Шинэ дэвшилтэт техник, технологийг барилгын салбарт нэвтрүүлэн ажиллаж, салбартаа тогтвортой үйл ажиллагааг идэвхтэй явуулсаар өдгөө 21 дэх жилтэйгээ золгож буй “ТОТКОМ СЕРВИС” компанийн захирал Д.Жаргалсайхантай 20 жилийн амжилт бүтээлийнх нь талаар ярилцлаа. Тус компани нь 2007 оны МХАҮТанхимаас шалгаруулдаг ТОП-100 ААН-д өрсөлдөгч 50 компанийн нэгэнд шалгарч байсан түүхтэй ба танхимын алтан гишүүдийн нэг. Түүнчлэн салбартаа шинэ технологи, эко бүтээгдэхүүн нэвтрүүлэгч зэрэг олон шагналын эзэн болж амжилттай ажиллаж буй барилгын материалын ханган нийлүүлэгч компани юм.  

Их бүтээн байгуулалтын салбарт хувь нэмрээ оруулж яваа “ТОТ КОМ СЕРВИС” компанийн 20 жилийн ой тохиож байгаад баяр хүргэе. Ярилцлагаа танай компанийн нэр, логоюуг билэгдсэн, ямар утга агуулсан талаар эхлүүлье?

Баярлалаа. Энэхүү ярилцлагаараа хамт олондоо болон бүх харилцагчдадаа 20 жилийн ойн баярын мэнд хүргэмээр байна. Би Тамир, Онон, Тэлмэн гэх гурван хүүхэдтэй. Компаниа байгуулахдаа хүүхдүүдийнхээ нэрний эхний үсгийг оруулан “ТОТ” гээд Коммунальный сервис буюу Нийтийн аж ахуйн үйлчилгээ үзүүлэх зорилго тавьж “ТОТ КОМ СЕРВИС” гэж нэрлэсэн. Энэ нэрийг манай гадаадын харилцагч түншүүд “TOT COM SERVICE” гэдгийг “Time Of Tirget of complex service буюу Комплекс сервис үзүүлэх цаг” гэж бизнесийн тайлбар хийсэн байдаг.

Логоны хувьд байшинг дүрсэлж голд нь Монгол бичгээр компанийн нэрээ бичиж, хүний амьдрах орчинг эко-ногоон болгох зорилгоо билэгдсэн учиртай юм.

Харин үйл ажиллагааны чиглэл гэвэл барилгын цахилгаан, сантехникийн чиглэлээр орон сууц нийтийн аж ахуй талдаа буюу ундны усны чанарыг сайжруулах, ариутгал халдваргүйтгэлийн тоног төхөөрөмж, шалны халаалт, усны хэмжилт, хэмнэлттэй ухаалаг техник технологи болон цахилгаан шат нийлүүлж, угсран, засвар, техникийн үйлчилгээ хийдэг. Изриаль улсын “HOP Engineering”, Шведийн “Алфа лавал“, БНСУ-ын “Scale buster”,“ DAEWOO Enertec”, Шанхайн “Ассишион”, АНУ-ын “ОТИС”, БНХАУ-ын ШИЗИ элеватор компаниуд, Беларусийн Бобруйск тракторын үйлдвэр, Изриалийн “АРАД”, мөн Изриалийн “Атлантиум зэрэг компаниудтай Монгол дахь албан ёсны дистрибьютер болон хамтран ажиллаж байна.

20 жилийн түүхт компаниа анх үүсгэн байгуулж байхдаа тавьсан зорилгодоо өдгөө хүрч чадав уу?

Би ОХУ-д Инженер-эдийн засагчаар 1984 онд төгсөж ирээд “Орон сууц нийтийн аж ахуй”-н салбараас ажлын гараагаа эхэлж, магистр, “Сууц Өмчлөгчдийн Холбоо”-ны чиглэлээр эдийн засгийн ухааны дэд докторын зэрэг тус тус хамгаалсан. Миний голлон ажиллаж ирсэн “Орон сууц нийтийн аж ахуй” гэх энэ салбартаа 36 жилийн ажил, амьдралаа холбосон байна. 

