2021 оны загварлаг интерьер
Сүүлийн хэдэн жилд ноёрхож байсан интерьерийн эко чиг хандлага байр сууриа тавьж өгөх болоогүй байна. Дизайнерууд 2021 оны загварлаг интерьерийг байгалийн эко материалыг ашиглан цэвэр, дулаан, тохь тухтай, энгийн хэв маягаар чимэглэхийг санал болгож байна. Гэхдээ энэ өөрчлөлт нь соёл, интерьерийн уламжлалт чиг хандлагыг бүрмөсөн орхих хэрэгтэй гэсэн үг биш юм. Байшин, орон сууцандаа интерьерийг илүү тохь тухтай, оновчтой шийдэлтэй болгоход туслах дараах шинэлэг мэдээлэлд анхаарлаа хандуулаарай.
2021 оны интерьерийн үндсэн чиг хандлага
Байгаль орчинд ээлтэй байх: Том хотын амьдрал нь биднийг байгалийн элементтэй шууд харьцахаас тусгаарладаг тул түүнийг өөрийн амьдрах орчиндоо бий болгох нь чухал юм. Та дотоод засал чимэглэлдээ ургамал болон байгальд байдаг бусад элементүүдийг ашиглаж болно. Үүнд: байгалийн чулуу, мод, далайн хясаа, элс, сүрэл, хулс, нишингийн гоёл чимэглэлийн зүйлс зэрэг болно. Экологийн гаралтай буюу хүний биед хоргүй ор дэрний даавуу, алчуур, эко будгаар будагдсан ханын зураг чимэглэл тэр ч бүү хэл цэвэрлэгээний эко бүтээгдэхүүн сонгох хэрэгтэй. Ингэснээр та илүү байгальд ойртож байгаль дэлхий ч танд талархах болно. Байгалийг санагдуулах интерьер 2021 онд оргил үедээ хүрэх болно.
Хувь хүний хэрэгцээнд тохирсон: Сүүлийн үеийн интерьер дизайн, гоёл чимэглэлийн чиг хандлага нь орон зайг өвөрмөц болгоход чиглэгдэж байна. Өөрөөр хэлбэл, нийтлэг чиг хандлагад эсвэл мэргэжилтнүүдийн сүүлийн үеийн чиг хандлагын талаарх зөвлөмжид баригдахгүй зөвхөн хувь хүн өөрийн онцлог, хэрэгцээндээ тохируулан өөрийн орон зайг бий болгох болсон. Өөрийнхөө бүтээлч сэтгэлгээг дэмжин, үзэл бодлоо илэрхийлэх орон зайг бүрдүүлэх, энгийн хирнээ чамин эд зүйлсээр өрөөг тохижуулах нь загварын гол хэв маяг болжээ. Гэр бүлийн гишүүд, хувь хүний хэрэгцээнд тохирсон, тэдгээрийн хүсэл сонирхолд нийцсэн интерьер нь загварлаг, бодитой байдаг. Хэрэгцээнд тохирсон интерьерт дараах зүйлсийг тооцох хэрэгтэй.
● захиалгаар хийлгэсэн болон өөрийн гараар хийсэн тавилга;
● зөөлөн эдлэл;
● цоолбор, мозайк, даавуу, байгалийн материал ашигласан тусгай чимэглэл;
● гэр бүлийн гишүүдийн зураг бүхий фото ханын цаас;
● тод гэрэлтүүлэг болон өлгөөтэй гоёл чимэглэлийн элементүүд;
Цогцолбор интерьер: Нийтийн эзэмшлийн талбайг уламжлалт байдлаар тохижуулдаг үе ард хоцорсон байна. Ирэх оны нөхцөл байдлаас шалтгаалж олон хүн гэрээсээ ажиллах боломжийг олгох ажлын талбайг амьдрах орон зайд нэгтгэх боломжийг олгодог шинэ шийдлүүдийг интерьерт тусгахыг мэргэжилтнүүд зөвлөж байна. Зочны өрөөг гал тогооны өрөөтэй хослуулах нь одоо хэнийг ч гайхшруулахгүй болсон. Тиймээс дизайнерууд улам бүр урагшилж, цэвэр цэмцгэр, тод загварт хүрэхийн тулд уян хатан, далд, хөдлөх тавилгын загварыг санал болгож байна. Жижиг талбайтай орон сууцанд ажлын өрөө, амрах талбай, номын сан, гал тогоог нэгтгэж, юм хадгалах, тавилга, тоног төхөөрөмж байрлуулах булангуудыг шийдэх шаардлагатай болж байна.
