IHG групп нь Хятадын зочид буудлын салбарын нэгэн том төлөөлөгч бөгөөд 2018 онд 11 сард нээлтээ хийсэн Inter Continental Shanghai Wonderland зочид буудал нь тэдний нэгэн чухал бүтээн байгуулалтын ажил байсан бөгөөд, өдгөө тухайн группын нэрийн хуудас болж чаджээ.

Архитекторын зорилго

"Зөвхөн уурхайг ашиглахаас гадна Шанхай хотын хөл хөдөлгөөнөөс хол тайван, тансаг уран зөгнөлийн ертөнцийг бий болгох зорилготой байсан" гэж Жохман хэлэв. Тэрээр өвөрмөц бөгөөд тогтвортой дизайн нь хадан цохионууд, хүрхрээ, хүрээлэн буй толгодын гайхамшигтай байршил, байгалийн зүй тогтлоос санаа авч, усыг тойрон хүрээлж буй ил уурхайн үзэгдэх байдлыг ландшафтдаа тусгах зорилгоо биелүүлжээ.

Зочид буудал байрладаг Сонгжианг дүүрэг нь Шанхай хотын санхүүгийн төвөөс баруун тийш нэг цагийн зайд байрладаг. Зочид буудлын байршил нь нарны гэрлийг дээд зэргээр нэмэгдүүлж, газрын түвшнээс доош сууж байрласан нь хойд зүгийн салхины нөлөөг багасгадаг байна.

Архитектур төлөвлөлт

JADE+QA Architects-ийн бүтээсэн 18 давхар зочид буудал нь хуучин уурхайд сууж тогтсон, газрын гадаргаас доош, хадан цохиог налсан мэт зохиомжтой баригдсан. Өөрөөр хэлбэл орхигдсон уурхайн нэг ханыг ашиглаж барьсан энэхүү барилга нь уурхайн нөхөн сэргээлтийн нэг шинэлэг шийдэл болсон юм.

18 давхар барилгын 16 нь газрын гадарга доор, хоёр давхар нь усан доор байдаг. Усан доорх зургаан люкс өрөө нь 10м гүнзгий давстай усны аквариумтай бөгөөд өрөө болгон нь шөнийн усны шоу үзэх боломжтой тохилог тагттай. Гэрэл ба усан театрууд сэтгэл татам бөгөөд Лас Вегас дахь Bellagio-д болдог усны шоунаас үзэмж, зохиомжийн хувьд хамаагүй илүү ажээ.

Орхигдсон уурхайн карьерийг үзэсгэлэнтэй орчин бүхий тансаг зэрэглэлийн зочид буудал болгох нь ерөнхий архитектор Мартин Жохманий мэдэлд байсан бөгөөд тэрээр чадварлаг баг бүрдүүлж тухайн барилгыг барьж дуусгах явцдаа шинээр бүртгэгдсэн 41 патентыг гаргасан гэхээр яалтач үгүй инженерчлэл, уран барилгын хувьд цоо шинэ шийдэл байсан нь харагдана.

Дотоод төлөвлөлт 

62171 мкв талбай бүхий тус зочид буудал нь газар дээрх төвшинд 1000 хүний багтаамжтай хурал, хүлээн авалтын танхим мөн ил уурхайн ойр орчимд хүрхрээ бүхий ресторануудтай аж. Хаданд авирах, Банже жамдинг хийх гэх мэт экстрем спортын олон төрлийн үйл ажиллагаа явуулдаг төвүүдтэй байна. 

Муруй хэсгийн ихэнх нь 337 зочин хүлээн авах өрөөнөөс бүрдэх бөгөөд энэ нь тус барилгын төв хэсэгт орших 100м хүрхрээг тагтан дээрээсээ үзэж, мэдрэх боломжийг бүрдүүлжээ. Зочид буудлын хамгийн доод давхарт усан бассейн болон бусад усан спорт бүхий амралт чөлөөт цагийн цогцолбор байрлана.

Эрчим хүч 

Зураг төсөлд хэд хэдэн тогтвортой байдлын шинж чанарыг өргөн цар хүрээтэйгээр тусгасан юм. Дизайнаасаа эхлээд ашиглалттай ногоон дээвэр, газрын гүний дулаан болон нарны эрчим хүчийг ашиглах хүртэл тус зочид буудал нь сэргээгдэх эрчим хүч, байгалийн гэрэлтүүлгийг өргөн цар хүрээтэйгээр бий болгоно. Байгалийн гэрэлтүүлэгтэй дотоод хүрхрээ, ногоон ургамал бүхий байгалийн чулуулгийн хэсгийг гадна талдаа багтаах бөгөөд дээр дурдсан ногоон дээвэр нь уг бүтээн байгуулалтыг хүрээлэн буй орчинтой уялдаа холбоотой болгож байгаа юм. 

