлсэн цементийн иж бүрэн 4 том үйлдвэр ашиглалтад орж, Монгол улсын цементийн хэрэгцээг бүрэн ханган ажиллаж байна. Эдгээр үйлдвэрийн үйл ажиллагааг дэмжих, хүчин чадлыг бүрэн ашиглах, тасралтгүй үйл ажиллагааг хангах, Монгол улсаас олон улсад экспортлох бүтээгдэхүүний нэр төрлийг нэмэгдүүлэх зорилгоор Монгол улсын Засгийн газар, Барилга, хот байгуулалтын яам, Монголын Барилгын материал үйлдвэрлэгчдийн холбоотой хамтран  цементийг экспортод гаргах ажил хийгдэж эхлээд байна. ОХУ-д төлөөлөгч томилон ажиллуулж, холбогдох бичиг баримтыг олон улсын стандартад  нийцүүлэн боловсруулах, баталгаажуулах, цаашид цементээ экспортод гаргах бэлтгэл ажлууд хийгдэж байна. Энэ асуудлыг улсын хэмжээнд нэгдсэн бодлого зохицуулалтаар хангаж үр дүнд хүрэх шаардлагатай. 

90 оноос хойших салбарын хүнд хэцүү байсан цаг үеийг салбарынхан тэр аяараа л мэдэх байх. Харин энэ цаг үед асуудал болж буй зүйл юу байна?

Салбарын хэмжээнд олон асуудал байгаа. Би зөвхөн Барилгын материал үйлдвэрлэгч нарт тулгамдаж байдаг зүйлүүдээс заримыг нь хэлэхэд “Тусгай зөвшөөрөл” гэж нэг асуудал бий. Жил бүр л үйлдвэрлэл явуулах эрх авах гэж бөөн асуудал болно. Олон жил бидний хийж ирсэн ажил. Гэтэл жил болгон л мөнгө төлж эрхээ сунгадаг. Ингэх ямар хэрэгтэй юм бэ. Мөн Хөгжлийн банкийг том хэмжээтэй төсөл хөтөлбөрүүдийг хүү бага, хугацаа урттай  зээлээр санхүүжүүлэх, бизнесийг дэмжих зорилгоор байгуулж байснаараа ажиллуулах хэрэгтэй болсон. Хүүгээр болон валютын ханшаар аж ахуйн нэгжүүдээ боомилж болохгүй. 

Арилжааны банкны зээл, зээлийн хүүгээр том төсөл явна гэж байхгүй л дээ. Мөн элс хайрга, түгээмэл тархацтай ашигт малтмал ашиглахад ямар яам хариуцах, хариуцлагын тогтолцоог бий болгож, БХБЯамыг Барилга, барилгын материал үйлдвэрлэлийн яам болгох хэрэгтэй гэж боддог.

Ашигт малтмал гэж та ярилаа. Материал үйлдвэрлэгч нар түгээмэл тархацтай ашигт малтмал ашиглан үйлвэрлэлээ явуулдаг. Энэ тал дээр танд нэмж хэлэх зүйл байгаа байх гэж бодлоо? 

Тийм. Ашигт малтмал манай орны бүхий л нутаг дэвсгэрт байдаг. Эдгээр маш сайн судлагдсан түүхий эдийг ашиглан барилгын материалын жижиг дунд үйлдвэрлэлийг аймаг сум орон нутагт хөгжүүлж, гаднаас авдаг барилгын материалыг дотоодоо үйлдвэрлэдэг болчихвол маш олон ажлын байр нэмэгдэнэ, дотоодын хэрэгцээгээ бүрэн хангадаг болно. Үүнд төр засаг бодлогоо чиглүүлж ажиллах шаардлагатай байна. 

Өнөөдөр цементийн үйлдвэрүүд бүрэн хүчин чадлынхаа 40 хүрэхгүй хувийг ашиглан зах зээлгүй, зөвхөн зуны дулаан улиралд ажиллаж байгаа энэ үйлдвэрүүдээ дэмжээд 40-50 жилээр Монгол улсынхаа бүтээн байгуулалт, хөгжлийг хармаар байна. Энэ бүтээн байгуулалтыг хийхэд гол барилгын материал нь цемент. Тэгэхээр цементийн үйлдвэрүүдээ адлах биш дэмжих бодлого үнэндээ дутагдаж байна. Монгол улс эсгий гэр утаа, тоос шорооноос салж, бүтээн байгуулалт хийж, дэлхийн улс орнуудын хөгжилтэй хөл нийлэн, хот шиг хот, улс шиг улс болно гэвэл эхний ээлжид нефть, цахилгаан эрчим хүчээ мөн өөрсдөө хангадаг болох ёстой.

