Архитектор гэж хэн бэ?

Хоосон орон зай архитекторын төлөвлөлт болоод гүйцэтгэл хоорондын тэнцвэрийн үр дүнд төгс болдог. Тэд л шинэ, өнгөлөг, сонирхолтой бас бүтээлч орон зайг бий болгож, бидний хүрээлэн буй орчинг гэрэлтүүлдэг юм. Барилгын төлөвлөлт, зураг төслийг боловсруулан, хянаж ажилладаг хүнийг архитектор гэнэ. Тэд нэг талаасаа уран сэтгэмжтэй урлан бүтээлчид хэдий ч нөгөө талаасаа хамгийн нарийн тооцооллийг хийж, цогцоор нь харж ажилладаг техникийн ухаантай хүмүүс байдаг. Эмч хүн алдаа гаргавал нэг хүн хорвоог орхино. Харин архитектор хүн алдаа гаргавал мянга мянган хүний амь яригддаг учир насан туршдаа өндөр хариуцлагыг хүлээж явдаг юм.

Тэд өгөгдсөн орон зайг таатай, тухтай байхаар бүтцийг гаргадаг ба барилгын гадна талын жижиг, чимхлүүр хэсэг хүртэл тэр чигтээ тэдний оюун санаанаас урган гардаг юм. Мөн барилгын өрөөний зохион байгуулалтыг захиалагчийн хүсэл сонирхлын дагуу зүй зохистойгоор төлөвлөдөг байна. 

Интерьер дизайнер гэж хэн бэ?

Барилгын бүтцийн ажил шийдэгдсэний дараа дотоод хоосон орон зайг бүтээлчээр дүүргэх, тохижуулах ажил нь интерьер дизайнерт хамаарах бөгөөд тухайн барилгын дотоод зохион байгуулалт, засал чимэглэлийн ажлыг хийж гүйцэтгэдэг. Өөрөөр хэлбэл тухайн өрөөнд аль буйдан, ямар хөшигтэй тохирох, хэрэв ямар нэг модон эдлэл хэрэглэгдэх шаардлагатай бол бусад тавилгууд хаана, хэрхэн байрших, ямар уран зураг байшингийн өнгө төрхтэй нийцэх вэ гэдгийг шийддэг. Түүнчлэн ямар төрлийн гоёл чимэглэл /цаг, ваар, ханын зураг г.м/ аль  өрөөнд тохирох нь мөн л тэдний мэдэл, мэдрэмжийн асуудал юм. 

Интерьер гэдэг мөн л амьдарч буй хүнийхээ сэтгэл санаа, оюун санаанд нөлөөлж байдаг бөгөөд тавилгын сонголт, материал нь эрүүл мэндтэй шууд хамааралтай байдаг юм. Тиймээс зөвхөн уран сайханд бус эрүүл мэндийг бодолцож үүргээ гүйцэтгэдэг аж.

Дээрх хоёр мэргэжил нь мэргэшлийн болон юунд илүү төвлөрч, загварчилсанаараа дараах байдлаар ялгаатай байна. Үүнд:

1. Загварын хувьд: Архитектор барилгын зураг төслийг боловсруулдаг бол интерьер дизайнер барилгын доторх орон зайд үйлчлүүлэгчийн хүсэлд нийцсэн өнгө төрхийг бүрдүүлэхийн тулд дотоод засал чимэглэлийг хийдэг.

2. Мэргэшлийн хувьд: Архитектор нь үндэсний болон орон нутгийн байгууламжийн норм, дүрмийн дагуу барилга төлөвлөлтийн ажлыг хийж гүйцэтгэдэг. Интерьер дизайнер нь чанартай, зөв дотоод орчинг барилгын дотор бүрдүүлэхийн тулд ажилладаг. 

3. Голчлон анхаарах нь: Архитектор нь загвар, материал, уур амьсгал, байгалийн гэрлийн тусгал, агааржуулалт гэх мэт техникийн талаас нь илүү анхаарч үздэг. Харин интерьер дизайнер бол орон зайн хувьд хүний сэтгэл зүй болон сэтгэл хөдлөлийн нөлөөлөл талаас нь чухалчилж ажилладаг. 

   
   

Тухайлбал, интерьер дизайнер эмнэлгийн өрөөний тохижилтыг өвчтөний сэтгэл санааг дээрдүүлж, эдгэрэлтийг түргэсгэхийн тулд өрөөнд тайвшруулах, анагаах өнгө, гэрэл, тавилга байхаар тохируулан хийдэг байна. Түүнчлэн боловсролын байгууллагуудын хувьд ч сайн мэдлэг олж авахад нөлөөлж, таатай орчинг бий болгох дотоод заслын ажлыг хийж гүйцэтгэдэг.