Сүүлийн үед хүмүүс эрүүл агаарт амины орон сууц барьж тав тухтай амьдрахыг илүүд үзэж байгаа ба эзэмшил газартаа тохижилт хийх, ландшафтын дизайны шийдэлд янз бүрийн гоёл чимэглэлийн болон хэрэглээний габионыг ашиглах болсон билээ.

Тэгвэл габион гэж юу вэ? Габион (илүү нарийвчлалтайгаар "gabbia") гэдэг нь Итали хэлнээс орчуулбал "том тор" гэсэн утгатай. Барилга талаас нь тайлбарлавал энэ нь төмөр тороор хийсэн, чулуу эсвэл бусад материалаар дүүргэсэн хийцийн нэр юм. Эзэмшил газрын цэцэрлэгжилт, тохижилтыг габион бүтэцтэй чимэглэх талаар дизайнерууд аль хэдийн маш их санаа гаргаж ирсэн ба хашаа, багана, хиймэл цөөрөм, усан оргилуурын хана, гоёл чимэглэлийн хаалт, мандлын цэцгийн сав, ширээ, сандал, сууцны гадна талыг ч түүгээр хийх боломжтой юм.

Габионоор орчны тохижилтоо хийх нь үзэмжтэй байдаг.

Габион нь янз бүрийн хэлбэр, хэмжээтэй байдаг тул түүнийг барилга болон замын салбарт  хөрсний гулсалтыг хадгалах, үерийн усны урсгалыг  хязгаарлах, эрэг орчмын элэгдэл эвдрэлээс урьдчилан сэргийлэх зорилгоор далан, суваг болгон эгнүүлэн байрлуулдаг ба ердийн геометрийн хэлбэртэй төмөр торон хайрцгийг ландшафтын дизайны чимэглэлийн гол элемент болгон ашигладаг.

Габионы давуу талууд:

● Габионы бүтэц нь удаан эдэлгээтэй бөгөөд усталгүйгээр олон жилийн турш тэсвэрлэх чадвартай байдаг. Үүнд төмөр утасны цайрдсан чанар, дүүргэгч болох чулууны шинж чанар нь нөлөөтэй байдаг.

● Чулуугаар дүүргэсний ачаар габион нь маш сайн ус нэвчилттэй болох тул бүтэц нь гидростатик ачааллыг мэдэрдэггүй. Суурилуулах явцад ус зайлуулах суваг шаардагддаггүй тул цаг хугацаа, нөөцийг хэмнэдэг.

●  Габионы бүтцийн тогтвортой байдал, бат бэх нь цаг хугацаа өнгөрөх тусам нэмэгддэг, ургамалтай хослуулж хийвэл хоорондоо уялдаатай, бүхэл бүтэц болдог.

● Габионыг суурилуулахад хүнд барилгын тоног төхөөрөмж шаардагддаггүй, ​​хөдөлмөр зарцуулалт багатай, өөрсдийн гараар ч хийх боломжтой.

●    Орон нутгийн түүхий эд болох хайрга, дайрга, чулууг дүүргэгчээр ашиглаж болох ба ​​байгаль экологид хор нөлөөгүй.

●     Уян хатан металл торон хана нь хөрсний гадаргуугийн ямар ч хэлбэрт тохирох ба бүтэц нь хөрсний улирлын нөлөөнд тэсвэртэй. Уян хатан байдлаас шалтгаалан бүтэц нь бага зэрэг деформацид ордог боловч нурдаггүй.

Габион-удаан эдэлгээтэй, байгаль орчинд хоргүй, эко хийц юм.

Габионыг төмөр утсаар эрчилсэн контейнер гэж нэрлэдэг бөгөөд үүнд ​​нарийн хэмжээтэй үйлдвэрт боловсруулсан төмөр торыг хэрэглэвэл тохиромжтой. Бэлэн торон хайрцгийг суурилуулах газартаа шууд байрлуулж, сонгосон дүүргэгч материалаар дүүргэнэ.

Байшингийн гадна хана, фасадад хийхэд өвөрмөц шийдэл болдог ба цоколийг ч өнгөлж болдог.

Габион үйлдвэрлэгчид цайрдсан утсыг түүхий эд материал болгон ашигладаг бөгөөд бүрэх нягтрал нь 250-280 г / м байна. Энэ нь янз бүрийн хашаа барихад ашигладаг торон "тор"-ны цайрдсан нягтралаас даруй 5 дахин их юм. Цайрчлахын оронд PVC бүрээсийг утсаар хийж болно. Бүрсэн утаснуудын зузаан нь 2-6мм-ийн хооронд хэлбэлздэг. Төмөр торнууд нь давхар утсыг эргүүлэх технологийг ашиглан хийх ба тодорхой бат бэхтэй байх ёстой. Торны нүхнүүд нь олон өнцөгт хэлбэртэй байдаг ба дүүргэгчийг торон нүхний хэмжээг харгалзан сонгоно.

