Дэлхий нийтийг хамарсан цар тахал тархаж, бүх нийтийн бэлэн байдал, хатуу хөл хорио тогтоосноос болж олон ААН-үүд хаалгаа барьж, ажилгүйдэл нэмэгдэж, иргэдийн амьдрал доройтсоор байна. Ковидын халдвар олон нийтийн дунд өргөн тархаж, эмнэлгүүд ачааллаа дийлэхгүй болсон энэ цаг үед бид коронатай зэрэгцэн ажил амьдралаа үргэлжлүүлэн явуулахаас өөр арга алга.

Барилга бүтээн байгуулалтын ажил эхэлж байгаа энэ үед хатуу хөл хорио тогтоовол эдийн засаг хямраад зогсохгүй ард иргэдийн амьдрал бүр хүндрэхээр байна. Халдварын тохиолдол Улаанбаатар хот төдийгүй хөдөө орон нутагт өргөн тархаж, сүүлийн 3 хоногт 1300 гаруй тохиолдлоор нэмэгдлээ. Хэдийгээр тархалт их байгаа ч төрийн зүгээс аль болох хатуу хөл хорио тогтоохгүйгээр эдийн засгаа хамгаалахыг хичээн ажиллаж байгаа ч байгууллагууд маань халдвар ариутгалын дэглэмээ баримтлахгүй, ажлын байрандаа маск зүүхгүй, зарим иргэд олноороо баяр ёслол тэмдэглэж байгаа нь халдварын тархалтыг улам нэмэгдүүлж байна.

Тиймээс хүн бүр хичээж, халдвар ариутгалын дэглэмээ баримтлан ажиллаж, амьдарч хаа ч, хэнтэй ч уулзсан масктай байж хайртай хүмүүсээ цар тахлаас хамгаалахыг та бүхэндээ уриалж байна. 

Эдийн засгийг нуруун дээрээ авч явж байгаа баялаг бүтээгчид, ажил хөдөлмөр эрхэлж байгаа хөдөлмөрийн насны иргэдээ нэн яаралтай вакцинжуулалтад хамруулж эдийн засгаа аврахыг Монгол улсын Засгийн газар, УОК-оос хичээнгүйлэн хүсэж байна.

Халдвар гарсан бүсүүдэд хэсэгчлэн хөл хорио тогтоож, олон хүн цуглуулахгүй байх, зөвхөн халдвар тархах өндөр эрсдэлтэй үйл ажиллагааг зогсоож, иргэд ААН-үүдийг халдвар ариутгалын дэглэм баримтлахад анхаарч хяналт тавьж, хатуу хөл хорио тогтоохгүйгээр эдийн засгаа аваръя, эрүүл мэндээ хамгаалъя.