Аливаа бизнест ашиг хэрэгтэй ч чанар хамгийн чухал
Орчин үеийн техник, технологийг ашиглаж, хурдтай ажиллахын зэрэгцээ хамгийн чухал үнэт зүйл болох чанарыг эрхэмлэж, барилгын салбарын амин сүнс болох бетон зуурмагийг чанартай хийж, үйлчлүүлэгчиддээ сэтгэл ханамжийн баталгаа өгч ажилладаг “Болд Конкрет” ХХК-ийн гүйцэтгэх захирал Ж. Болд-Эрдэнэтэй ярилцлаа.
“Бүхнийг чанараар бүтээнэ” уриатай “Болд Конкрет” ХХК-ийг хэрхэн, ямар зорилгоор байгуулснаа танилцуулаач?
Монгол улсад шинэ үеийн барилгын салбар үүсч хөгжөөд 90 гаруй жил болсон бөгөөд барилга бүтээн байгуулалтын үеийг хувьсгалын үе шат, социализмын үе шат, ардчиллын дараах гэж гурав ангилдаг. Энэ бүхнийг хараад Монголын барилгын салбарын хөгжил дэлхийн бусад улсуудаас доогуур, чанараар хоцрогдож байна гэж үзсэн. Тиймээс барилгын компаниудад чанартай бүтээгдэхүүнийг нийлүүлэхийг зорьж 2020 оны 4-р сард бид компаниа байгуулсан юм.
Миний хувьд 2009 оноос хойш бетон зуурмагийн салбарт ажиллаж байна. “Айзава Монголиа” гээд Японы 100 хувийн хөрөнгө оруулалттай байгууллагад орчуулагчаар ажиллаж эхлээд үйлдвэрийн дарга болтлоо дэвшсэн. Түүнээс хойш 3 жилийн дараа тус компанийн төв салбарт туршлага судалсны үндсэн дээр эх орондоо эргэн ирж компаниа байгуулан ажиллаж байгаа нь энэ юм.
Гадаадын хөрөнгө оруулалттай байгууллагад ажиллахын давуу болон сул талыг та юу гэж харав?
Техник технологийн дэвшилт, ажлын байрны зохицуулалт гээд их зүйл суралцах давуу талуудтай ч эсрэгээрээ борлуулалт бага, удирдлагууд нь хол байдаг учраас ажилчдынхаа нийгмийн асуудалд анхаарч чаддаггүй, яг ажлын талбай дээр юу болж байгааг мэддэггүй гэх зэрэг олон сул талуудтай. Тиймээс бидний үеийн залуус өөрсдийн мэдлэг чадвараараа эх орондоо ихийг хийж бүтээх боломжтой юм байна, гадаад руу урсах валютын урсгалыг дотооддоо авч үлдэх нь зөв гэж бодон 100 хувь дотоодын хөрөнгө оруулалттай, 100 хувь татвараа эх орондоо төлдөг дотоодын компани байгуулсан.
Компани байгуулахдаа бетон зуурмагийн салбарын талаар зах зээлийн судалгаа хийв үү?
Монголд идэвхтэй үйл ажиллагаа явуулж буй 60-аад бетон зуурмагийн компанийн судалгаа байдаг. Гэтэл Улаанбаатар хотод 30 бетон зуурмагийн компани байхад дотоодын хэрэгцээг бүрэн хангана гэж үздэг юм билээ. 2011, 2012 оны дараагаас энэ төрлийн байгууллагууд борооны дараах мөөг шиг ихсэж хоорондоо үнийн хөөрөгдөл үүсгэж, эргээд өөрсдөдөө санхүүгийн маш том хүндрэл учруулдаг. Бид яагаад ийм үед бетон зуурмагийн компани байгуулж байна вэ гэхээр барилгын хамгийн чухал хоёр зүйл байдгын нэг нь арматур, нөгөө нь бетон зуурмаг юм.
Арматурын 10 хувийг дотооддоо хаягдал төмрөөр үйлдвэрлээд 90 хувийг гаднаас импортолдог. Харин бетон зуурмагийг 100 хувь дотооддоо үйлдвэрлэдэг. Гэтэл бетон үйлдвэрлэгчид бартераар бүтээгдэхүүнээ борлуулаад арматур яагаад бэлэн мөнгөөр худалдаалагдаад байна. Тэгэхээр бид цаашид энэ бартер гэдэг зүйлийг зогсоох ёстой юм байна, бетон зуурмаг ч гэсэн барилгын чухал материал ба эх орондоо илүү чанартай үйлдвэрлэх боломжтой гэдгийг харсан. Чанартай үйлдвэрлэхийн тулд үнийн өрсөлдөөнийг байхгүй болгох, бартер гэдэг зүйлийг үгүй хийх ёстой. Тэгсэн цагт бид чанарыг эрхэмлэж ажиллаж чадна.
