“Барилга МН” барилгын салбарын удирдах ажилтнууд, мэргэжилтнүүд, салбарын олон нийтэд мэдээлэл түгээх, тэдний  хамтын ажиллагааг нь өргөжүүлэх зорилгоор цуврал вебинар хэлэлцүүлгийг тодорхой сэдвийн хүрээнд тогтмол зохион байгуулж байгаа билээ. 

Энэ удаагийн вебинарыг “Архитектур ба хот төлөвлөлт” сэдвээр 2021.05.19-ний 10 цагт онлайнаар /zoom/ зохион байгууллаа.

Хэлэлцүүлгийг нээж Барилга МН ерөнхий захирал Г.Батсүх, Хот байгуулалт, хөгжлийн газрын ерөнхий архитекторын ажлын албаны дарга А.Баттөмөр нар үг хэлсэн юм.  

Хэлэлцүүлгийн үндсэн илтгэгчээр БХТ-ийн ХАНБНСТ-ийн хэлтсийн дарга н.Одбаяр, Хот төлөвлөлт, судалгааны институтийн ерөнхий инженер н.Баясгалан, "Монголын ногоон барилгын хүрээлэн" ТББ гүйцэтгэх захирал, Барилга МН-ийн бодлогын зөвлөлийн гишүүн Б.Батжав нар доорх сэдвийн хүрээнд илтгэл тавилаа. 

• "Хүн ам нутагшилт, бүс нутгийн судалгаа, төлөвлөлт" 

• "Улаанбаатар хотын 2040 он хүртэлх хөгжлийн ерөнхий төлөвлөгөө"

• "Орчин үеийн хот төлөвлөлтөд юу нөлөөлж байна вэ?"

Хэлэлцүүлгийн оролцогч зочдоор Хот байгуулалт, хөгжлийн газрын Хот төлөвлөлтийн хэлтсийн дарга С. Даланжаргал, Хот дахин хөгжүүлэх хэлтсийн дарга М. Мэндсайхан, Ерөнхий архитекторуудын ажлын албаны дарга А. Баттөр, Газар зохион байгуулалт, геодези, зураг зүйн газар, Барилга архитектур корпорац, Хот төлөвлөлтийн хүрээлэн, МАЭ болон салбарын компаниудын удирдах албан тушаалтнууд, архитектор хот төлөвлөгч нар оролцож хэлэлцүүлэг өрнүүллээ. 

Хэлэлцүүлгээс гарсан зарим санал: 

• Үл хөдлөх хөрөнгийн хөгжүүлэлт гээчийг хуульчлах ( нам барилгын дэргэд өндөр барилга барьдаг гажуудлыг зогсоох, хотын барилга байгууламжуудын өнгө будаг ба загвар нь алаг бөмбөг шиг өөр өөр  байх нь стандартгүйг нотолж байна.) 

• Ногоон хөгжилд хүрэхийн тулд хүрэн бүхнийг хориглох учиртай. Ногоон бүхнийг урамшуулах нь дэлхийн жишиг. Энэ хуулиа яаравчлахгүйгээр хүрэн сэтгэлгээнээс салахгүй нь... 

• Төвлөрсөн дэд бүтэц гэх хүрэн  ойлголтоос салж, барууны жишгээр бага оврын бие даасан  ногоон технологиудыг ашигласнаар хөгжлийг товчилно, дундын ашиглалтын зардлаас үүрд ангижирна, өмч хувийнх тул ашиглалт эзэнтэй, оновчтой байх болно 

• Ногоон хөгжилд хүрэхэд салбарт хүний нөөц дутмаг, мэргэжлийн техникийн ажилтан бэлдэх, салбарын сургуулиудын хуучирсан хөтөлбөрийг шинэчлэх , салбарын МСҮТ-ийг харьяа яамны мэдэлд шилжүүлж, мэргэжилтэй ажиллах хүчийг тогтмол бэлтгэн нийлүүлэх ( одоо НХХЯ-д буй нь оновчгүй, салангид байгаа болно)

• БХБЯ, БХТ, ХБХГ зэрэг мэргэжлийн байгууллагууд ЕТ, судалгаа мэдээллийг сайн боловсруулж байна. Гэвч хэрэгжилтийн шатанд олон асуудал гарч үнэлгээ маш муу байгаа. Гол хүндрэлтэй асуудал нь Газрыг төлөвлөлтгүйгээр олгож байна. Жишээ нь БОАЖЯ Улаанбаатар хотын чухал бүсэд газар олгож байна. Мөн газрын даамал албан тушаалтнууд төлөвлөлтгүй газар олгож байна. Энэ газар олголтын системийг төлөвлөлт хийж байгаа газартаа нэгтгээгүй цагт хичнээн сайхан ЕТөлөвлөгөө, баримт бичиг боловсруулаад хэрэгжих шатандаа нөхөн төлбөр зэрэг хүндрэл бэрхшээл их гарч байна. Энэ тал дээр Бодлого барьж байгаа газрууд анхаарч өгнө үү.

• ЗГ-ын бүтэц орчин цагийн эрэлтэд нийцэн эрэмбэлэгдэх эрин үе. Өөрөөр хэлбэл хөгжих салбаруудыг бие даасан байдлаар төвхнүүлж, хөгжсөн гэх салбаруудаа нэгтгэж, цоо шинээр эмхлэхгүйгээр тогтвортой ногоон  хөгжлийн цогц асуудлууд НЭГЭН ДЭЭВЭР ДООР нэгдэхгүй нь...

• Хоёр яамны дунд орхигдсон асуудлууд ч элбэгшсэн байна

• Урт, дунд хугацааны төлөвлөлтүүдийг батлахаас урьд хэрэгжилт хяналтын тогтолцоогоо тодорхой болгож нэгдсэн цахим бүртгэлээр суурь датаны өөрчлөлтүүдээ тогтмол хянах боломжийг бүрдүүлж суурь үзүүлэлтүүдийн явцын өөрчлөлтүүдийг төрийн байгууллагууд нэг систем ашиглаж цахимаар хөтөлдөг болох хэрэгтэй байна.

• Улс төр болоод бусад хүчин зүйлсээс хамаарч богино хугацааны давтамжтай өөрчлөлтүүд орж, дахин боловсруулагдаж байгаа, дахин батална гэж 2025 онд орж ирэхгүй байх тийм нөхцөлийг хангаж тухайн төлөвлөлтөө эрх зүйн чадамжгүй болгох шалгуур, үзүүлэлт заалтыг тусгаж өгөх шаардлагатай харагддаг. Мөн хэрэгжилтэд хяналт, мониторинг хийх үйл явцыг төрийн байгууллагуудын процессод холбож төрийн үйл ажиллагааны өдөр тутмын процессод оруулж өгөх хэрэгтэй.

• Хөгжилд саад болсон хүрэн буюу хуучирсан норм, стандартуудыг устгах цаг үе ирсэн. Жишээлбэл, Төмөр цайран гэх хүнд элементтэй, зэвэрдэг хоолойг ундны ус дамжуулах зориулалтаар ашиглахыг зогсоох эрин зуун.. Хот даяараа зэвтэй усны зовлонд нэрвэгдээд байна. Тиймээс яаралтай хориглох ёстой.

Уг хэлэлцүүлгийг тодорхой дэд сэдвийн хүрээнд 5 цувралаар буюу 14 хоногт 1 удаа зохион байгуулах бөгөөд дараагийн буюу 3 дахь удаагийн хэлэлцүүлэг 6-р сарын 3-ны өдөр цахимаар зохион байгуулагдана.