550 гаруй сая долларын хөрөнгө оруулалтаар боссон уг зочид буудлын 1 шөнийн  өрөөний үнэ нь 360 орчим доллараас эхэлдэг байна. 

Уг төсөл нь 105,350м2 талбайг хамардаг. Төсөл нь ил уурхайн нүхэн дэх 16 давхар (үүнд усан доорхи 2 давхар багтана), нүхнээс дээш 2 давхар бүхий таван одтой зочид буудал болон холбогдох барилга, байгууламжуудаас бүрдэх бөгөөд барилга угсралтын нийт талбай 62,171.9м2 байна.

Ил уурхайн нүх нь ойролцоогоор эллипс хэлбэртэй бөгөөд зүүнээс баруун тийш урт нь 280м орчим, хойноос өмнө тийш өргөн нь 220м орчим байдаг. Энэхүү нүх нь 1 дүгээр зурагт үзүүлсэнчлэн хамгийн гүн ёроол хүртлээ 88м гүн, 80° орчим градус бүхий эгц налуу ханатай байна.

                                                        (а)                                                                                               (б)

Зураг 1. Ил уурхайн нүхний харагдах байдал 

(а) Ашиглагдахаа больсон ил уурхайн нүхний бүдүүвч          (б) Ашиглагдахаа больсон ил уурхайн нүхний ханын налуу

Ил уурхайн нүхний тогтоцтой уялдуулан Интерконтинентал Шанхай Вондерландад шинэ хэлбэрийн хоёр цэгийн тулгуур бүтээцийн системийг ашиглажээ. Барилгын хэвтээ чиглэлийн ачаалалд ажиллах бүтээц нь өндөр барилгын барилгын механикийн тооцооны схемд түгээмэл хэрэглэгддэг “консоль дамнуруу” системтэй биш юм. Тооцооны схемийн нэг үзүүр нь хөшүүн, нөгөө үзүүр нь нугасан тулгууртай тусгай “энгийн дамнуруу” систем байна. Ил уурхайн нүхэн дэх үндсэн барилга нь өгөршлийн зэрэг багатай хадан хөрсөн хайрцган сууриар хөшүүн бэхлэгдэхийн зэрэгцээ үндсэн барилгын ган татанга нь нүхний дээд хэсгийн хадан үед нугасан тулгаараар бэхлэгддэг. Үндсэн бүтээц нь тулгуурууд бүхий ган арагт системтэй бөгөөд үндсэн цамхагт бүтээц болон подиум бүтээцээс бүрддэг. Барилгын нэг маягийн байгуулалт, хөндлөн огтлолын бүдүүвч зэргийг зураг 2-4-д үзүүлэв.   

Зураг 2. Барилгын давхарын байгуулалт 

(а) Ил уурхайн нүхний гадна байрлах нэгдүгээр давхарын байгуулалт 

(б) Ил уурхайн нүхний гадна байрлах хоёрдугаар давхарын байгуулалт 

(в) Ил уурхайн нүхэнд байрлах давхаруудын нэг маягийн байгуулалт 

(г) Ил уурхайн нүхэнд байрлах В14 давхарын байгуулалт

                                              (а)                                                                         (б)

Зураг 3. Барилгын хөндлөн огтлол (нэгж: м) 

(а) Барилгын хойд талын харагдах байдал 

(б) Барилгын өмнө талын харагдах байдал

Ил уурхайн ханын налуугийн тогтворын шинжилгээ 

Олон жилийн турш цаг агаарын үйлчлэлд өртөсний улмаас ил уурхайн хана бүхэлдээ 5 дугаар зурагт үзүүлсэн шиг өгөршсөн байв. Үндсэн барилгын барилга угсралтын ажлын явцад болон ашиглалтын үед ил уурхайн ханын налуугийн тогтвортой байдлыг хангах үүднээс нүхний геологийн бүтцийг судлан шинжилжээ. Судалгааны талбайг 4 бүсэд хуваасан бөгөөд зочид буудлын төсөл нь 6 дугаар зурагт үзүүлсэнчлэн 3 дугаар бүсэд байрладаг.