Хүн төрөлхтөн цаг хугацаа өнгөрөх тусам байгаль орчноо хайрлан, хамгаалах шаардлагатай болж байна. Танай хамт олон экологийн тэнцвэрт байдлыг хэрхэн хангаж ажилладаг вэ?
Экологи байгаль дэлхийгээ хайрлах тухайд чанар нь эргээд байгаль дэлхийгээ бохирдуулахгүй байх сайн үр дагавартай. Түүхий эд материалуудаа Улаанбаатар хотын ойр орчмоос элс хайрга ханган нийлүүлэгч үйлдвэрүүдээс авдаг. Харин цементийн хувьд Мак цемент, Монцемент, Хөтлийн цемент, Улааны цемент гэсэн байгууллагуудаас гол түүхий эдээ нийлүүлдэг. Хэрэв бид чанартай бүтээгдэхүүн нийлүүлж чадвал барилгын насжилт удааширна. Энэ нь эргээд байгаль дэлхийд хог хаягдал гарах хугацааг уртасгана л гэсэн үг юм.
Таны хувьд удирдлагын зүгээс ажилтнуудаа хэрхэн идэвхжүүлдэг болон хүний нөөцийн бүрдүүлэлт, цар тахлын үеийн үйл ажиллагааны талаар?
Бид анх байгуулагдахдаа зургаан хүний бүрэлдэхүүнтэй ажиллаж эхэлсэн бөгөөд Япон улсад шилдэгт тооцогддог барилгын материал үйлдвэрлэгч компаниудад 10 гаруй жилийн турш барилгын материалын үйлдвэрлэл болон бетон хийцийн салбарт тасралтгүй ажиллаж байсан чадварлаг мэргэжилтнүүдтэй.
Цар тахлын хувьд он дамжихаас гадна, улирлын чанартай барилгын ажил завсардах зэрэг асуудлууд тулгарсан. Гэсэн хэдий ч хөл хорионы ажил зогсонги үед ажилтнуудынхаа цалинг таслалгүй олгосон. Мөн ажлын байраа хадгалахын хажуугаар ажиллах хүчнийхээ тоог нэмж, чанартай бүтээгдэхүүнийг зах зээлд нийлүүлэхийн тулд бүрэлдэхүүнээ улам зузаалж ажиллаж байна. Байгуулагдаад удаагүй хэдий ч энэ салбарт оршин тогтнож, хийж буй ажил, чанараараа тодорно гэдэг чадварлаг хамт олны минь амжилт гэж боддог.
Хамтран ажилладаг байгууллагуудынхаа талаар дурдвал?
Аливаа бизнест ашиг хэрэгтэй ч чанар хамгийн чухал. Тиймээс ч бид чанараараа улсдаа дээгүүрт тооцогдох зорилготой. Нөгөө талдаа харилцагчдын итгэлийг даах, түргэн шуурхай ажиллаж, сэтгэл ханамжийн баталгаа өгч, залуу боловсон хүчнүүдээр багаа бүрдүүлсэн учраас түргэн шуурхай байж чаддаг.
Хамтран ажилладаг байгууллагууд гэвэл Өргөө Вилла ХХК, Оршил Констракшн ХХК, Суруга Девелопмент ХХК, UB group гэх зэрэг олон компанитай хамтран ажиллаж барилгын салбартаа хувь нэмэр оруулж байна. Мөн хамтран ажиллах хүсэлтэй байгууллагуудад цаг хугацаа баримтлах, төслийн графикт хохирол учруулахгүй чанартай бүтээгдэхүүн нийлүүлж чадна гэдгээ хэлэх байна.
Компанийн цаашдын зорилго юу вэ?
Мэдээж чанартай барилга байгууламжийг улс орондоо бий болгоход гар бие оролцож, чанараараа түүчээлэх. Яагаад үүнийг зорилгоо болгож байна гэхээр өмнө төдийлөн анзаарч байгаагүй газар хөдлөлт, байгалийн гамшиг гэдэг зүйл ойр ойрхон үзэгдэх боллоо. Манай улсад сүүлийн 30 жил чанаргүй байгууламжууд ихээр баригдсан нь нууц биш. Энэ нь байгалийн гамшгаас болж маш их хэмжээний хохирол хойч үеүдэд учирч болзошгүй эрсдэл юм. Түүнээс сэргийлэх үүднээс чанартай бүтээгдэхүүн нийлүүлэх ёстой гэдгийг л бид хэлээд байгаа юм. Барилгын салбарт хувь нэмрээ оруулан, богино хугацаанд амжилттай ажиллах сууриа тавьсан танай хамт олонд амжилт хүсье. Ярилцсан танд баярлалаа.
Сайт: https://boldconcrete.barilga.mn/
Холбоо барих: 70007757, 88882090, 99916643
Ц.Солонго
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.