“Туул гол дагуу амралт, зугаалгын цогцолбор” байгуулах концепц тодорлоо
Иргэдийн амрах, зугаалах, чөлөөт цагаа ая тухтай, зөв боловсон өнгөрөөх орчин нөхцөлийг бий болгох зорилгоор “Туул гол дагуу амралт, зугаалгын цогцолбор” байгуулах үзэл баримтлал /концепц/, загвар зураг боловсруулах уралдааныг 2021 оны 04 дүгээр сарын 30-ны өдрөөс 2021 оны 05 дугаар сарын 20-ны өдөр хүртэл нийт 21 хоногийн хугацаанд зарласан бөгөөд уралдаанд зураг төслийн мэргэжлийн байгууллага, хувь уран бүтээлчид, оюутан, залуусын хамтарсан нийт 8 баг бүтээлээ ирүүлсэн. Уралдаанд ирүүлсэн бүтээлүүдийг 2021 оны 05 дугаар сарын 20-ноос 23-ны өдрийг дуустал Хот байгуулалт, хөгжлийн газрын албан ёсны цахим хуудсанд байршуулж иргэд, олон нийтээс санал авсан бөгөөд нийт 7500 иргэд санал өгч өргөн цар хүрээг хамарсан уралдаан болж өндөрлөлөө.
Уралдааны тэргүүн байранд “Riverside Paradise” баг, дэд байранд шалгарсан “Оюут ХХК” баг шалгарлаа. Тэргүүн байранд шалгарсан багийн гол үзэл санаа нь Туул голын эко системийг хамгаалах, байгалийн нөхөн сэргээлт хийж, байгалийн тогтоцыг хадгалан, бүх насны болон зорилтот бүлгийн иргэдэд зориулсан олон нийтийн амралт, зугаалгын ая тухтай орчныг бүрдүүлж гадаргийн усыг хуримтлуулан нуур, цөөрөм үүсгэн, гүний усны тэжээгдлийг нэмэгдүүлэхийг зорьжээ.
4 байршилд 196 авто машины зогсоол, 22 хөгжлийн бэрхшээлтэй иргэдийн зогсоол, 120 унадаг дугуйн зогсоолтой байхаар тооцож усан оргилуурыг IP 66-69 үзүүлэлт бүхий, газар шигтгэдэг, усны хамгаалалттай, RGB гэрэлтүүлэгтэй хослуулан гэрлийн тоглолттой буюу смарт контрол системтэй байхаар төлөвлөсөн байна. Мөн хөгжлийн бэрхшээлтэй иргэнд зориулсан орц гарцтай, ХБИ төлөвлөлтийн аль ч хэсэгт очих боломжтойгоор замыг төлөвлөн явган замыг 3 м өргөнтэй чөлөөтэй байдлаар төлөвлөжээ. Шилдгээр шалгарсан бүтээлийн концепц, үзэл санааны дагуу тохижилтын ажлын зураг, төсвийг хийх юм.
Дэлгэрэнгүй танилцуулгыг эндээс үзнэ үү.
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.