Зөөлөн байдал: Тохь тухтай орчныг бүрдүүлэх чухал зүйл бол тавилгын гол элементүүдийн хэлбэрийг өөрчлөх байдаг. Шулуун, нарийн, хурц өнцөг алга болж, оронд нь гөлгөр муруй, зөөлөн ирмэг, долгион хэлбэртэй болж байна. Сонгодог зөөлөн тавилгын иж бүрдэл, инновацийн элементүүдийг ихээр ашиглахаар төлөвлөж байна. Бүрмэл өргөн тавцан, өндөр сандал, модон түшлэг ч өнгө үзэмж нэмнэ.
Тав тухтай амьдрах орчныг бүрдүүлэх эхний алхам бол орон сууц эсвэл тусдаа өрөөг засах хэв маягийг сонгох явдал юм. Загварыг тодорхойлох гол хүчин зүйл бол өнгөлгөөний материал, тавилга, нэхмэл эдлэл, гоёл чимэглэлийн элемент, гэрэлтүүлгийн системийн сонголт юм. Ирэх онд түгээмэл болох интерьерийн дараах хэв маягт анхаарлаа хандуулаарай.
Скандинав ба Япон. Нордикийн болон Дорно дахины хэв маягийн холимог нь тус хоёр чиглэлийн хамгийн сайн шинж чанарыг авч орчин үеийн интерьерт нэвтрүүлэх боломжийг олгож байна. Энэ хэв маягийн загварыг “Japandi” гэж нэрлэх ч бий. Цагаан өнгө нь илүү давамгайлсан, дулаан уур амьсгалыг бий болгодог, байгалийн мод, чулуу зэрэг органик материалаар чимсэн чиг хандлага юм. Тав тухыг мэдрүүлсэн, байгалийн гэрэл, уужим орон зай, тавилгын хувьд шулуун, нарийн шугамыг илүүд үзсэн, уламжлалт хэв маягийг орчин үеийн загвартай хослуулан хүний энгийн хэрэгцээг хангах дизайн уг загварын илрэл ба дараах онцлог шинж чанартай байдаг.
●функциональ байдал - эвхдэг тавилга, энгийн хялбар хийцлэлтэй тусгаарлах хана;
● энгийн байдал;
● толботой тод өргөлт бүхий байгалийн өнгө;
● энгийн бүтэцтэй нэхмэл эдлэлүүд - хөшиг, аравч, дэрнүүд;
● хамгийн бага чимэглэл;
Минимализм. Энэ хэв маягийн гол тодорхойлох зүйл бол их гэрэл, бага өнгө, маш энгийн бөгөөд хэрэгцээг хангахуйц тавилгуудыг ашигладаг. Мөн аливаа зүйлсийг байж болох хамгийн жижиг авсаархан, хэрэглэхэд хялбар болгосон байдаг. Харахад энгийн, товч тодорхой интерьерийн шийдэл ба түүний чамин хирнээ эмх цэгцтэй байдал нь хэрэглэгчдийг их татдаг.
Энэ хэв маягт байгалийн болон хиймэл материал ашиглахыг зөвшөөрдөг. Хамгийн гол нь тэдний хослол нь зөв, нэгдмэл байх явдал юм. Хэрэглэгчдийн чиг хандлага илүү энгийн зөв зохион байгуулалттай минимализмд шилжсэн хэвээр байх ба хүн өөрийн хэрэгцээнд зориулсан зардлын хувьд хамгийн үр ашигтай төлөвлөлт орон сууцны шийдлийг сонгохыг зөвлөж байна. Минималист чиглэлийн танигдах шинж чанарууд:
● хамгийн их чөлөөт орон зай;
● их хэмжээний гэрэл нэвтрүүлдэг том цонх;
● жижиг орон сууцанд ч том талбайтай мэт харагдуулах гэрэлтүүлгийн систем;
● төвөгтэй чимэглэлгүй энгийн геометр хэлбэртэй тавилга;
● даавуун хөшигний оронд хэвтээ эсвэл босоо жалюзан хөшиг;
● энгийн хана, тааз.
