Зуны дэлгэр цагт гэр бүлээрээ амарч, стресс ядаргаагаа тайлан, үр хүүхдүүдээ тоглуулж, спортоор хичээллэж цагийг үр дүнтэй өнгөрөөхийн тулд өөрсдийн эзэмшил газартаа хүүхдүүдээ тоглуулах тоглоомын болон биеийн тамирын талбай төлөвлөхөд талбайн хучилтын асуудал тулгарна. Биеийн тамирын болон тоглоомын талбайд уян хатан биш хатуу чанарын бетон, асфальтыг ашиглах нь тохиромжгүй бөгөөд эдгээр хучилт нь цохилт шингээх чадвар муутай ба энэ нь гадаргуугийн цохилтыг хэр их зөөлрүүлж болохыг харуулсан үзүүлэлт юм. Хүүхдүүд их хөдөлгөөнтэй байдаг тул тэдний аюулгүй байдлыг хангах, доргилтоос сэргийлэхийн  тулд түгээмэл хэрэглэгдэж байгаа хучилт бол резинэн хучилт юм. Резинэн хучилтыг хүүхдийн тоглоомын талбай, сагсан бөмбөг, газрын теннисний талбай, амралтын газар, цэцэрлэгийн талбай зэрэг олон газарт хэрэглэж болох давуу талтай. Уг хучилт нь зөөлөн хөнгөн, хагарахгүй, хугарахгүй, хөлдөхгүй, дуу чимээ, цохилтыг шингээж багасгана, тусгаарлана, элэгдэл бага, шүдэнзний галд тэсвэртэй. Мөн чийгшил, температур, гаднын нөлөөнд тэсвэртэй тул эдэлгээ сайтай байдаг. Амины орон сууцныхаа гадна талбайд өөрсдийн хүчээр резинэн хучилтыг хийх боломжтой. 

Резинэн хавтангийн үндсэн түүхий эд нь синтетик каучук ба дахин боловсруулсан материал болох хуучин дугуйны резиныг буталж дахин боловсруулалтад оруулж хийдэг. Төрөл бүрийн өнгө оруулах боломжтой ба үүнд өнгөт будаг пигментийг ашиглана. Хавтанг наахдаа полиуретан цавууг холбогч байдлаар ашигладаг ба энэ нь хоргүй байдаг. Резинэн хучилтын бүх түүхий эдүүд нь зохиомол материал байдаг. 

Дахин боловсруулсан дугуйны резинийг аюулгүй гэж хэлэх боломжгүй юм. Түүнээс өвөрмөц үнэр гардаг. Температур өсөх тусам ялангуяа зуны улиралд энэ үнэр нь нэмэгддэг сул талтай. Харин EPDM синтетик каучукаар хийсэн резинэн хучилт үнэхээр хоргүй бөгөөд өндөр температурт ч үнэр ялгаруулдаггүй. Энэ нь гэмтэлгүйгээр 150°C хүртэл халаахад ямар нэгэн гэмтэл гарахгүй боловч ийм материал илүү үнэтэй байдаг. Гэхдээ тоглоомын талбайн хор хөнөөлгүй байдал нь чухал бөгөөд мөнгөө хэмнэхгүй байх нь дээр. Хэрэв та эзэмшлийнхээ талбайн резинэн хучилтыг үзэмжтэй, аюулгүй байлгахыг хүсвэл дахин боловсруулсан материал биш харин 100% EPDM үйрмэг болох материалыг сонгох  хэрэгтэй.

Резинэн хучилт  нь гурван төрөл байдаг: 

1. Ширхэгийн резинэн хавтан

2. Хуйлмал резин хавтан

3. Үйрмэг  резин

Ширхэгийн резинэн хавтан: Резин хавтангийн ирмэг шулуун буюу ховилтой /ховилоороо түгжигддэг/ шахмал хэлбэрээр үйлдвэрлэгддэг. Удаан эдэлгээ, найдвартай талаас нь харахад ховилтой резин хавтангууд илүү байдаг ба ямар ч резин хавтанг явган замын хашлагаар хүрээлж өгөх учраас тэгш хавтанг тавихад хялбар байдаг. 

