"Барилгын материалын үнийн өсөлт тулгамдаж буй асуудал" сэдвийн хүрээнд clubhouse - д ярилцлаа
Барилгын материалын үнийн өсөлт, хомстол барилгын компаниудын хувьд хүндхэн асуудал болоод байгаа энэ цаг үед салбарын мэргэжилтнүүд нэг дор цуглаж, зарим асуудал - шийдлийн талаар clubhouse-д ярилцлаа. Уг уулзалтад БХБЯ - ны ББМҮБХЗГ - ын барилгын материалын үйлдвэрлэлийн хэлтсийн дарга Д.Батзориг, Барилга МН ерөнхий захирал Г.Батсүх нар оролцогчдын асуултад хариулсан юм. Оролцогчдоос гарсан санал болон шийдлээс онцолвол,
- Дэлхийн зах зээлд барилгын түүхий эд, материалын үнэ өсөж, Монгол дахь короно вирусын тархалтаас шалтгаалан импортлогч БНХАУ- ын хил хорио хязгаарлагдаж, тээвэрлэлт хүндэрсэн. Тиймээс дотоодын тээврийн компаниудыг олон улсад явж болох талаас эрх зүйн зохицуулалт хийхийг хүсэв.
- Төмрийн хүдрийг экспортод гаргадаг ч дотооддоо хангалттай арматур үйлдвэрлэдэггүй. “Дарханы төмөрлөгийн үйлдвэр” нь хувьд гарсан учир төрөөс зохицуулалт хийхэд хүндрэлтэй байдгаас гадна энэ чиглэлээр дотоодод ажиллах хүч байдаггүй нь томоохон асуудал гэдгийг үйлдвэрлэл эрхэлдэг удирдлагууд хэлсэн байна.
- Дэлхий нийтээрээ хуванцрын /усны хоолой… гэх мэт/ хомстолд орж эхэлсэн байна. Монголд тээвэрлэлт ирэхийн тулд маш их хугацаа алдаж байгаа юм.
- Хөнгөн блокны үйлдвэрүүд хаагдахад хүрч байна. Учир нь уг материалын 80-90 хувийг бүрдүүлдэг түүхий эд болох шохойг импортоор оруулж ирдэг бөгөөд үнэ нэмэгдсэн. “Баюу” шатаахгүй байх шийдвэр гарсанаар дотоодоос түүхий эдээ авах боломжгүй болсон нь ихээхэн хүндрэлийг бий болгож байгаа юм.
- Зарим захиалагчид гэрээгээ цуцлахад хүрч байна. Тиймээс гүйцэтгэгч тал ажлаа дуусгах, хохиролгүй байх эрхзүйн зохицуулалт хэрэгтэй гэж үзэв.
- Улсын төсвөөр баригдаж байгаа барилгууд нь 2018-2019 оны төсвөөр бодогдсон байгаа тул зөрүүг хэрхэн шийдвэрлэх тал дээр шийдэл гаргахыг удирдах төвшний хүмүүсээс хүсэж байна.
- Хөөсөнцрийн 2 үйлдвэр ажиллаж байгаа бөгөөд цаашид хомстол үүсэхээр байгааг хэлэв.
- Ихэнх компаниуд гааль болон НӨАТ - өөс чөлөөлөхийг хүсэж байна. Үүнийг БХБЯ - аас Сангийн яаманд хүсэлт хүргүүлсэн ч Сангийн сайд дэмжихгүй байгаа юм.
Энэ ондоо барилгын материалын үнэ буурах төлөвгүй байгаа бөгөөд энэ нөхцөл байдал удаан үргэлжилбэл намар гэхэд дотоодын олон үйлдвэрүүд хаагдах хэмжээнд хүрэхээр байгааг үйлдвэрлэгч компаниуд илэрхийлсэн юм. Тиймээс БХБЯ, ТББ, хувийн хэвшлийн компаниудын төлөөллөөс бүрдсэн ажлын хэсгийг байгуулж, тулгамдаж байгаа асуудлуудаа дэвшүүлж, шийдлийг эрэлхийлэн, шийдвэр гаргах төвшний төрийн байгууллагууддаа хандан, хамтран ажиллаж, бодитой бөгөөд тодорхой арга замыг тодорхойлсоноор энэ нөхцөл байдлаас гарах чухал алхам болоод байна.
Барилга МН - ээс санаачлан “Барилгын материалын ханган нийлүүлэгчдийн зөвлөл” ТББ - ыг байгуулж, одоогоор 50 гаруй гишүүнтэй болоод байгаа юм. Энэхүү зөвлөлд нэгдэн хамтран саналаа гаргаж, шийдвэрлүүлэх боломж бидэнд байна.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.