 Зураг 5. Ил уурхайн анхны харагдах байдал                               Зураг 6. Судалгааны талбайн бүдүүвч зураг

Судалгааны үр дүнгээс уурхайн нүхний өмнөд хэсэгт зүүнээс баруун тийш чиглэлтэй эгц босоо 195° өнцөгтэй, шахалт болон мушгиралтын жижиг хагаралууд үүссэн нь тогтоогдсон. Ашиглагдахаа больсон ил уурхайн нүхний геологийн судалгаанд хамрагдсан дөрвөн бүсийн чулуулгийн төрлүүд нь бүгд гол төлөв андезитээс бүрдсэн галт уулын хайлмалаас үүссэн хад байв. Төсөл байрлаж буй 3-р бүсэд хурц эгц босоо өнцөг бүхий багахан хэмжээний ан цав үүсэн байжээ.

Уурхайн нүхний геологийн нөхцөлийн дагуу нүхний налуугийн бэхэлгээг урьдчилан хүчитгэсэн анкер кабель, анкер боолт болон шүршмэл бетон зэргээр хийсэн. Урьдчилан хүчитгэсэн анкер кабель бэхэлгээг нүхний амсраас 11.5 м хүртэлх гүн хэсэгт хэрэглэж, гадаргууг нь шүрмэл бетоноор хучсан. Урьдчилан хүчитгэсэн анкер кабель нь 170 мм голчтой, 750кН-аас 1750кН хүртэл хүчээр урьдчилан хүчитгэсэн, нийт урт нь 15- 35м хүртэл урттай байв. Нийтдээ 2000 ширхэг урьдчилан хүчитгэсэн анкер кабель хэрэглэгдсэн байна. Анкер боолтны өрөмдлөгийн нүхний голч 100мм байв. Ил уурхайн налуу ханын доод хэсэгт 25мм голчтой, цаг уурын нөлөөлөлд ихээр өртөж өгөршсөн үеүүдэд 30мм голчтой анкер боолт хэрэглэсэн. 7 дугаар зурагт үзүүлсэнчлэн 25мм голчтой анкер боолт нийт 2988 ширхэг, 30мм голчтой анкер боолт нийт 9789 ширхэг суулгагдсан байна. 

Зураг 7. Ханын налуугийн бэхэлгээний бүдүүвч зураг 

Ил уурхайн нүхэн дэх барилга, байгууламжийг аюулгүй ашиглахад шууд нөлөөтэй тул нүхний ханын налуугийн тогтвортой байдал нэн чухал юм. Нүхний 3 хэмжээст хүчдэлт төлөв байдлыг бодитоор загварчлах зорилгоор хатуу биеийн механикын загварыг динамик төгсгөлөг элементийн аргыг ашиглан гаргасан. Үүний дараагаар нүхний налуугийн газар хөдлөлтийн үйлчлэл дэх динамикийн хариу шинж чанар болон тогтворшлийн шинж чанарыг шинжилсэн байна.

Абакус программыг хувийн хэлбэлзлийн хэлбэр тодорхойлох тооцоонд ашигласан. 3 хэмжээст төгсгөлөг элементийн загварыг 8 дугаар зургаас үзнэ үү. Энэхүү загвар нь 130м өндөр, 677.4м урт, 626м өргөн байв. Газар хөдлөлтийн хариу үйлчлэлийн шинжилгээг хийхдээ загварын хилийг хязгааргүй элементээр тогтоосон бөгөөд загварын нийт элементийн тоо 247,867, зангилааны нийт тоо 253,779 байв. Торлосон элементүүдийн хуваалт ил уурхайн нүхний ойр орчимд илүү нягт байсан ба элементүүдийн хамгийн их хэмжээ нь 2х2х2м-ээс ихгүй байна. Загварын хуваалт шигүү хэсэг дэх элементийн тоо 185,729 байжээ.

Зураг 8. Ил уурхайн нүхний төгсөглөг элементийн загвар

9 дугаар зурагт үзүүлсэнчлэн ил уурхайн нүхний ханын налуугийн гадаргууг газар дээрх бодит нөхцөл байдлын дагуу загварчилжээ. Төгсгөлөг элементийн загварт геологийн судалгаагаар илэрсэн хагарлуудыг оруулсан бөгөөд ил уурхайн нүхний хагарлуудыг төгсөглөг элементийн загварт нь тусгасан. Ил уурхайн нүхний ёроолын бодит нөхцөл байдлыг дууриалгахын тулд нүхний ёроолд байрлах хэсэгчлэн цухуйж товойсон гурван хэсгийг төгсгөлөг элемент болгон загварчилжээ. Ногоон хэсэг нь бат бэх муу буюу хагарал юм. Загварын дээд өндөржилт нь +0м, нүхний ёроолын өндөржилт нь −80м, загварын ёроолын түвшин нь -130м тус тус байв. Ил уурхайн нүхний төгсгөлөг элементийн загварын хажуугийн харагдацыг зураг 10-д үзүүлэв.

