Монголд интерьер дизайнер мэргэжил эзэмшин төгсөөд, АНУ-д тус мэргэжлээрээ “555 international Design firm”-д ахлах дизайнераар ажиллаж буй Д.Майдаржавын “FRANCOIS FRANKIE REVOLVING BAR” төслийг танилцуулж байна.

Төслийн нэр: FRANCOIS FRANKIE REVOLVING BAR

Төслийн тайлбар

Захиалагчидтайгаа шинэ рестораны санаан дээр ярилцаж, энэхүү санаагаар нь рестораны гол бүтээгдэхүүн Франц/Америк хоолны онцлогийг харуулсан интерьер хийхээр тохирч, судалсны үндсэн дээр CAROUSEL /морин тойруулга/ концепц нь маш олон талаар тэдний хүсэж байсан нөхцөлд тохирсон учраас захиалагчид нь дуртай хүлээн авч ажлаа эхлүүлж байжээ.

Байршил: АНУ, Иллинойс муж, Чикаго хот

Төсөл үргэлжилсэн хугацаа: 2019.01 сар  - 2020. 2 caр

Концепц: Чикаго хот бол маш олон төрлийн сонирхолтой ресторануудаар алдартай учир бүгд өөрсдийн гэсэн онцлогоороо ялгардаг.

Лого: Логон дээрх Frankie-н дүр нь Америкийн хуучны үлгэрүүдийн адал явдалд оролцож байгаа байдлаар рестораны бүхий л хэсэгт маш сонирхолтой байдлаар харуулсан нь үйлчлүүлэгч гарт ярианы сэдэв болж, аливаа яриаг эхлүүлэхэд таатай боломжийг бүрдүүлж чадсан.

Түүнчлэн 360 градус эргэлддэг bar нь АНУ-д нээгдсэн анхны бүтэн эргэлддэг Carousel bar гэдгээрээ онцлогтой бөгөөд энэ нь үйлчлүүлэгчдийн сонирхлыг ихээр татах болсон.

Төлөвлөлт: BAR болон DINING гэсэн хэсгүүдээс бүрдэж мөн зуны цагт гадаа walking cafe байдлаар үйл ажиллагаагаа явуулдаг.

Материалын сонголт: Материал дээр их ач холбогдож өгсөн бөгөөд тавилгууд нь зөвхөн энэ ресторанд зориулж хийгдсэнээрээ ялгардаг.

Гэрэлтүүлэг: Балансыг нь 2700K дээр барьж, маш өндөр таазтай тул гэрлийн баганын тархалтыг сайтар тааруулж хийсэн. Ингэснээр гэрэл жигд тархаж рестораны аль ч хэсэгт яг ижил гэрэлтэй байх боломжийг олгосон.

Francois Frankie ресторан одоо аль хэдийн Чикаго хотын заавал очиж үзэх газрын нэг болж мөн хүмүүсийн очих дуртай газар болсон байна.

“555 international Design firm”-д ахлах дизайнераар ажиллаж буй Д.Майдаржав   

Мэргэжлээрээ хэдэн жил ажиллаж байна? АНУ-д ажиллах ажлын гараагаа хэрхэн тавьж байв?

Оюутан байхаасаа эхлэн ажиллаад одоо 15 жил болж байна. АНУ-д сүүлийн 6 жил мэргэжлээрээ ажиллаж, амьдарч байна. Эндхийн интерьерийн хөгжил, үзэл санаа нь миний урд нь хийж байсан Ази-Европ хэв маягаас огт өөр байсан нь эхэндээ дасан зохицох болон зах зээлийнхээ сэтгэлзүй, соёл, хандлагыг ойлгоход нэлээд судалгаа шаардсан. Товчоор хэлбэл соёлын ялгаа гэсэн үг л дээ.

Анхны ажлын гараагаа нэгэн жижиг Архитектурын компаниас дадлагажигчаас эхлээд яваандаа Америкийн телевизийн Интерьер дизайны шоу дээр ажилласан. Тэр шоу тухайн үед маш их үзэгчтэй нэвтрүүлгүүдийн нэг болж чадсан.

Түүний дараа  COMMERCIAL-HOSPITALITY-RETAIL  гэсэн чиглэл рүү татагдан, одоо энэ чиглэлээр төрөлжин ажиллаж байна.

АНУ-н интерьерийн зах зээл нь жилдээ ойролцоогоор 40-өөд тэрбум доллар тогтмол эргэлддэг гээд бодоод үзэхээр интерьерийн хөгжлөөрөө томоохон улсуудын тоонд орох байх.

