Монгол Улсын Ерөнхий сайд Л.Оюун-Эрдэнэд Дархан-Уул аймгийн удирдлагууд аймаг орон нутгийг хөгжүүлэх, дэд бүтэц сайжруулах, хүн амын төвлөрөлийг сааруулах, хот төлөвлөлтөө төгөлдөржүүлэхээр шинээр боловсруулж баталсан ерөнхий төлөвлөгөө танилцууллаа.

Одоогоор 109 мянган хүн амтай Дархан сум 2030 он гэхэд оршин суугчдынхаа 80%-ийг орон сууцжуулж, 2035 он гэхэд гэр хороололгүй хот болж, үүнийг даган хүн амын тоогоо 300 мянгад хүргэхээр тооцоолжээ. 

Энэ хүрээнд Дархан сумын 13,14,15 дугаар хорооны нутаг дэвсгэрийн 11 мянга гаруй га талбайг хамарсан шинэ суурьшлын бүсийн төлөвлөлтөд Залуус хотхон, IT парк, Их дээд сургуулиудын кампус, музей, номын сангийн цогцолбор, спорт танхим, задгай талбай, аялал жуулчлалын гудамж байгуулахаар тооцоолсон байна. Тус төслийг хэрэгжүүлэхэд төрөөс дэмжлэг шаардлагатайг хэллээ. 

Ерөнхий төлөвлөгөөний дагуу 2035 он хүртэл хугацаанд 100 мянган айлын орон сууц барихаар тусгасан бөгөөд Дархан-Уул аймгийн төвийн Дархан сумын 15-р багийн 2,524 өрхийн 8,500 гаруй иргэнийг орон сууцжуулах аж. 

Дархан сумын дэд бүтцийн сүлжээг өргөтгөх, суурьшлын бүс байгуулахад эхний ээлжинд дэд бүтцийг байгуулахад нийт 50 тэрбум төгрөгийн хөрөнгө оруулалт хэрэгтэй. Дараагийн шатны бүтээн байгуулалт, барилгажилтыг хувийн хэвшил, ААН байгууллагын оролцоотойгоор хийх аж. 

Ерөнхий төлөвлөгөөтэй танилцсаны дараа Засгийн газраас дэмжлэг үзүүлж, ирэх оны төсөвт дэд бүтцийн бүтээн байгуулалтад шаардагдах 50 тэрбум төгрөгийг улсын төсөвт тусгуулж, шийдвэрлүүлэхээ Ерөнхий сайд мэдэгдлээ. Энэ нь Монгол улсын Засгийн газрын үндсэн дөрвөн зорилтын нэг төвлөрөлийг сааруулах бодлогод нийцэж буйг онцлов. 

Дархан сумыг хөгжүүлэх ерөнхий төлөвлөгөөний хүрээнд баригдах нэг дэд төсөл болох “Залуус хороолол” нь нийт 11.6 га талбайг хамрах бөгөөд урьдчилсан байдлаар 9 давхар 18 орон сууцны барилга, 150 ортой цэцэрлэгийн барилгыг 2 байршилд, 480 суудалтай сургуулийн барилга, хатуу хучилттай авто зам 2.1 км, 700 авто машины зогсоол, Ногоон байгууламж 1.6 га талбайд үйлчилгээний барилга байхаар тооцсон гэлээ.