Хөл хорионы энэ үед та гэрээсээ ажиллаж байна уу. Тэгвэл танд гэрээсээ тухтай, бүтээмжтэй ажиллахад хэрэгтэй санаануудыг хүргэж байна. 

Байршлаа зөв сонгоорой- Та өдөрт олон цагийг гэрээсээ ажиллаж өнгөрүүлж байгаа биз дээ. Магадгүй та зочны өрөөнийхөө аль нэг буланд жижиг ширээ сандал дээр ажлаа хийж байна уу? Хэрэв та тухтай орчинд хэн ч танд саад болохгүйгээр, нам гүм орчинд  үр бүтээмжтэй ажиллахыг хүсч байвал аль нэг өрөөгөө тохижуулах эсвэл өөрийн суудаг буланг гэр-оффис болгон тохижуулах нь чухал юм. Гэр-оффис тохижуулахдаа өөрт саад болохгүй байхаар, гадаах орчин, гэрлэн дохионы чимээг мөн бодолцож үзэхээ санаарай. 

Тавилгын сонголтоо зөв хийгээрэй- Таны ажлын ширээ, тавиур зэрэг тавилгууд хэрэгцээ, шаардлагад тань нийцэж байх ёстой. Шинээр тавилга худалдаж авахдаа юуны өмнө зориулалтыг нь анхаарч танай гэрийн бусад хэсэгт ч тохирох үгүйг нь бодолцсоны үндсэн дээр шийдэх хэрэгтэй. Харин өнгө үзэмж бол хоёрдугаар асуудал. Гэр-оффист “сүнсгүй-тавилга” байх биш таны ажлын хэрэгцээ болон гэрийн тань бүхий л хэсэгт тохирох ёстой. Тухайлбал танайх уламжлалт маягийн чимэглэлүүдтэй бол ажлын сандлын сонголт тань зөөлөн тухтай модон сандал байж яагаад болохгүй гэж. 

“Гоё” сандлаас мөнгө бүү харамла- Та гэрээсээ эсвэл оффист ажиллахдаа  сандал дээр л ихэнх цагийг өнгөрөөдөг шүү дээ. Тэгвэл суухад тав тухтай, зөв бүтэцтэй болоод өнгө үзэмжтэй сандал худалдан авах нь илүү сайн ажиллах урам зориг өгч болох юм шүү.

Ханаа өөрийн дуртай өнгөөрөө буд- Оффисын цагаан аль эсвэл бүүдгэр  ханыг март. Танд ажлаа урам зоригтойгоор хийхэд дуртай өнгө чинь туслах болно. Зарим хүмүүсийн хувьд улбар шар эсвэл ногоон гэх мэт гэгээлэг, цоглог өнгө таалагддаг. Харин зарим нь бүдэг ногоон эсвэл далайн давалгааны цэнхэр өнгийг илүүд үздэг. Тэгвэл та аль өнгөөр ханаа будвал танд илүү ажиллах эрч хүч оруулахуйц байхыг өөрийн хүслээр сонгоорой.

Ажлынхаа дундуур харах сонирхолтой зүйлтэй болоорой - Та өдөржин ажиллахын хажуугаар амсхийх үедээ хоосон хана бус ямар нэг сонирхолтой зураг харж болно шүү дээ. Цонхоороо гадаах орчныг харах үгүй бол сандлаа хаалга руу харуулж байрлуулж болох юм. Гэхдээ таны ажлын ширээ цонхгүй өрөөнд байвал ханандаа зураг өлгөх ч юмуу эсвэл ширээн дээрээ “хөөрхөн” зураг тавиад үзээрэй. 

Жижиг чимэглэлүүд сонгоорой- Гэр-оффистоо орчин үеийн, хөөрхөн харандааны сав, наалддаг цаас, эсвэл ширээний хогийн сав зэрэг тохилог мэдрэмж төрүүлэх  нэмэлтүүдийг сонгоорой. Харин ханандаа сонгодог зургаас илүүтэй хүүхдүүдийнхээ зурсан зургийг өлгөх нь оффисыг тань илүү орчин үеийн харагдуулж болох юм.

Ширээгээ эмх цэгцтэй байлгаарай- Оффисын тоног төхөөрөмж болох компьютер, хэвлэх машин зэргийг заавал ширээн дээр байрлуулах шаардлагатай. Харин цаас, бичиг баримт зэргийг ширээгээр хөглөрүүлэхгүйн тулд хананд тогтоодог тавиур, ширээн дээр босоо хавтас ашиглаж, чухал баримт бичгүүдийг гар хүрэх газарт эмх цэгцтэй байрлуулах нь зүйтэй. Та маш их цаасан дунд ажилладаг бол эдгээрийг ангилж, зүй зохистой байрлалд оруулах шургуулгатай ширээ аль эсвэл сагс сонгоорой. 

Мэдээж та компьютер, хэвлэх машин, суурин утас зэргийг чимэглэж чадахгүй ч эдгээрийн үзэмжгүй утаснуудыг ил харагдуулахгүйгээр “нууж” чадна. Төхөөрөмжөө байнгын залгуурт залгаж салгах шаардлагатай бол ханын залгууртай ойрхон байхад анхаараарай. 

Гэрлийг зөв сонгоорой- Таны гэр-оффисын гэрэл толгой өвтгөх, нүд ядраахаар хурц тод байж болохгүйг санаарай. Компьютерийн дэлгэцийг цонхны гэрлээс хурц тусахгүй байхаар байрлуулж, гэрэлтүүлгийн зориулалтаар жижиг ширээний гэрэл ашиглаж болно.