Украйны “Bezmirno Architects” компанийн Roof Garden /Дээврийн цэцэрлэг/ төслийг танилцуулж байна. Энэхүү төсөл нь гэрийн дотор, гадна тохижилт болон зочны өрөө, унтлагын өрөөний төгс зохилдолгоог бий болгохыг эрмэлзжээ. Уг орон сууц 320 метр квадрат талбайтай ба хоёр хэсгээс бүрдэнэ.  Эхний хэсэгт гал тогоо, зочны өрөө бий. Дараагийн хэсэг унтах, амрах хувийн талбайтай бөгөөд энд унтлагын өрөө, хүүхдийн 2 өрөө ба угаалгын өрөө тусдаа байршина. Эдгээр өрөөнүүд нь өөр хоорондоо гайхалтай зохицжээ. 

Барилгын интерьерт байгалийн материал ашиглах нь онцгой, өвөрмөц хэв маягийг бий болгохоос гадна байгальд ээлтэй шинж чанарыг нь улам тодотгодог. Мөн пастел өнгийн сүүдэр ашигласанаар дотоод тохижилтыг улам байгалийн мэт уур амьсгалтай болгоход нөлөөлдөг байна. Мөн ухаалаг шилэн цонхыг угаалгын өрөөнд ашигласнаар гэрийн ногоон тохижилтыг нөгөө өрөөнөөс ч харах боломжийг бий болгож байгаа юм.

Аварга том гэж хэлж болохуйц 80 мкв террас бол уг төслийн хүний анхаарал татахуйц хамгийн гол хэсэг мөн. Энд террас руу гарах хэсгийг гал тогооноос дамждаг байхаар бүтээсэн нь хүмүүс террас дээр зөвхөн амрахаас гадна цэвэр агаарт барбекю шарж, оройн зоог барих боломжийг бий болгожээ.

Ерөнхийдөө тус барилгын интерьер нь энгийн цэмцгэр бөгөөд "ногоон" хэсгүүд, дээврийн террас, онцгой тавилгын сонголтуудын тусламжтай улам гайхалтай харагдаж байна. Уг барилга интерьерийн хувьд тайван, дулаан тав тухтай мэдрэмжийг өөрийн эрхгүй төрүүлэхүйц ба архитектурын хамгийн сүүлийн үеийн хэв маягийг ашигласнаар бусдаас ялгарах гол онцлог нь болжээ.