Сар тутмын Барилга МН сэтгүүлийн 133 дахь дугаар хэвлэгдэн гарч эрхэм захиалагч, уншигч таны гарт очиход бэлэн боллоо. Барилга МН сэтгүүлийн дугаар бүрт тогтмол гардаг ярилцлагын булан, төрөл бүрийн судалгаа, салбарын тулгамдаж буй асуудлын хүрээн дэх нийтлэл, мэргэжилтнүүдийн зөвлөгөө, иргэдэд зориулсан булан болон амины орон сууцны төрөл бүрийн мэдээлэл, шинэ орон сууц, барилгын гол нэрийн материалын үнэ ханш нийтлэгддэг билээ. 

Энэ удаагийн дугаарын нүүр хуудсанд  “ФҮЖИ ДЕВЕЛОПМЕНТ” ХХК-ийн ХАН-УУЛ цогцолбор хотхон хамтран ажиллаа.  

Сэтгүүлд гарсан онцлох булангуудаас...

VIP ярилцлага: Монголын тулгуур хөгжил болох барилгын салбарын манлайлал, төлөөлөл болсон эрхмүүдийг энэхүү ярилцлагын буландаа урин салбарын хөгжил дэвшил хийгээд тухайн зочны үзэл бодол, амжилтын түүхийг хуваалцдаг билээ. Энэ удаагийн зочноор “Ондилт” ХХК-ийн захирал Д.Мигэддоржийг урилаа. 

Хөндөх сэдэв: Монгол улсад барилгын салбар үүсэж хөгжих үеэс эхлэн ОХУ-ын барилга барих технологи, барилгын техникийн болон эдийн засгийн норм дүрэм, тавигдах шаардлага, стандарт, арга аргачлалыг  үндэслэн дэд бүтцийн салбарын эрдэм шинжилгээний институтууд  үндэсний норм нормативтой болох ажлыг өргөн хүрээтэйгээр боловсруулсан. 

Мэдээж тухайн үед батлагдсан аргачлалын  дагуу байгалийн хүчин зүйл, тухайн ажлын онцлог, туршлага, чадавх зэрэг нөлөөллийг тооцоолж барилга угсралтын ажил бүр дээр ажиглалт судалгаа, хронометраж зураг авалт хийж нормчлол тогтоохоос гадна Монгол хүний дундаж өндөр, туршлагаас хамааран ОХУ-ын барилга угсралт, засварын ажлын хөдөлмөр зарцуулалтын жишиг нормыг 20-30% сулруулан тооцсон  төсвийн суурь нормуудыг мөрдөж ирсэн  билээ.

Тодруулга: Хил хорио хязгаарлалтаас болж нийлүүлэлт багасч, тээвэрлэлт хүндэрч, импортын нөөц бүрдүүлээгүйгээс дотоодын зах зээлд материалын хомстол үүссэн гэх мэт олон шалтгаанаас барилгын  материалын үнэ ханш тогтворгүйжиж, өссөөр байна.

Тиймээс гол нэрийн бүтээгдэхүүний дотоодын үйлдвэрлэл, нөөц ямар байгаа талаар “Монголын барилгын материал үйлдвэрлэгчдийн холбоо” ТББ - ын Гүйцэтгэх захирал МУ-ын зөвлөх инженер О.Лхагвадоржоос тодрууллаа. 

Barilga.mn:Нэг товчлуураар мянган үйлдлийг хийж буй дижитал эрин үед шилжиж, интернет хэрэглэгчид өдрөөс өдөрт өсөж, цахим бизнес эрчийг авсаар байна. Утас, зөөврийн компьютер, tablet ашиглан хаанаас хэзээ ч хүссэн үедээ холбоо тогтоож, хүссэн сурталчилгаагаа байршуулж, компаниуд бүтээгдэхүүн үйлчилгээгээ борлуулдаг боллоо.

Ялангуяа Ковид-19 цар тахлын нөлөөгөөр 10 жилд хийгдэх шилжилт, өөрчлөлт 1 жилийн дотор бий болж, хөгжлийг 10 дахин хурдасгаад байгаа бөгөөд сошиал хэрэглэгчдийн тоо 47 хувь, нийт хэрэглэгчдийн зан төлөв 52 хувиар өсч, цагийн зөрүүгүй цаг тухай бүрт нь үнэн бодит мэдээлэл түгээдэг сувгийг сонгох үйлчлүүлэгчдийн тоо 87 хувиар өссөн гэсэн судалгааг Маккензи компаниас зарласан. 

Амины орон сууц: Өмнөх дугаарт дурдсанчлан амины сууцыг барилгын үндсэн болон туслах чанарын хийц эдлэл, бусад дотор инженерийн шугам сүлжээний системээс хамааруулан төлөвлөх нь сэдвээр энэ удаагийн зөвлөмж нийтлэлээ үргэлжлүүлэн хүргэж байна.

Дуулгах сонин: Сөүл хот нь авто замд төвлөрсөн хотын ландшафтаас ард иргэдийнхээ амьдралын чанар, эко системийн ач холбогдлыг эрхэмлэдэг хэлбэрт шилжсэн өөрчлөлтийн үе шатанд иржээ. Өндөр хурдны замыг нурааж, Чонжечён голын урсгалыг олж илрүүлснээр “Чонгечоныг сэргээн босгох төсөл” хэрэгжжээ.

Энэ нь Сөүлийн төвд орших 3,6 км-ийн урттай хонгилын дагуу экологи, амралт, чөлөөт цагийн бүсийг бий болгох боломжийг бүрдүүлсэн. Уг төсөл сүүлийн хэдэн арван жилийн турш уналтад ороод байсан Сөүл хотын эдийн засгийн өсөлт, хөгжлийг сэргээх нөхцөлийг бүрдүүлсэн байна.