Дэлхий даяар ихэнх төслүүд цар тахлын улмаас зогсонги байдалд ороод байгаа ч ирэх жилүүдэд биднийг шинэ, гайхалтай уран барилгын төслүүд хүлээж байна.

Орчин үеийн, дэлхийн шилдэгт тооцогдох эдгээр барилга байгууламжууд  олон жилийн өмнөөс  зураг төсөл нь хийгдсэн бөгөөд тус бүтээн байгуулалтуудад цар тахал тийм ч их нөлөө үзүүлсэнгүй. 

CNN Style-ын зүгээс та бүхэнд музей, урлагийн тоглолт зохион байгуулах зориулалт бүхий барилга байгууллагууд зэрэг 2021 онд нээлтээ хийх барилгын төслүүдийг танилцуулж байна. 

Нью-Йорк хотын Far Rockaway номын сан

Энэ олон нийтийн номын сан нь  Фар Рокавэйд /Нью-Йорк хотын Куинс дүүргийн Рокавей хойгийн зүүн хэсэг/ байрлах бөгөөд 1858 мкв талбай бүхий, жижиг боловч алдартай газар  юм. 

Гурвалжин шилэн хийц бүхий тус барилгын хувьд орж ирэх гэрлийн хэмжээ нь үлэмж их ба номын сангийн алтлаг өнгөнд тэнгэрийн тусгал үзэсгэлэнтэй харагдах юм. Төслийн архитектурыг Норвеги улсын Snøhetta компани хийжээ. Уг  компани Европийн анхны газар доорх рестораны зураг төслийг хийж байгуулж байсан туршлагатай газар юм.

Тайпэйн урлагийн төв

Тайпэй хотын урлагийн төв нь найман жилийн дараа ийнхүү эхэлж энэ жил нээлтээ хийхээр болжээ. Энэ барилга нь 5.4 тэрбум тайвань долларын өртгөөр бүтсэн байна. Барилгын нэг тал  дэлхийн бөмбөрцөг хэлбэртэй байгаа нь БНХАУ-ын Тайванийн нийслэлд хүмүүсийн анхаарлыг  татах томоохон хүчин зүйл болжээ. Архитектурын OMA компанийн зүгээс энд гурван бие даасан театр байх талаар мэдээлжээ. 

Эквадор улсын нийслэл Кито хотод байрлах Aquarela

Архитектурын салбарын Нобел гэгддэг Прицкерын шагналыг хүртсэн Францын архитектор Жан Нювел уг барилгыг бүтээжээ. Aquarela нь 650 айлын орон сууцны хороолол юм. Хэдийгээр энд хэд хэдэн тусдаа есөн давхар барилгууд байх боловч урт тагтнууд тэдгээрийг хооронд нь холбосноор барилгын бүтээн байгуулалтыг нүсэр том болгож харагдуулах ажээ. Чулуун өнгөлгөө, цонхны модон хаалт болон гаднах ногоон хийц нь байгууламжид бүс нутгийн зэрлэг, уулархаг газрын хэв маягийг шингээхийн зэрэгцээ оршин суугчдад байгальтай ойр мэдрэмжийг төрүүлэхэд нөлөөлөх юм. 

Барилгын ажил хоёр үе шаттай явагдах ба 2022 онд дуусах төлөвтэй байгаа юм.

Дани улсын Hotel Green Solution House

Дани улс дэлхийд анхны “нүүрстөрөгч ялгаруулдаг” зочид буудлыг байгуулахаар болжээ. Тус Hotel Green Solution House зочид буудал нь Балтийн тэнгис дэх Данийн Борнгольм арлын хамгийн том хот болох Роннед баригдах юм. Барилгын хийцийн тухайд тэр чигтээ барилга болон тавилга үйлдвэрлэлийн явцад гарсан хаягдлыг дахин ашиглажээ. Өөрөөр хэлбэл модны үлдэгдэл, боржин чулууны хэлтэрхийг дулаалгын болон гоёл чимэглэлийн зориулалтаар ашигласан байна. 

Уг бүтээн байгуулалтыг архитектурын 3XN болон GXN гэсэн хоёр компани хариуцан ажиллаж буй. Ирээдүйд зочид буудлын ашиглалтын хугацаа дууссан ч дахин ашиглах боломжтой нь бусдаас ялгарах гол онцлог нь болжээ.