Лего-блокоор байшин барих боломжтой боллоо
Энэ санааг анх барилгын салбарт 25 жил ажилласан туршлагатай Габриэл Лакатос гаргажээ. Тэрээр 2018 онд барилгын ажлыг хөнгөвчлөх, байшин барих энгийн бөгөөд үр дүнтэй аргыг санал болгож, модон байшингийн иж бүрдлийг патентжуулж байжээ. Габриэл Лакатос өөрийн багадаа тоглодог байсан Данийн тоглоом болох легоноос санааг авч, олон сарын судалгаа, шинжилгээ хийсний үр дүнд дээрх Лего-барилгын материалыг зохион бүтээсэн аж. “LEGO” нэр нь Данийн "leg godt" гэсэн хоёр үгийн товчлол бөгөөд "сайн тоглох" гэсэн утгатай. LEGO группийг 1932 онд Оле Кирк Кристиансен байгуулсан байна.
Мөрөөдлийн байшингаа лего өрж байгаа мэт бүтээ!
Уг барилгын материалыг тусгаарлагдсан блок, тусгаарлагдсан дам нуруу мөн хаалга ба цонхны тотго хэсэгт ашигладаг. Та байшингаа барихдаа модон блокыг ашигласан бол дээвэр болон гадна хэсгээ ч өөрийн хүссэнээр барих боломжтой. Түүнчлэн дээрх лего-блок нь нөхөн сэргээгддэг, байгальд ээлтэй модоор /OSB/ хийгддэг ажээ.
Сонирхолтой нь эдгээр тусгаарлагч модон блокнууд нь хоорондоо яг л лего тоглоом шиг таардаг байна. Та өөрийн мөрөөдлийн байшингаа барихад ямар нэг барилгын зураг төсөл гэх мэт зүйлс хэрэггүй байх нь. Уламжлалт барилга барихаас ялгаатай нь лего блок ашиглахад урт хугацаа хэрэггүй, нэг долоо хоног л байхад хангалттай. Өндрийн хувьд Лего-Блок нь 30 см, уртаараа 30см, 60см, 90см гэсэн гурван өөр төрөлтэй. 60 см блок нь 7,5 кг жинтэй ба барилгад ашиглахад бусдаасаа хялбар байдаг.
Лего-блокоор байшин хэрхэн барьж буйг та доорх бичлэгээс үзнэ үү: