Айл өрх бүрт бүртгэл хийх, мэдээлэл солилцох цахим апликейшн нэвтрүүлнэ
“Голд Компас” ОСАА-г үүсгэн байгуулагч, Орон сууц нийтийн аж ахуйн мэргэжлийн холбооны тэргүүн Д. Оюунбилэгтэй ярилцлаа. Тэрээр 1993 онд Техникийн их Сургуулийн инженерийн байгууламжийн ангийг халаалт агаар сэлгэлтийн инженер мэргэжлээр төгсөж Орон сууц ашиглалтын 2-р контороос ажил амьдралын гараагаа эхэлсэн юм.
Монголд ОСНАА чиглэлээр нийт хичнээн компани ямар уялдаа, холбоотойгоор ажиллаж байна вэ?
Энэ жил Орон Сууц Нийтийн Аж Ахуй үүсэж хөгжсөний 90 жилийн ой, хувийн хэвшил үүсэж хөгжсөний 20 жилийн ой тохиож байна. Улс орон маань зах зээлийн эдийн засагт шилжих шилжилтийн үед Нийтийн аж ахуйн салбар тэр дундаа орон сууцны салбар хямралд орж дундын өмчлөлийн эд хөрөнгө эзэнгүйдэж, эвдэрхий хаалга, хагархай цонх, харанхуй орц байсныг бид бүхэн мэднэ. Тэр хүнд үед төрийн ажлыг үүрэлцэж цаг үеийн нөхцөл шаардлагаар хувийн орон сууцны конторууд үүсэж бий болсон. Одоо Хот, суурины усан хангамж, ариутгах татуургын ашиглалт үйлчилгээг зохицуулах зөвлөлөөс олгосон Тусгай зөвшөөрөл бүхий 78, Эрчим хүчний зохицуулах хорооноос олгосон Тусгай Зөвшөөрөл бүхий 66 контор Нийслэл хотод үйл ажиллагаагаа явуулж байна. Өнөөдрийн байдлаар Улаанбаатар хотын 6 дүүрэгт 120 орчим мянган хэрэглэгч өрхөд үйлчилгээ үзүүлж байгаа нь нийт орон сууц, хэрэглэгчийн 50 гаруй хувьд нь хувийн хэвшил хүрч үйлчилж байгаа билээ.
“ОСНАА Мэргэжлийн Холбоо” - д нийт хичнээн гишүүнтэй бэ, ямар зорилго чиглэлтэй ажилладаг вэ? Өнөөдөр хувийн хэвшлийн 66 контор нь хоёр Төрийн бус байгууллагад харьяалагдан үйл ажиллагаагаа явуулж байна. Манай конторын хувьд Орон сууц нийтийн аж ахуйн мэргэжлийн холбооны /ОСНААМХ/ гишүүн ба миний бие 2019 оноос уг холбооныхоо тэргүүнээр ажиллаж байна. Манай холбоо ижил үйл ажиллагаа явуулдаг 38 гишүүн байгууллагынхаа эрх ашгийг хамгаалан хөгжлийн төлөө хамтдаа хичээн ажиллацгааж байна. Бид хамтдаа Нийслэлийн Захирагчийн ажлын алба, ЭХЗХ, ХСУХАТАҮЗЗ, УСУГ, УБДС, ЦТС, СӨХДЗ, ШӨХТГ зэрэг төр, олон нийтийн байгууллагуудтай хамтарч ажилладаг. Бидний ажлыг гол дүгнэгч нь нийслэлийн оршин суугч иргэд байдаг. Бид иргэдийнхээ тав тухтай амьдралын баталгааг хангахын тулд 24 цагаар тасралтгүй үйл ажиллагаа явуулан үйлчилгээ үзүүлдэг. Оршин суугч иргэд маань дулаан гэртээ, тасралтгүй халуун, хүйтэн устай байж ариутгах татуурга болсон бохир усыг тогтмол татан зайлуулж, аваар осол тасалдал гаргахгүйн тулд хэнд ч анзаарагдахгүй боловч бүхэл бүтэн цогц мэргэжлийн анги далд үйл ажиллагаа явуулж байдгийг тэр болгон хүмүүс ойлгодоггүй. Бидний ажил үйлчилгээнд хяналт тавьж бидний ажилд үнэлгээ өгдөг шууд удирдлагаар хангадаг газар бол Тусгай зөвшөөрөл олгогч хоёр зохицуулах хороо юм. Тэд жил жилээр бидний ажлын алдаа оноог үнэлж дүгнэдэг. Үнэлгээнд хамгийн гол нөлөөлдөг хүчин зүйлс бол хэрэглэгчийн гомдол санал тэдний сэтгэл ханамж. Мөн хангагч байгууллагуудтай өр төлбөрийн үлдэгдэлгүй байх ёстой.
ОСНАА чиглэлээр үйл ажиллагаа явуулж байгаа компанийн хувьд хамгийн сайн шилдэг гэдгийг ямар үзүүлэлт ур чадвар харуулна гэж үздэг вэ? Төсөл хэрэгжүүлэгчид хамтран ажиллах энэ чиглэлийн компанийг сонгохдоо юун дээр анхаарах ёстой гэж бодож байна?
Төсөл хэрэгжүүлэгч барилгын компаниуд ашиглалт хариуцах Тусгай зөвшөөрөл бүхий байгууллагаа сонгохдоо Үл хөдлөх хөрөнгийн үнэ цэнийг унагахгүй үргэлжлүүлэн ашиглалт үйлчилгээг маш сайн аваад явж чадах тэдний барьсан барилгын чанар үзэмж насжилтыг хариуцах хариуцлагатай, оршин суугчдад сэтгэл ханамжтай үйлчилгээ үзүүлдэг, Төсөл хэрэгжүүлэгчийн төслийг болон нэр хүндийг сайнаар хадгалж үлдээх компанийг сонгох ёстой байх. Зарим барилгын компани материал болон хийц шийдлийн чанар муутай барьсан барилгаа ямар ч хамаагүй ашиглалтын газар өгөөд хаяад алга болох явдал бий.
Танай хувьд ОСНАА ухаалаг программыг нэвтрүүлжээ. Энэ талаар танилцуулахгүй юу? Ингэснээр хэрэглэгч, үйлчлүүлэгчдэд ямар давуу тал үүсэж байгаа вэ?
Хувийн хэвшил орчин үетэйгээ хөл нийлүүлж хэрэглэгчдийн цаг завыг хэмнэсэн хүрч үйлчилсэн ухаалаг программыг авч хэрэгжүүлэхийг зорьдог. Манай хувийн конторууд ихэнх нь смарт программыг авч хэрэгжүүлдэг. Манай компанийн хувьд хэрэглэгчдийн дуудлага, төлбөр, үйлчилгээний чанартай холбоотой ухаалаг программыг хэрэгжүүлээд 3 дахь жилийнхээ нүүрийг үзэж байна. Одоо Ус Дулаан Дамжуулах Төвийн халаалт, халуун, хүйтэн усны тоног төхөөрөмжийн мэдээлэл судалгаа гаргах, параметрийн мэдээгээ автоматаар авах, усны алдагдлыг мэдээллэх, цогц техникийн программыг хэрэгжүүлж эхлээд байна. Удахгүй айл өрх бүрт бүртгэл хийх, мэдээлэл солилцох, усны тоолуурын заалт, төлбөрийн мэдээ, үйлчилгээний тариф зэргийг багтаасан цахим апликейшн нэвтрүүлэхээр зорин ажиллаж байна. Эдгээр ухаалаг программуудыг нэвтрүүлснээр үйлчилгээ хүрэх хугацааг богиносгож, авсан үйлчилгээндээ сэтгэл ханамжийн үнэлгээ дүн тавьж, өөрсдийн хэрэглээний төлбөрийг хянах боломж бололцоог бүрдүүлж өгнө.
Ариутгах татуургын норм, дүрмийг өнөөгийн байдлыг хэрхэн үнэлж, дүгнэдэг вэ? өөрчилж, сайжруулах шаардлагатай гэж үздэг үү?
Яг өнөөгийн нөхцөл байдалд халуун усны эргэлтийн шугамыг алчуур хатаагчаар дамжуулан эргүүлснээр ус зэвтэй гарах үндсэн нөхцөл бүрдэж байна. Алчуур хатаагч нь өөрөө зэвэрдэг учраас халуун ус, зэвтэй алчуур хатаагчийг дайран өнгөрөхдөө өөрөө зэвтэй ус болж очдог. Мөн зарим айлын алчуур хатаагч цоорсноос айл нь өөр дээрээ хаах явдал ихсэж улмаар харалдаа айлуудын усны эргэлт түгжигдэн усны температур даралт унаж очих байдал үүсдэг. Хэдийгээр бид халуун усыг доор узель болон ус дулаан дамжуулах төв дээрээ үйлдвэрлэн зохих хэмийн дагуу гаргадаг ч дээр дурдсан асуудлуудаас болж төгсгөлийн болон бусад хэрэглэгчдэд бага хэмтэй, даралт багатай халуун ус очих явдал их. Тийм учраас монгол улс барилгын хийц элемент болон хэрэгцээний усны чанарын стандартаа шинэчлэх шаардлагатай байна гэж харж байна.
Эцэст нь хэлэхэд барилгын компани гоё сайхан чанартай барилга бариад л орхино, харин тэр барилгын насжилт, өнгө зүс, үнэ цэнэ нь ашиглалтын байгууллага /контор/, СӨХолбооноос ихээхэн хамаардаг юм даа.
СӨХ, Мэргэжлийн байгууллагын /контор/ хоорондын уялдаа холбоо, ажлын үр дүнгээс хамаарч оршин суугч, иргэдийн эрүүл аюулгүй орчинд, тав тухтай амьдрах эрх хэрэгждэг. Энэ асуудлын хүрээнд шийдвэрлэгдээгүй маш олон асуудал шийдлээ хүлээж байна.
Орон сууцны конторууд дулаан, усны төлбөрийг ямар үнэлгээгээр нэхэмжилж байгаа вэ?
Орон сууц ашиглалтын алба /Контор/- нь хариуцсан хэрэглэгчдийн Дулааны төлбөрийг “Эрчим хүчний зохицуулах хорооны 2019 оны 123 дугаар тогтоол”, Усны төлбөрийг “ХСУХАТАҮЗЗ-ийн 2019 оны 23 дугаар тогтоол”-ыг тус тус үндэслэн ашиглалтын төлбөрийн нэхэмжлэлийг тооцож гаргаж байна. Тодрулбал,
Хаяг: ХУД - ийн 21 -р хороо Шүрт хотхон 806 -р байрны 1 давхарт "Голд Компас" ХХК
Вэб сайт: goldcompass.barilga.mn
Утас: 99169782
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.