Мэргэжлээрээ ажилласан 15 жилийн хугацаанд хийгдсэн бүтээлүүдээсээ дурдвал?

Энэ хугацаанд чамгүй олон төрлийн төслүүд дээр ажиллаж, туршлага хуримтлуулж чадсан. Үүнээс 60 гаруй айлын интерьер дизайн, том, жижиг нийлсэн 40-өөд ресторан, зочид буудал болон банкны интерьер дизайн мөн 10-д стадионы интерьер зураг төсөл, дизайн дээр ажиллажээ.

АНУ-д интерьерийн чиг хандлага хэрхэн хувьсан өөрчлөгдөж байна? Интерьерийн хөгжлийн талаарх таны бодол?

Миний ажиллаж байгаа салбар улам л хэрэглэгчтэй ойр байх болон тэдэнд өөриймсөг сэтгэгдэл үлдээж, үйлчлүүлэгч байгууллага хоорондын зайг ойртуулах алхмууд хийгдэж байна. Тэрхүү оролдлогууд нь мэдээж шинэ шийдэл, концепцыг шаардаж улам нарийн хөгжихөд нөлөөлж байна. Яг энэ зүйл трэнд болж байна гэхээс илүүтэй материалын хөгжил чиг хандлага илүү органик, байгальд ээлтэйгээр хөгжиж  байгаа юм. Жишээ нь гадил жимсний хальснаас VEGAN SILK гарган авч хэрэглэх гэх мэт.

Интерьер дизайны хөгжил шууд утгаараа тухайн улсынхаа эдийн засаг нийгмийн хөгжилтэй харилцан уялдаж хөгждөг салбар. Тэгэхээр эдийн засгаараа тэргүүлж байгаа улсуудын интерьерийн салбар нь түүнийгээ дагаж хөгжих хандлагатай байдаг.

Интерьерийн олон чиг урсгал байдаг. Тэдгээрийн ялгаа нь юу вэ? Та аль чиглэлээр дагнан ажилладаг вэ?

Интерьер дизайн нь ерөнхийдөө зах зээлийнхээ хүрээнд үндсэн 2 том чиглэлд хуваагдах бөгөөд тэдгээрийг Residential болон Commercial гэж үзнэ. Эдгээр нь дотроо бас чиглэл болон зориулалтаараа салбарлаад хэдэн зуун чиглэлтэй болдог.

Дизайны стилийн хувьд ч мөн ялгаагүй fashion design салбартай ижил хэдэн жилийн давтамжаар эргэж трэнд болж мөн баяжигдан явдаг. Миний хувьд COMMERCIAL гэсэн салбартаа хамрагдах дизайны төслүүд дээр ажилладаг.

Хамгийн сүүлд ямар бүтээл дээр ажиллав?

Сүүлд хэд хэдэн төсөл дээр давхар ажиллаа. Тухайлбал 2028 oны ЛОС АНЖЕЛОС-н зуны олимпын нээлт болон хаалтыг хийх цоо шинэхэн стадион “SOFI”-н интерьер дизайн. Rapper KANYE WEST-н  WORKSHOP төслийнх нь дизайн болон Micheal Jordan-n  “Jordan Steakhouse” гээд хэд хэдэн томоохон төслүүд дээр ажиллах завшаан тохиож тэдгээр төслүүд дээр ажиллаа. Одоо эхнээсээ нээлтээ хийгээд явж байна.

Интерьер дизайнерууд юун дээр анхааран ажиллах шаардлагатай байдаг вэ?

Миний бодлоор судалгаа, концепц болон тэдгээрээс гарах үр дүнг сайтар тооцох нь чухал. Том зургаар нь харж захиалагчдаа тусалж чиглүүлэх нь хамгийн үр дүнтэй байдаг. Интерьер дизайн бол зарим хүмүүсийн ойлгодог тухайн орчныг “цэвэрхэн засах” асуудал огтоос биш. Давхар өөртөө тавилга, материал, гэрэл туслан гүйцэтгэгч гэх мэт нэлээд олон салбарт шууд болон шууд бусаар нөлөөлж тэдгээрийг нэгтгэдэг маш том салбар.

Миний хувьд ямар ч амьгүй орчинд уялдаа холбоо энерги үүсгэж тэр нь захиалагчид болон хэрэглэгчдийн сэтгэлд хүрч түүнийг нь дагаад тухайн бизнес амжилттай байхыг нь харах, мэдрэх нь хамгийн сайхан.