Резин хавтангийн чанарт сайн анхаарах хэрэгтэй. 35 мм ба түүнээс дээш зузаантай хавтанд  уян хатан чанар заавал байх ёстой ба нүүрэн талд ямар нэгэн хагарал, гологдол байх ёсгүй, бат бэх, механик үйлчлэлд тэсвэртэй байх ёстой. Өнгөт хавтангууд олон үетэй байдаг ба доод тал нь сул хар үйрмэг, дээд тал нь шахалт сайтай өнгөт давхарга байдаг.

1. Ширхэгийн резинэн хавтанг суулгах: 

Хөрс хуулах: Хөрс хуулалтын ажилд 20-30 см гүнтэй газар ухах шаардлагатай. Эхлээд ургамлын давхаргыг, дараа нь хөрсний нимгэн давхаргыг хуулна. Үндсэн хучилтаа тавихаас өмнө ус зайлуулах суваг, налууг хийж өгөх шаардлагатай.

Талбайг тэгшлэх: Резинэн хавтанг маш тэгш гадаргуу дээр тавина. Энэ нь бетон, хуурай шавардлага, асфальт ч байж болно. Нягтруулсан хайрган дээр тавих технологи байдаг бөгөөд дээр нь элсний давхарга тавьж тэгшлэнэ. 0-5 хайрга асгаж талбайг 10см зузаантай нягтруулан тэгшилгээ хийнэ. Шигшсэн элсээр 5см зузаантай элсэн дэвсгэр тавьж өгнө. Резинэн хавтанг суулгахад хэрэглэгдэх багаж хэрэгсэлд багс, өнхрүүш, резинэн алх, цаасны хутга зэрэг орно.

Резинэн хавтанг суулгах: Резинэн хавтанг нягтруулсан элсэн дээр суулгах технологи нь явган замын хавтан тавих дараалалтай төстэй бөгөөд элсийг тэгшлээд, хавтанг тавьж, резинэн алхаар цохиж суулгана. Хучилтыг илүү тогтвортой, хөдөлгөөнгүй  байлгахын тулд хавтангийн эгнээний захад цементэн зуурмаг хийвэл сайн. Резинэн хавтанг нэгэн цул хучилт болгох боломжийг олгодог технологи бий. Үүний тулд хавтангийн захад полиуретан цавуу түрхэж, өмнө нь тавьсан эгнээтэй нягт холбож наана. 

Хэрэв суурь нь бетон, асфальт бол хавтанг полиуретан цавуугаар наах нь тохиромжтой. Эхлээд бетон гадаргууг цэвэрлэж, хатаагаад хөрсжүүлэг- праймер түрхэнэ. (60% цавуу + 40% шингэлэгч) Праймерыг хатах эсвэл шингэхийг хүлээх шаардлагагүй тул ажиллахад хялбар болгохын тулд бага талбайд түрхэж болно. 1м2-т хучилтад 1-2 кг цавуу орох ба резинэн хавтангийнхаа гадаргууд цавуугаа түрхэж суурин дээр сайн дарж наана.  Цавуугаа түрхэхдээ хавтангийнхаа өнгөн талд хүргэхгүй байхад анхаараарай. Эгнээний тэгш байдлыг хангахын тулд резинэн алхаар тогшиж эхний тавьсан хавтангийн ирмэгтэй тааруулж тэгш байдлыг шалгана. Хавтанг эгнээгээр наах ба эхний эгнээг нааж дууссаны дараа ам дарж дараагийн эгнээг нааж захад нь зүсвэр оруулна. Өндөр чанартай наалдуулахын тулд 1-2 квадрат метр талбайд хүнд (дор хаяж 20 кг) өнхрүүлгэн булаар өнхрүүлбэл сайн. Резинэн хавтанд зориулалтын цавууг жигд сайн, ялангуяа ирмэгээр нь сайн түрхэж наах нь чухал бөгөөд ашиглалтын үед хуурч салахгүй байх ёстой.

2. Үйрмэг резин ба асгаасан байдлаар хучих

Резин хучилтын өөр нэг төрөл бол полиуретан цавуутай хольсон резиний үйрмэгээр хийсэн бүрхүүл юм. Үйрмэг резин нь хоёр төрөл байдаг. 