Барилгын хамгийн гол түүхий эд болох цементийн үйлдвэрийг өнөөдрийг хүртэл өргөжүүлэн тэлж, үйл ажиллагааг нь амжилттай авч явахад гүйцэтгэх захирал таны зүгээс их ур ухаан, чадвар, туршлага шаардагдсан байх? Өнөөдрийг хүртэлх таны компаниа удирдаж явсан арга барил тань юу байв? 

Би үйлдвэртээ ажиллах хугацаандаа янз бүрийн л ажилд тохоон томилогдож, ажиллаж байлаа. Ямар ч ажилд сэтгэлээсээ хандаж ажиллах, тулгарсан бэрхшээлийг даван гарах, хамт олонтойгоо ойлголцож, нэг зүгт харж ажиллахыг хичээдэг. Олон жил ажилласан туршлага, мэдрэмж байдаг байх. Гэхдээ энэ үйлдвэр хамт олон, Хөтөл хотоос ажил амьдрал маань эхэлсэн болохоор бүх мэдлэг, боломжоо дайчлан сүүлийн 17 жил үйлдвэрээ удирдаж залуучуудтайгаа ажиллаж байна. Манай залуучууд үйлдвэрээ цаашид хэнээс ч дутахгүй авч явах чадвартай, мэдлэг мэргэжилтэй жинхэнэ мэргэжлийн баг болон бүрдэн ажиллаж байгааг хараад баярлаж явдаг. 

Компанийн түүхэн хөгжлийн 38 жилийн хугацаанд барилгын материал үйлдвэрлэлээр мэргэшсэн туршлагатай олон чадварлаг ажилтнууд бэлтгэгдэж гарсан нь Монгол улсын барилгын материал үйлдвэрлэлийн салбарт мэргэжлийн чиглэлээр ажиллаж байна. Манай компанид Монгол улсын зөвлөх инженер 4, мэргэшсэн инженер мэргэжилтэн 26, сургагч багш 16, үнэлгээний ажилтан 20 гэх мэт нийт 878 ажилтныг удирдан  ажиллаж байна. Бид цаашид өөрийн мэргэшсэн ажилтнуудын мэдлэг ур чадварт тулгуурлан мэргэжлийн ажилтнууд бэлтгэж эхэлсэн ба 9 мэргэжлээр сургах эрх бүхий Сургалтын төв ажиллуулан сургалт хийж, мэргэжилтэй ажилтнууд бэлтгэж байна.

38 жилийн түүхт, 800 гаруй ажиллах хүчинтэй танай компанийн хувьд нийгмийн хариуцлагын хүрээнд хэд хэдэн томоохон ажлуудыг хийсэн.  Сүүлийн үед хийгдэж буй ажлуудаасаа дурдвал? 

Энэ хугацаанд бид бүхэн Монгол улсын хамгийн томоохон гэсэн бүхий л бүтээн байгуулалтууд болон зам гүүрийн бүтээн байгуулалтад оролцож явснаараа бахархдаг. Манай компани нийгмийн хариуцлагын хүрээнд Хөтөл хотын ард иргэд, төр төсвийн байгууллагуудын халаалт, хэрэглээний халуун усны хэрэгцээг хангаж, жилд 2,4 тэрбум төгрөгийн алдагдлыг 100 хувь хариуцан олон жил ачааллыг үүрэн ажиллаж байна. 

"Цемент Шохой" ХК-ийн хамт олон 

Анх манай компанийг түшиглэж Сайхан сум үүсгэн байгуулагдсан ба сумын хэмжээнд хамгийн том үйлдвэр учир орон нутаг болон ард иргэдэд шаардлагатай бүтээн байгуулалтад оролцож ирсэн. Сүүлийн үе хийгдэж буй ажлууд гэвэл 2021 он гараад коронавирусын цар тахлын улмаас үйл ажиллагаа хязгаарлагдаж байгаа хэдий ч ажилтнууддаа, Хөтөлчүүддээ дугуй унах, алхах зориулалт бүхий 2,5 метр өргөн, 1700 метр урт “Эрүүл мэндийн зам”-ыг хийлээ. Сайхан сумын хэмжээнд 4-6 настай 140 нарс суулгаж, нийт ажилтны 0-18 насны хүүхдэд хадгаламж нээж өгөх, Сайхан сумын амьжиргааны төвшин доогуур 300 өрхөд гурил өгөх, Сайхан сумын Гал түймэр унтраах аврах анги, Нэгдсэн эмнэлэг, Цагдаагийн хэлтэст  мөнгөн тусламж үзүүлэх зэрэг ажлууд хийгдсэн байна. 

Барилгын талх хэмээх цементийн үйлдвэрийг хөгжүүлэн, салбартаа хувь нэмэр болон дуу хоолойгоо хүргэж яваа танд болон танай хамт олны цаашдын ажилд амжилт хүсье.

Сэтгүүлч: Ц.СОЛОНГО