Зураг 9. Ил уурхайн нүхний төгсгөлөг элементийн загварын ёроол хэсэг 

Зураг 10. Ил уурхайн нүхний төгсгөлөг элементийн загварын хажуугийн харагдац

Ил уурхайн нүхний хөрсний эхний үе нь төрөл бүрийн хөрсний холимог бүхий давхарга бөгөөд шар өнгөөр үзүүлсэн. Хоёрдугаар үе нь саарал шавар хөрс, цагаан саарал өнгөөр үзүүлсэн. Гуравдугаар үе нь шар шавар, улаанаар үзүүлсэн. Дөрөвдүгээр үе нь дунд зэргийн өгөршилтэй хадан хөрс, хараар үзүүлсэн. Тав дахь үе нь бага зэргийн өгөршилтэй хадан хөрс, цагаанаар үзүүлсэн. Дээд гурван үе хөрсний нийт зузаан L нь 38м. Таван үе хөрсний нийт зузаан H нь 130м. Хөрсний механик шинж чанарын үзүүлэлтийг хүснэгт 1-д үзүүлэв. 

Хүснэгт 1: Материалын шинж чанар 

Анкер боолтуудын хүчитгэлийн нөлөөллийг ил уурхайн нүхэнд бодитоор тусгахын тулд анкер боолтуудыг холбоос элементүүд болгон загварчилсан. Боолтуудыг чангалсаны дараах хүчийг холбоос элементүүдэд үйлчлүүлэх байдлаар зураг 11-д үзүүлсэнчлэн урьдчилсан хүчитгэлийн ачааны нөлөөллийг загварчлалд тусгажээ.

Зураг 11. Анкер боолтны төгсгөлөг элементийн загвар дахь бүдүүвч

Статик ачааллыг 3 хэмжээст загварт үйлчлүүлсэн бөгөөд тооцооноос гарсан үр дүнг энэхүү загварын анхны хүчдэлд төлөв байдал болгон авсан. Дараа нь анкер бэхэлгээтэй болон бэхэлгээгүй тохиолдолд ажиллах гурван нөхцөлд ил уурхайн ханын налуугийн ерөнхий тогтворшлыг шинжилсэн. Хүснэгт 2-т үзүүлсний дагуу илүүдэл статик ачаа, сул газар хөдлөлт, хүчтэй газар хөдлөлт гэсэн ялгаатай нөхцөлүүдийг авч үзсэн.

Хүснэгт 2: Тооцооны нөхцөлүүд

Илүүдэл статик ачааны тооцоонд бүтээцийн хувийн жин, дээд бүтээцийн илүүдэл ачаа зэрэг ачаануудыг оруулсан. Газар хөдлөлтийн хариу үйлчлэлийн шинжилгээнд хамгийн их хурдатгалын утгыг хүчтэй газар хөдлөлтөд 180 см/сек2, сул газар хөдлөлтөд 34 см/сек2 гэж авчээ. Төгсгөлөг элементийн загварын доод хэсэгт хэвтээ чиглэлд газар хөдлөлтийн үйлчлэл үзүүлэх замаар үүнийг хийсэн. Хүчтэй газар хөдлөлтийн тооцооны үр дүнд үндэслэн тооцооны үр дүнгийн шинжилгээ хийжээ. Бэхэлгээгүй нөхцөлд хамгийн шилжилт нь нүхний амсар дээр 150мм байв. Нүхний ойр орчим дахь хамгийн их шилжилт нь 40 мм байв. Хамгийн их хүчдэл нь 5.4 МПа, ил уурхайн нүхний ёроол хэсэгт илүү их хүчдэлтэй байв. Бэхэлгээтэй нөхцөлд хамгийн шилжилт нь нүхний амсар дээр 80мм байв. Нүхний ойр орчим дахь хамгийн их шилжилт нь 20 мм байв. Өөрөөр хэлбэл, хүчтэй газах хөдлөлтийн үйлчлэлд ил уурхайн нүхний ханын налуугийн тогтворшил нь шаардлагад нийцэж байна. Ялгаатай нөхцөлүүд дэх тооцооны үр дүнд ханын налуугийн харьцангуй шилжилт болон тогтворшлын илтгэлцүүрийг 3 дугаар хүснэгтд үзүүлсэн.

Хүснэгт 3: Налуугийн тогтворшлын тооцооны үр дүн

Уг барилгын байгууламжийн шинжилгээ болон Барилга угсралтын технологийн талаар дараагийн дугаараас уншина уу 

Эх сурвалж: The Key Construction Тechnology Research on the Intercontinental Shanghai Wonderland судалгааны өгүүллэгээс хэсэгчлэн орчуулав