Лофт. Нээлттэй, холимог зохион байгуулалт хэрэгцээтэй байгаа тул орчин үеийн орон сууц, ялангуяа жижиг студид энэ чиглэлээр тохижуулах интерьер урьд урьдынхаас илүү эрэлттэй байх болно. Энэ нь хатуу дүрэм журамгүй хэв маяг бөгөөд энд гол нь гэрэлтүүлгийн хангалттай байдал, цэвэр агаар, эрх чөлөө, бүтээлч байдлын уур амьсгалыг бүрдүүлэх явдал юм.
Энэ чиглэлийн онцлог шинж чанарууд:
● бүсчлэлийн элемент бүхий нэг орон зай;
● барзгар дотоод засал чимэглэл - өнгөлгөөгүй гипс, саарал бетон;
● нээлттэй харилцаа холбоо - төмөр хийц, дамжуулах хоолой, цахилгааны утас ил байх;
● хөшиг болон бусад чимэглэлгүй асар том нээлттэй цонхнууд;
● эртний эдлэл, хуучин эд зүйл ашиглах;
● граффити, ер бусын уран зураг, эвлүүлэг, хийсвэр чимэглэл;
● Өндөр тааз ба цэлгэр байдал;
● Байгалийн материал, ялангуяа металл, мод, арьс шир, тааран даавууг ашиглах;
2021 оны өнгөний сонголт
Интерьерийн хэв маяг бүр өөрийн гэсэн онцлог, өнгөний сонголттой байдаг. Ирэх онд дизайнерууд оргил үедээ байх хэд хэдэн сонирхолтой өнгө, тэдгээрийн хослолд анхаарлаа хандуулахыг санал болгож байна.
Терракотта. Улбар шар, шар, улаавтар, хүрэн тоосгоны өнгө нь тавилга, дагалдах хэрэгслийн эрэлт хэрэгцээтэй өнгө байх болно. Зөөлөн бүрээс, ширээний тавцан, арьсан буйдан, цэцгийн сав, кофены ширээ, зөөлөн дэрнүүд ийм өнгөтэй байх нь гоё харагдуулдаг.
Ногоон- гаа. Энэ өнгө нь тайван байдлыг мэдрүүлж, эв найрамдлыг бий болгоход зориулагдсан байдаг. Тааз, хана, модон гадаргууг засахдаа энэ өнгийг цагаанаас өөр хувилбар болгон ашиглахыг зөвлөж байна. Хэрэв та дулаан интерьерийг бий болгохыг хүсвэл “ногоон гаа” -г кофены өнгө, ягаан саарал, терракотатай хослуулаарай.
Ногоон -лонх. Гүн ногоон өнгийг дээд зэрэглэлийн өнгөлгөөний материалын чиг хандлагыг тодорхойлдог Graham & Brown брэнд загварт оруулсан. Олон талт, байгалийн болон шинэлэг байдалд сайн тохирдог. Лонхны ногоон өнгийг төмөрлөгтэй хослуулан лофт болон минималист хэв маягт ашигладаг.
Цайвар хөх саарал. Энэхүү орон сууцны дизайны өнгөний сонголтыг жил бүр чиг хандлагын схемийг боловсруулдаг Pantone мэргэжилтнүүд санал болгосон. Цайруулсан цэнхэр өнгө нь саарал өнгөний төвийг сахисан байдлыг цагаан өнгөний бүтээлч байдалтай хослуулдаг. Энэ нь бараан, дулаан шаргал, сэрүүн ягаан, ногоон өнгөтэй сайн зохицдог. Цайвар саарал өнгийг дотоод засал чимэглэл болон тавилга чимэглэхэд ашиглаж болно.
Зөөлөн шар. Орчин үеийн интерьерт та дулаан, “гич”-ний өнгө олж харах нь улам бүр нэмэгдэж байна. Унтлагын өрөө, ажлын өрөө эсвэл зочны өрөөнд гичний сүүдэр нь сонирхолтой өргөлт болдгоос гадна тавилга бүрээс, хивс, цэцгийн сав, дэрэндээ энэ өнгийг ашиглаж болно. Энэ өнгө орсон тавилга нь тансаг харагддаг тул орон зайг гоёмсог болгоно. Загвар зохион бүтээгчид гичийн өнгийг шоколад, цагаан, саарал өнгөөр хослуулдаг нь энэ онд алдартай хэвээр байна.
