1913-2005 /92нас/

Архитектор Кензо Танге нь 1913 онд Осака хотод төрсөн ба  Японы олон хотод төдийгүй дэлхийн олон улсад олон тооны бүтээлүүд туурвисан бөгөөд 1980 он гэхэд 20 орчим улсад олон улсын хэмжээний зураг төслүүд хийжээ.  Түүний уран бүтээлийн замнал 20-р зууны 2-р хагасыг тэр чигээр нь чимсэн  юм.

Метаболизмын хөдөлгөөн болон Структивизмын гол төлөөлөгч юм. 

1935 онд Токиогийн их сургуулийн архитектурын тэнхимд суралцсан ба төгсөлтийн бүтээл нь 42 акр талбайг хамарсан Токиогийн Хибаяа паркийг хөгжүүлэх төсөл байжээ. 

1949 онд Хирошимагийн энх тайвны дурсгалын цэцэрлэгийн Музейн төслийн уралдаанд түрүүлсэн нь том амжилтын эхлэл болсон ба эхэн үеийн бүтээлүүдэд Швейцар /Франц архитектор, орчин үеийн архитектурыг үндэслэгчдийн нэг Ле Корбьюзегийн хэв маяг их нөлөөлсөн байдаг. 

1. Хирошимагийн энхтайвны музей

Түүний хот төлөвлөлтөөр суралцах, бүтээх  сонирхол нь дэлхийн 2-р дайны дараах сэргээн босголтонд оролцох гол шалтгаан болсон ба 1946 онд дайнд сүйрсэн хотуудын сэргээн босголтын ажилд уригдан Хирошима, Маебаши хотуудын төсөлд оролцсон байна. 

2. Токиогийн эргийн төсөл

Бүтээлийн гол онцлог нь өөр хоорондоо харилцан адилгүй бөгөөд төслийн гол санааг архитектурын нийтлэг хэв маяг, хэлбэрээс тэс өөрөөр илэрхийлж Японы үндэсний хэв шинжийг тусгадаг байна. Тухайл балгеометрийн энгийн хэлбэртэй модерн хэв маягийн бүтээлүүдээс  Хирошимагийн музейг нэрлэж  болох бол дунд үеийн бүтээлүүд нь динамик буюу эрч хүчтэй  хөдөлгөөн бүхий спортын барилгууд байдаг. 

Бүтээлдээ үндэсний хэв шинжийг тусгахдаа санаа авсан зүйлээ шууд хуулбарладаггүй бөгөөд архитектурын өвөрмөц зохиомжийг барилгын бүтээцийн хүчирхэг шийдэлтэй хослуулдаг байна.

Тэрбээр мөн дэхийн шилдэг архитекторт олгодог нэр хүндтэй шагналуудыг бүгдийг нь хүртэж байв. 

·        1965 он RIBA-Royal institute of British /Англи/ алтан медал

·        1966 он AIAAmerican institute of Architecture /АНУ/ алтан медал

·   1987 Pritzker prize Дэлхийн хамгийн нэр хүндтэй шагнал бөгөөд Ази тивээс хүртсэн 2 дахь архитектор нь Кензо Танге /өмнө нь Ион Мин Пэй 1983 он/ болжээ.

    Түүний бүтээлүүд

1964 оны Токиогийн олимпийн хотхон, спортын барилгууд

3. Иоиоги цэнгэлдэх хүрээлэн

Ази тивд анх удаа олимпын наадам Япон улсад зохион байгуулагдахад  улсын, тивийн нэр хүндээс гадна  дайны дараах Японы сэргээн босголтыг харах чухал үйл явдал байсан юм.  Энэ үйл явдалд Кензо Танге архитектурын бүтээлүүдээрээ чухал үүрэг гүйцэтгэсний дотор Иоиоги цэнгэлдэх хүрээлэнгийн цогцолбор чухал байр суурь эзэлнэ.  

Том ордон нь усанд сэлэлт болон олон зориулалттай бөгөөд 11,000 хүний суудалтай, хүчитгэсэн  төмөр бетон 2 том нүсэр тулгуур, түүнтэй холбогдсон дүүжин бүтээц нь дээврийн хийцийг даах ба тухайн үедээ дэлхийн хамгийн том барилгын  дүүжин бүтээц байв.  Дээврийн нуман хэлбэр нь хүчтэй салхины нөлөөллийг бууруулна. Барилгын газар хөдлөлийн болон бусад инженерийн тооцоо нь зургийн багийн санааг ихээр зовоож байсан ч Кензо Танге эрс шийдэмгий багаа удирдан төслөө дуусгасан байна.

Архитектурын хэв шинжийн хувьд Японы майхан оройтой шүтээний дан барилгын хэв маягийг агуулсан ба тэрхүү IseShrine хэмээх шүтээний баишингийн сэргээн засварлалтанд Танге оролцож байжээ.

Жижиг ордны хувьд 5300 хүний суудалтай ба ижил концепц, инженерийн шийдэлтэй олон зориулалт бүхий ордон юм. 

4. Кагава спортын ордон-1964 он

Сагсан бөмбөг болон бусад зориулалттай 2500 хүний суудалтай ордон ба Танге Токиогийн олимпийн хотхоны зураг төсөл дээр ажиллаж байх үедээ боловсруулжээ. Япон хэлбэрийн модон усан онгоцны загварыг үндсэн концепцоо болгосон ба далай тэнгист онгоцон дээр салхи, шуургатай тэмцэх тэмцлийг спортын тэмцэлтэй адилтган үзсэн байна. 

5. Кагава захригааны барилга 1958 он

Японы уламжлалт сүмийн хэв маягаас санаа авч өнгө , материал, бүтээцийн системийг нь орчин үеийн барилгын хэлбэртээ тусгажээ.

6. Италийн Наплес хотын бизнес дүүргийн төсөл - 1982 он 18 өндөр барилга бүхий  голдоо цэцэрлэгт хүрээлэнтэй төлөвлөлт

Олон улсад хийсэн томоохон ерөнхий төлөвлөгөөний бүтээл бөгөөд голдоо цэцэрлэгтэй задгай орон зай бүхий барилгын Япон хэв маягийг тусгажээ.

7. Пакистаны дээд шүүхийн барилга 1993 он

Геометрийн энгийн шаталсан хэлбэр бүхий модерн хэв маягийн барилга.

8. Яаманаши хэвлэл мэдээллийн төв 1966 он

Сонин, радио, зурагт зэрэг хэвлэл мэдээллийн олон зориулалттай орон зайг нэгтгэсэн барилга

9. Токиогийн захиргааны ордон 1991 он

10. Гэгээн Мэригийн сүм -1964 он

11. Кувейтийн элчин сайдын яам-1970 он

Түүний хүү  Пол Норитака Тэнге нь 1958 онд Токиод төрсөн бөгөөд 1981 онд Харвардын архитектурын сургуульд сурч 1985 онд магистрийн зэрэг хамгаалсан ба улмаар Тангегийн төслийн компанид ажиллан одоо дэлхийн олон оронд зураг төсөл хийн, аавынхаа үйл хэргийг үргэлжлүүлж байна.

Бэлтгэсэн: Д. Гантулга

Улаанбаатар эрдэм их сургуулийн багш

Маруго ХХК-ийн архитектор