“Дубай Экспо-2021”-д архитектурын Aedas компани Дубайд хэрэгжүүлж буй хамгийн сүүлийн үеийн инноваци, тогтвортой байдалд чиглэсэн ENOC /Service Station of the Future/ үйлчилгээний газрын төслийн талаар танилцуулав.

Уг үйлчилгээний газар нь АНУ-ын Ногоон барилгын зөвлөлөөс олон улсад хүлээн зөвшөөрөгдсөн ногоон барилгын гэрчилгээжүүлэх систем болох LEED platinum гэрчилгээг авсан. Эрчим хүчний хэмнэлт, усны үр ашигтай зарцуулалт, CO2 ялгаруулалт гэх мэт хэмжүүр дээр үндэслэн ENOC нь 93 оноо авч ногоон барилгын шаардлага хангасан бөгөөд LEED платинум гэрчилгээ авсан дэлхийн анхны үйлчилгээний газар болжээ.

Уг байгууламжийг биомимикри /нөхөн сэргээгдэх, байгалийн гаралтай материал/, параметрийн загварчлал /цаг хугацааг хэмнэж, компьютерийн дизайны (CAD) програм хангамжийн дизайны хэрэгсэл/ - ыг хослуулан бүтээсэн байна.

Төслийн санааг тус улсын түүхэн уламжлал болж ирсэн Гаф модноос авчээ. 133 давхарга бүхий халхавчийг 43,000м2 carbon fibre буюу нүүрстөрөгчийн атомын утсаар хийсэн бөгөөд энэ нь гангаас 3 дахин бат бөх, 5 дахин хөнгөн материал болсон байна. Хүрээ нь навч мэт хэлбэртэй. Энэ нь 100 хувь нарны хэт ягаан туяа болон зэврэлтээс хамгаалах чадвартай. Мөн 3800 гаруй LED гэрлийн модулиар гэрэлтүүлжээ.

Хавтангийн тулгуур болох мод хэлбэртэй баганыг 22 500м2 нүүрстөрөгчийн утсаар бүтээсэн байна. Түүнчлэн энэхүү үйчилгээний төвийн цахилгааныг өөрийн эх үүсвэрээр шийдвэрлэхийн тулд жилд 143 МВт.ц нарны эрчим хүч үйлдвэрлэх 283 нарны хавтан /PV/, жилд 12.7 МВт.ц салхины эрчим хүч үйлдвэрлэх хүчин чадалтай 25 метрийн салхин сэнс байгуулсан байна.