Орчин үеийн интерьер дизайны чиг хандлагад загварлаг шийдлийг орхих нь уйтгартай байх бөгөөд энэхүү шийдэл нь амьдрах орон зайд онцлог шинж чанар, өнгө төрх нэмж өгдөг. 2021 интерьерт тохирсон зарим загварлаг шийдлүүдийг оруулж байна.
Боломжтой бол нуух- Зохион бүтээгчид гал тогооны тоног хэрэгсэл болон хоол бэлдэх талбайг аль болох далдалж, орон зайг чөлөөлөхийг санал болгож байна. "Боломжтой бол нуух" гэдэг нь гал тогоонд хамаатай хандлага юм. Үүнд: гулсах хавтан, далд нүх, хөдөлгөөнт хаалтыг ашигладаг.
Нээхийн тулд хүрэх - Тавилга хэрэгслийн бариулгүй байх шийдэл юм. Хэрэв бариулаас бүрэн чөлөөлөх боломжгүй бол тэдгээрийн тоог хамгийн бага хэмжээнд хүртэл бууруулахыг санал болгож байна.
Дээврийн унтлагын өрөө -Амины орон сууцны дээврийн хөндий болох мансардын давхарт унтлагын өрөөг төлөвлөх нь илүү тав тух, цэвэр агаарыг бүрдүүлнэ. Унтлагын орны хилэн халхавч нь дэгжин, загварлаг харагдуулдаг. Үүнийг хөшиг, сандлын бүрээс, хилэнгээр хийсэн дэртэй хослуулах нь зохимжтой.
Гал тогоонд гантиг - Гантиг нь дууриамал ч гэсэн үнэтэй, дэгжин харагдана. Гал тогооны тавилгын тавцан, нүүрэнд оруулга хэлбэрээр оруулах нь түгээмэл байдаг.
Толин тусгал- Цацруулагч гадаргуу нь орон зайд эзэлхүүн, гүнийг нэмж, жижиг өрөө тасалгааг өргөжүүлдэг. Жижиг унтлагын өрөөнд гүйдэг хувцасны шүүгээг тааз хүртэл угсарч, хоолны ширээг толин тусгал бүхий тавцангаар тоноглож, зочны өрөөг толин тусгал бүхий самбараар чимэглэх боломжтой.
Арьсан буйдан, түшлэгтэй сандал - Энэ шийдэл хэзээ ч загвараас гарч байгаагүй ба 2021 онд мөн тренд хэвээр байна. Тансаг зөөлөн арьсан буйдан нь интерьерт бүрэн нийцэж, синтетик болон нэхмэл эдлэлийн загвараас холдуулж байна. Зочны өрөөндөө арьсан тавилга, оффистоо жижиг буйдан, унтлагын өрөөндөө орны дэргэд байх гоёмсог түшлэгтэй сандал тавихыг санал болгож байна.
Тавцан дээрх ор- Унтлагын орыг тавцан дээр байрлуулж, шургуулга, гэрэлтүүлэг, задгай тавиур, тэр ч байтугай жижиг шатаар тоноглох нь их хийгдэж байна. Энэхүү шийдэл нь ямар ч орон сууцанд тохиромжтой юм.
Загварын сонирхолтой шийдлүүд, дизайны арга техникийг ашиглан 2021 оны загварлаг интерьерийг байшин сууцныхаа аль ч хэсэгт бий болгож болно. Жижиг орон сууцны хувьд холимог орон зайг зохион байгуулах арга техник, олон талт тавилга ашиглах нь хамгийн тохиромжтой. Том сууцанд дулаан өнгө, тансаг зөөлөн тавилга, тав тухтай байдалд анхаарлаа хандуулах нь зүйтэй. Сонгодог загварын хэв маяг, гар аргаар хийгдсэн тавилга, хувийн орон зайн илэрхийлэл зэргийг нэгтгэн шинэлэг зүйлээ хуучинтай нь төгс хослуулан өөрсдийн онцлог, хэрэгцээнд зориулсан өвөрмөц интерьерийг бий болгоорой.
Орчуулсан: С.Тунгалаг
Уншигчдын бичсэн сэтгэгдэлд barilga.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул та сэтгэгдэл бичихдээ бусдын эрх ашгийг хүндэтгэн үзнэ үү.