Анх компаниа байгуулж байхдаа хүний амьдрах орчин болсон барилга байгууламжийн орчин, тоног төхөөрөмжийг хүн болон байгальд ээлтэй  “ногоон-эко” болгоно л гэж зорьсон. Тиймээс болж л өгвөл дэлхийн дэвшилтэт тэргүүний эко бүтээгдэхүүнийг нэвтрүүлэхийг зорин ажиллаж байна. Үүнийг минь үнэлсэн салбарын хүндэт шагналуудаас дурдвал 2014 онд БХБЯам, Барилгачдын Холбооны “Барилгын салбарт шилдэг технологи нэвтрүүлэгч байгууллага”-аар, 2015 онд “Улаанбаатар түншлэл-2015” олон улсын үзэсгэлэн яармагт ОНЦЛОХ Импортын бүтээгдэхүүнээр, “Ногоон барилга-2015” үзэсгэлэн яармагт “НОГООН ТЕХНОЛОГИ” нэвтрүүлэгчээр, 2016 онд “Монголын Маркетинг Менежментийн хүрээлэн”-гээс зохион байгуулсан “GRAND EXPO-2016” үндэсний бизнес фестивальд амжилттай оролцож “GRAND-100” АНН-ээр шалгаран БАРИЛГА, НИЙТИЙН АЖ АХУЙН САЛБАРЫН  “ТОП ААН”, 2019 онд “Барилга экспо-2019” үзэсгэлэнгийн “ШИЛДЭГ ХАНГАН НИЙЛҮҮЛЭГЧ” шагнал хүртэн батламжаар тус тус шалгарсан, шагнал өргөмжлөлүүдийг хүртсэнээс харж болох болов уу. 

Энэ хугацаанд салбартаа хийсэн томоохон ажлуудаасаа дурдаач? 

Хийсэн ажлаасаа онцлон дурдвал Израиль улсад үйлдвэрлэсэн “Усны чанар сайжруулагч PTH” төхөөрөмжийг нутагшуулж, суурилуулах, ашиглахад тавих шаардлага MNS 6844 : 2020 стандарт боловсруулан батлуулж, цахилгаан шат /лифт/-аар зорчих иргэдийн аюулгүй байдлыг хангах үүднээс 24 цагийн интернетийн хяналттай, 14 хоног хар хайрцагт мэдээллээ хадгалах диспетчерийн нэгдсэн хяналтын системийг анх удаа  нэвтрүүллээ. Мөн агаарын бохирдлыг бууруулахад хувь нэмрээ оруулж Солонгос улсын “Эрчим хүчний хэмнэлттэй чанар, эдэлгээ  сайтай шалны халаалт оруулж ирж суурилуулан иргэдийн талархлыг хүлээж байна. “Орон сууц нийтийн аж ахуй”-н салбартай холбогдох эрх зүйн орчныг сайжруулах тал дээр холбогдох газруудад тулгамдаж буй асуудал, санал, судалгаагаа хүргэн ажилладаг. Одоо хэрэглээний усны механик тоолуурыг ухаалаг болгох, хэмнэлт тал дээр дэлхийн дэвшилтэт шинэ техник, технологи нэвтрүүлж байгаа.  

Сүүлийн үед ундны усны чанарын тал дээр шинэ технологи нэвтрүүлэн ажиллаж байгаа юм байна. Энэ талаараа  уншигчдад мэдээлэл өгөөч?

Ундны ус гэдэг бол улс үндэстний аюулгүй байдалтай холбоотой. Усаа хайрлан, үр ашигтай, ухаалгаар хэрэглэх орчин үеийн дэвшилтийг ашиглах нь манай орны төдийгүй бусад улс орнуудын хувьд ч чухал шаардлага болж байна. Дэлхийд Израиль улс энэ салбарт тэргүүлэгч тул манай компани HOP Engineering, Arad техноложиес, Атлантиум компаниудын Монгол дахь албан ёсны дистрибьютерээр ажилладаг. Ундны усны чанарыг сайжруулах оптик аргаар халдваргүйжүүлэх технологи нэвтрүүлэх мөн усыг хэмнэх төхөөрөмж болон усны тоолуурын заалтыг авах гэж айл болгоны хаалгатогшдог байдлыг түүх болгон халж, барилгын гаднаас шууд авдаг болгох тал дээр ажиллаж байна. 