Габионы бүтцийг геометрийн хэлбэрээр нь дараах гурван төрөлд хуваадаг.

●     хайрцаг хэлбэртэй;

●     хавтгай (матрас) хэлбэртэй;

●     цилиндр хэлбэртэй

Габионыг гагнаж эсвэл торон байдлаар холбож бэхэлж хийнэ. Эхний арга нь тэдгээрийн уулзвар дээр перпендикуляр байрлуулсан утаснуудыг гагнана. Энэ тохиолдолд төмөр торны нүхнүүд тэгш өнцөгт хэлбэртэй байна. Тусгай утсан спираль ашиглан ханыг холбоно. Хоёрдахь арга нь давхар ган утсаар хийсэн торыг хатуу хүрээтэй бэхлэхэд суурилдаг. Энэ тохиолдолд торны нүхнүүд нь зургаан өнцөгт хэлбэртэй байдаг.

Зуны гал тогоог ч габионоор хийх боломжтой

Барьсан байгууламжийн байршлаас (гадаргуу эсвэл усан доорх) хамаарч габионы чулууг сонгох хэрэгтэй. Байгалийн болон хиймэл чулууг хоёуланг ашигладаг. Үүнд: чулууны хэлбэр, хэмжээ, найрлагыг харгалзан үздэг.

Хамгийн түгээмэл хэрэглэгддэг нь галт уулын гаралтай хатуу чулуулгууд юм. Үүнд: базальт, кварцит, боржин чулуу, диорит орно. Ихэвчлэн хүйтэнд тэсвэрлэлт сайтай, бат бэхтэй чулууг ашигладаг.

Гоёл чимэглэлийн зориулалтаар ашиглах габионыг өөр материалаар дүүргэж болно. Үүнд: мод, шил, хугарсан хавтан, тоосго, буталсан бетон гэх мэт.

Габионы бүтцийг угсрахад дараах материалууд шаардлагатай болно.

●     металл тор;

●     тусгай металл спираль;

●     утсан төмөр үдээс;

●     ган тээглүүр;

●     геонэхмэл материал /ус тусгаарлагч/;

●     хаалт;

●     дүүргэгч (чулуу, хайрга, дайрга, элс, хөрс, мод, шил гэх мэт )

Уян төмөр тороор ширээ, сандал хийсэн ч болно.

Угсрах ажлыг эхлүүлэхийн хэрэглэгдэх материал болон багаж хэрэгсэл бүрэн байгаа эсэхийг шалгах хэрэгтэй. Габионы хавтанг төмөр утсан үдээс эсвэл металл спираль ашиглан холбоно. Чулуугаар дүүргэсний дараа энэ нь мөн хажуугийн самбарт спиралиар бэхлэгддэж болно. Хайрцгийг  үзүүртэй  бэхэлгээний тусламжтай газарт бэхлэнэ.

Металл торыг чулуун материалаар дүүргэх нь хоёр үе шаттай явагддаг. Чулууг торон саванд өндрийнх нь хагастай тэнцэх хэмжээгээр давхарлан тавьдаг. Том хэмжээтэй чулууг нь габионы доод ба урд хананд тавьдаг. Савны дунд хэсгийг жижиг хайрга эсвэл барилгын хаягдал бетоноор  дүүргэж болно. Дүүргэсний дараа торон савны тагийг хааж, төмөр утсан спиралиар чангална.

Янз бүрийн хэлбэртэй габион нь мандлын цэцгийн ер бусын хашлага болно.

Ландшафтын дизайны мэргэжилтнүүдийн бэлэн санааг судалж үзэх, цахим орчноос тайлбар, зураг, видео бичлэг үзэж өөрсдийн хүсэл сонирхолд нийцсэн габионыг хийх нь илүү хялбар болно. Гэхдээ габионы ерөнхий загвар нь тийм ч төвөгтэй биш бөгөөд тэдгээрийг угсрах ажлыг бие даан хийж болох бөгөөд туршлагатай хүмүүсээс ч зөвлөгөө авч болох юм.

Энэ удаад энгийн бүтэцтэй төмөр торон хашлага барих алхмуудыг үзүүлж байна.

хашлага хийх газраа хэмжиж, тэмдэглэгээ тавина

Өөрсдийн эзэмшил газартаа тав тухыг бий болгож, гэр бүл, үр хүүхдүүдтэйгээ цагийг зугаатай өнгөрөөхөд орчны тохижилт чухал бөгөөд үүнд удаан эдэлгээтэй, үзэмж сайтай габионаар хашаа, хашлага, цэцгийн сав болон бусад гоёл чимэглэлийн зүйлсээ өөрсдийн хүчээр хийх боломж танд байна.