Вьетнамын төв хэсэгт орших Хюэ хотын хөл хөдөлгөөн ихтэй уулзварт байрлах “Tiam” кафе  бол 18 жилийн настай үл хөдлөх хөрөнгө юм. Ердөө 35м2 талбайтай, уг барилгыг ”Nguyen Khai Architects and Associates” компани сэргээн засварлажээ.

“Гэр бүлийн бүхий л гишүүдийн хувьд,  нэгнийхээ хэрэгцээ шаардлагын талаар ярилцаж, ойлголцдог үнэ цэнтэй, амьдралын түвшинг сайжруулсан орчин байгаасай гэж хүссэн учраас тус барилгыг бүтээсэн” хэмээн Ерөнхий архитектор Нгуен Куанг Хай ярьжээ. 

Барилгын нэгдүгээр давхарт кафе байрлах бол үлдсэн хэсэг нь амьдрах зориулалттай.  Байшингийн босоо гал тогоо болон шилэн хана нь доторх хүмүүсийг байгальд болон гудамжинд байгаа бусад хүмүүстэй ойр мэдрэмж төрүүлэх зорилго бүхий юм.  

“Ийм хязгаарлагдмал талбайн хувьд дотоод засал чимэглэлийг минимал байхаар төлөвлөж нээлттэй орон зайг бий болгох нь үр дүнтэй шийдэл юм. Гэр бүлийн гишүүдийг хооронд нь ойртуулах үүднээс функциональ бүсүүдийг бий болгож, шаардлагатай бол хувийн орон зайтай байлгах боломжийг ч мөн олгосон” гэж ерөнхий архитектор Нгуен ярьжээ. 

Хуучин спираль шатыг шулуун шатаар сольсон нь орон зайн хувьд оновчтой шийдэл болжээ. Гэрийн тавилгын хувьд байгаль орчинд ээлтэй, нөхөн сэргээгдэх материал болох хулсаар хийгдсэн нь Хьэ хотын эрс тэс уур амьсгалд нэн тохиромжтой шинж чанаруудыг агуулсан байна.

Мөн нэгдүгээр давхарт байрлах кафе нь байшингийн бусад хэсэгтэй ижил элемент, материалаар хийгджээ. Минималист хэв маягийн орон зайд урт муруй ширээ, нарийхан сандлууд байрлуулсан нь бусад өнгөт объектуудыг илүү тодруулж харагдуулах юм. 

Түүгээр ч үл барам кафейн доторх болон гаднах хүмүүс шилэн цонхоор бие биеэ харах боломжийг бүрдүүлсэн нь хүн хоорондын уур амьсгалыг илүү “амьд” болгодог аж.  

Мөн барилгын өнцөг булан бүрт өөр хоорондоо ялгаатай хэмжээ бүхий таримал цэцгүүд байрлана. Гал тогоо,  тагт, террас болон гэр дотор ургамал тарих нь тайван, таатай уур амьсгалыг бүрдүүлдэг ажээ.