Дэлхий нийтээрээ ундны усны хэмнэлт, усны чанар, ариутгал халдваргүйтгэлд анхаарлаа хандуулж байгаа энэ үед технологийн акул гэгдэх Израилийн технологиудаасаа товчхон танилцуулаач?

Хүн амын ундны усыг дамжуулдаг шугам хоолойнуудад  хаг, зэв, хатуулаг их байдаг. Тухайн барилга, хотхон хороолол, амины орон сууцны шугам хоолойн анхны оруулга дээр суурилуулдаг химийн бодис, тог цахилгаан хэрэглэдэггүй 12 төрлийн өнгөт үнэт металлаас бүрдсэн, зүрхэвчид наалдсан зэв, хаг, өнгөрийг жилд 1-2 удаа сойздож цэвэрлээд, эргүүлэн холбож суурилуулах, усны хатуулаг бууруулж, нян бактерийг устгах чадвартай 60 жилийн эдэлгээ даах чанартай, Монгол улсын чанарын тохирлынг эрчилгээ бүхий MN6844:2020 стандарттай Израиль бүтээгдэхүүн “Усны чанар сайжруулагч- РТН” суурилуулахыг санал болгодог. 

Мөн усыг оптик аргаар халдваргүйжүүлэх Атлантиумийн шийдэл нь сүүлийн үеийн дэвшилтэт технологи болон мяндасны оптикийн зарчимд тулгуурлан усыг халдваргүйжүүлэх уламжлалт аргачлалд ашиглагдаж байгаа ихэнх сул талуудыг арилгаж чадсан. Ингэснээр халдваргүйжүүлэх ажиллагааны чанар болон найдвартай ажиллагаа харьцуулшгүй өндөр төвшинд хүрснээс гадна ашиглалтын зардлыг үлэмж бууруулж байгаа юм.

Компаниасаа гадуур нийгмийн хүрээнд ямар ажилд гар бие оролцон ажиллаж байна?

“Монголын Сууц Өмчлөгчдийн эрх ашгийг хамгаалах Нийтийн Аж Ахуйн Хөгжил Сан”-г санхүүжүүлж ажилладаг. Нийтийн эзэмшлийн цахилгааны зардлыг сэргээгдэх эрчим хүчээр шийдүүлэх, нийтийн зориулалттай орон сууцны дундын өмчлөлийн урсгал зардлын хуримтлал бий болгох санал мөн Орон сууцны суурь хууль боловсруулах чиглэлээр ОХУ-ын “Жилищный кодекс” 296 хуудас хуулийг орчуулж өгсөн гэх мэт ОСНАА холбогдох эрх зүйнбаримт бичгүүдэд өөрийн хуримтлуулсан судалгаа, санал өгдөг. Нийтийн эзэмшлийн цахилгааны зардлыг сэргээгдэх эрчим хүчээр шийдүүлэх хуучин орон сууцнуудын 25-30 жил болсон хуучин лифтнүүдийн  талаар асуудал тавьж, хуучин орон сууцуудын механик усны тоолууруудыг ухаалаг тоолуураар солих улмаар ухаалаг мэдрэгчтэй сантехникийн тоноглол тавих талаар төсөл боловсруулж олон улсын байгууллагуудад хандаж асуудал дэвшүүлж ажиллаж байна.

2021 онд хийж хэрэгжүүлэхээр төлөвлөн зорьж буй ажлуудаас нь асуумаар байна?

Барилгын салбарт ухаалаг, байгаль орчинд ээлтэй  бүтээгдэхүүнүүд нэлээн нэвтэрч байна. Манай компани ч мөн адил 2021 онд хэрэгжүүлэхээр төлөвлөж зорьж байгаа гол ажлаараа усны хэмжилт, доголдлыг илрүүлж мэдээлэх алсын зайнаас тоолуурын заалтыг хэмжиж  бүртгэх, утасгүй “Dailog 3G” технологид суурилсан ухаалаг цогцсистем бүхий усны тоолуурыг нэвтрүүлэхийн зэрэгцээ усны хэрэглээг ухаалаг болгох сантехникийн мэдрэгчтэй холигч, душ, бочкины тоноглолуудыг нийтийн хэрэглээ болгохыг зорьж байна. Мөн “Нийтийн Аж Ахуйн Хөгжил Сан”-ийнхаа сургалт судалгааны үйл ажиллагааг эрчимжүүлэхээр төлөвлөсөн байна.