1. Дахин боловсруулсан резин. Үүнд хуучин дугуйны буталсан резинийг ашиглах ба хар өнгөтэй, хямдхан байдаг. Энэ үйрмэгийг ашиглахдаа эхлээд заавал шигших хэрэгтэй байдаг.

2. EPDM синтетик резинээр хийсэн үйрмэг. Энэ нь үйлдвэрт боловсруулсан бөгөөд хор нөлөөгүй, ашиглахад хялбар байдаг. Өнгө оруулагч пигмент хольж төрөл бүрийн өнгө гаргана. 

Асгаасан хучилтыг хийхэд тусгай технологи байдаггүй. Суурь нь нягтруулсан нарийн хайрга, элс ч байж болно. Бетон ба асфальтан суурь бүр тохиромжтой. Суурийг маш тэгш байхыг шаардахгүй ба хэрэв жигд бус байвал үйрмэг резин их орно. Бетон гадаргуу дээр шингэлэгчээр шингэлсэн полиуретан цавуугаа /праймер/ түрхэнэ. Праймераа их талбайд түрхвэл дээгүүр нь явж ажиллахад хэцүү байдаг тул наах хэмжээгээрээ түрхэнэ. 

Үйрмэгийг цавуутай саванд хольж (хувийг үйлдвэрлэгч зааж өгдөг), бэлэн наалдамхай үйрмэгийг суурин дээр тарааж, том хусуур эсвэл шпателиэр тэгшилнэ. Найрлага нь хусуур дээр наалдахаас сэргийлэхийн тулд ургамал, амьтны гаралтай биш аэрозолийн тос эсвэл бусад силикон тосоор шүршиж болно.

Үйрмэг резинэн хучилтын хамгийн бага зузаан нь 1 см байдаг ба хэт нимгэн хийвэл хучилт  шаардлага хангахгүй талтай. Цавуу уян хатан чанараа 30-40 минутын турш хадгалдаг тул хэт их хэмжээгээр асгаж хийж болохгүй. Хэсэг, хэсгээр асгаж хийсний дараа индүү болон хүнд өнхрүүлгээр нягтруулах нь зүйтэй. 

3. Хуйлмал резинэн хавтанг суулгах

Хуйлмал резин нь нэгэн төрлийн, нэг давхарга шахалтад оруулсан үйрмэг резинээс бүтнэ. Үйлдвэрлэгчээс хамаарч янз бүрийн хэмжээтэй байж болно 

-зузаан нь 8 мм-ээс 40 мм; 

- өргөн 60 см-ээс 122 см хүртэл; 

- урт 10 метрээс, гэхдээ зузаанаас хамаарна.

Хуйлмал резинэн хучилтыг дээр дурдсан ширхэгийн резинэн хавтан наахтай бараг ижил технологиор суулгана. Гэхдээ хуйлмал хавтанд цавууг түрхэх шаардлагагүй, харин суурин дээр нь түрхээд, тэр талбайн дээр хуйлмал материалаа наана. Агаар нэвтрүүлэхгүй байхын тулд сайтар дарж наах ёстой. Хэрэв та бүх өргөнөөр нь нэгэн зэрэг дарвал наахад хялбар болно.

Сайн чанарын резинэн хучилтыг эзэмшил талбайнхаа тоглоомын болон биеийн тамирын талбайд өөрсдийн хүчээр хийх нь тийм ч хэцүү ажил биш бөгөөд материалаа зөв сонгож, мэргэжлийн хүмүүсээс зөвлөгөө авч, цахим орчинг ашиглан резинэн хучилт хийж байгаа видео бичлэг, тайлбарыг үзэж хийснээр тав тухтай, аюулгүй орчинг бүрдүүлж чөлөөт цагаа үр дүнтэй өнгөрөөх боломжтой. 

Тоглоомын талбайн резинэн хавтан хэрэгтэй бол "Барилгачин групп" - ийн www.barilgachin.mn сайт, 7711-1177 утаснаас дэлгэрэнгүй мэдээлэл аваарай.

Бэлтгэсэн: www.barilgachin.mn